Високите цени на дизелот закотвија половина од холандската рибарска флота

Зголемените цени на дизелот поради прекините во испораките низ Ормутскиот теснец нанесоа тежок удар врз рибарската индустрија и најмалку половина од холандската флота не исплови оваа недела, предупредуваат претставниците.

Ситуацијата е особено тешка во Холандија поради големиот број на бродови таму, кои првенствено ловат риба со висока вредност во Северното Море и користат релативно голема количина гориво.

Оваа недела, 80 до 90 проценти од нив останаа во пристаништето, предупредува здружението VisNed.

До почетокот на војната на 28 февруари, неделните сметки за гориво се движеа помеѓу 12.000 и 13.000 евра, а сега се искачија на околу 30.000 евра, што е приближно еднакво на вредноста на рибата што може да ја улови еден брод во ова време од годината и не остава простор за исплата на плати на екипажот, вели портпаролот на Холандското здружение на рибари, Дурк ван Туинен.

„Сметката за гориво сега е еднаква на приходот – едноставно не функционира“, нагласи Ван Туинен.

Холандските рибари не се сами во оваа тешка ситуација.

И Белгија и Велика Британија користат тралери за лов на риби, вели Даниел Восес, генерален директор на Europêche, претставничкото тело на рибарите на ЕУ, забележувајќи дека флотите низ Европа работат на точката на рентабилност.

Водечките рибарски земји Шпанија, Италија и Франција воведоа скромни мерки за поддршка, но цените на горивата се зголемија за 70 проценти и многу бродови не се подготвени да отпловат, објаснува Восес.

Претставници на рибарската индустрија се сретнаа оваа недела со комесарот за рибарство на ЕУ, Костас Кадис, барајќи повторно олеснување на регулативите за државна помош, како за време на енергетската криза.

Портпаролот на здружението на холандски рибари предупредува дека потрошувачите исто така ќе го почувствуваат непосредниот ефект.

Во такви услови, рестораните би можеле да ги намалат порциите за да заработат пари, а многу други едноставно ќе престанат да купуваат, па рибата би можела да исчезне од менито, предупредува Ван Туинен.

Фото: Depositphotos