Еден човек беше уапсен со самострел во домот на кралицата Елизабета, во замокот Виндзор на Божиќ минатата година. Тој рекол дека бил таму „за да ја убие кралицата“, беше презентирано на британскиот суд.

Џасвант Синг Чаил (20), кој е обвинет според Законот за предавство на Велика Британија, се појавил во просторот на замокот Виндзор со качулка и маска, беше кажано на судот.

Полицаецот рече дека изгледало како на филм.

Кралицата Елизабета била во замокот во моментот на инцидентот на 25 декември, заедно со принцот Чарлс, неговата сопруга Камила и други блиски членови на семејството.

По истрагата на полицијата за борба против тероризмот, Чаил беше обвинет за закани за убиство, поседување навредливо оружје и прекршок според член 2 од Законот за предавство од 1842 година.

Овој дел од законот ја детализира казната за „нишанење или пукање со огнено оружје, или фрлање или користење на навредливи материи или оружје, со намера да се повреди или алармира нејзиното височество“.

На сослушувањето во лондонскиот Вестминстерски суд, Чајл од Саутемптон во јужна Англија, рекол дека сака да се одмазди на естаблишментот, пренесува „Ројтерс“.

Израел и Турција целосно ги нормализираат односите.

Двете земји повторно ќе назначуваат меѓусебно амбасадори, изјави денеска турскиот министер за надворешни работи Мевлут Чавушоглу.

„Именувањето амбасадор е еден од чекорите за нормализирање на односите. Таков позитивен чекор дојде од Израел како резултат на тие напори, а ние како Турција, исто така, одлучивме да назначиме амбасадор во Израел, во Тел Авив“, рече Чавушоглу, пренесе „Ројтерс“.

Говорејќи на прес-конференција во Анкара, тој додаде дека Турција почнува процес за одлучување кој ќе биде назначен на функцијата.

Двете земји протераа амбасадори во 2018 година, откако израелските сили убија 60 Палестинци за време на протестите на границата со Газа против отворањето на американската амбасада во Ерусалим.

Одлуката доаѓа додека Израел се обидува да ги подобри врските со регионалните сили, а беше договорена две години по таканаречениот Абрахамски договор, со кој се нормализираа односите меѓу Израел, Бахреин, Обединетите Арапски Емирати и Мароко.

Поранешниот австралиски премиер Скот Морисон изјави дека тајно раководел со пет клучни министерства за време на пандемијата на коронавирусот, бидејќи верувал дека одговорноста за нацијата е само негова.

„Управував со бродот среде бура. Само јас можев вистински да ја разберам тежината на одговорноста и да го понесам товарот врз свои рамења“, им рече Морисон на новинарите.

Додаде дека тој не ги презел министерствата и не се мешал во работата на ниту еден од министрите, освен во еден случај кога одбил проект за гасовод.

Актуелниот премиер Ентони Албанесе рече дека Морисон го нападнал Вестминстерскиот систем на владеење со тоа што тајно се назначил себеси за шеф на пет ресори во 2020-2021 година, вклучувајќи ги внатрешните работи, трезорот, здравството, финансиите и ресурсите.