Зеленски: Украина има потреба од ракети „Патриот“ за да избегне катастрофа во текот на зимата

Претседателот на Украина, Володимир Зеленски, изјави дека на состанокот во Белата куќа во вторникот, побарал од американскиот претседател Доналд Трамп „итна зимска помош“ од 300 пресретнувачки ракети за американските противвоздушни одбранбени системи „Патриот“, со цел да се заштити енергетската инфраструктура од руски напади, објави американската веб-страница „Аксиос“.

Без нови испораки пред зимата, руските напади би можеле да уништат електрани, да остават милиони Украинци без греење и да предизвикаат хуманитарна криза, рече тој.

Зеленски рече дека залихите на Украина од овие ракети се речиси исцрпени, а Украина е поранлива на руските балистички ракети.

Тој рече дека Трамп се согласил да продолжи со подготовката на договорот за лиценцирање, врз основа на кој Украина би произведувала ракети за „Патриот“ и со тоа би ја намалила зависноста од американските залихи.

Зеленски додаде дека Трамп ветил дека САД ќе се обидат да му помогнат на Киев иако американските залихи се оптоварени со војната со Иран.

По состанокот во Белата куќа во вторникot, претседателот на Украина се сретна со претставници на американските компании „Локид Мартин“ и „Рајтеон“ – производителот на ракетите „Патриот“. Тие разговараа и за адаптацијата на украинските балистички ракети во пресретнувачи на ракети, што се смета за „побрзо и поевтино“ решение.

Зеленски рече дека нападите на Украина со долг дострел врз руската нафтена и логистичка инфраструктура го подобриле неговиот однос со Трамп, кој го опиша како „многу подобар и поконструктивен“ отколку што бил претходно.

Украинскиот претседател рече дека американските пратеници Џаред Кушнер и Стив Виткоф би можеле да дојдат во Киев во следните две недели за да разговараат за евентуалното продолжување на мировните преговори, но тој верува дека е малку веројатно рускиот претседател Владимир Путин да биде подготвен да прифати прекин на огнот.