Европа
Возачи на камиони блокираа улици низ цела Франција, судири со полицијата во Париз
Возачи на камиони денеска блокираа патишта во десетина региони низ Франција, изразувајќи на тој начин незадоволство од планираното намалување на даночните олеснувања за дизел горивото за патен превоз, додека сообраќајот на возовите и подземната железница и натаму е нарушен поради штрајкот за пензиската реформа.
Во Париз дојде до судири со полицијата на левиот брег од Сена бидејќи неколку стотици припадници на Жолтите елеци продолжија со своите неделни протести, но во споредба со претходните штрајкови, денеска се собраа релативно малку учесници зошто сообраќајниот штрајк го отежна нивното доаѓање во главниот француски град.
Притисокот од Жолтите елеци поради зголемените трошоци за живот и протестите на синдикатите во врска со пензиската реформа се најголемиот предизвик за претседателот Емануел Макрон и заложбите што тој ги прави за да се избалансира државниот буџет и да се воведе еколошки поприфатлива законска регулатива во втората половина на неговиот мандат.
Здружението „Отре“, се спротивставува на зголемувањето на даноците за дизелот за комерцијални возила, како дел од владиниот предлог-буџет за 2020 година.
Оваа организација се жали дека странските возачи на камиони дома можат да купат поевтино гориво, што им овозможува да бидат поефикасни во Франција.
Во нацрт-буџетот за 2020 година, владата планира постепено да ги намалува даночните олеснувања за горивата на товарните возила меѓу 1 јули 2020 година и 1 јануари 2022 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.