Европа
Дали Путин би ризикувал да ги искористи своите подморници во предизвикување експлозии на „Северен тек“?
Три крајбрежни линии на рускиот гасовод Северен тек, кој ја снабдува Германија, претрпеа „невидена“ штета во понеделникот, што резултираше со големо истекување на гас под вода.
Шведските сеизмолози подоцна објавија дека регистрирале две експлозии по должина на трасата на гасоводот. Европските лидери во вторникот рекоа дека веруваат дека експлозиите биле „намерни“, додека некои официјални лица го обвинија за инцидентот Кремљ, сугерирајќи дека тие биле наменети како закана за континентот во услови на неуспешна руска инвазија на Украина.
И покрај военото колебање на Русија во Украина, модернизираната руска подморничка флота се смета за застрашувачка сила.
И нејзината шпионска нуклеарна подморница „Белгород“, модифициран брод од класата Оскар III управуван од Генералниот директорат за истражување на длабинско море (GUGI), е способен да ги наруши подводните комуникации, а како што пренесува „Јутарни лист“, ако може да ги попречи каблите – зошто не и цевководите?
Меѓутоа, прашањето е дали рускиот претседател Владимир Путин би ризикувал да ги искористи своите подморници за таква работа, под закана од дипломатски и други последици доколку нешто тргне наопаку.
Друга можност е дека можеби биле користени автономни подводни возила или подводни дронови кои носат експлозиви. Но, тие би морале да доаѓаат од брод, а тоа тешко дека би останало незабележано на оваа област, а што се однесува до беспилотните летала, секогаш постои можност да фрлат експлозиви на погрешно место.
Ако претпоставиме дека е користен некаков вид бомба, експлозијата не би морала да се случи директно на цевката бидејќи експлозијата се зголемува под вода, па за истото количество полнење може да се постигне многу поголем ефект под површината отколку на брегот.
Иако штетата немаше непосредно влијание врз снабдувањето со енергија на Европа – континентот претходно се сврте кон складирање залихи и алтернативни извори, па оваа епизода, како што пишува „Вашингтон пост“, најверојатно ќе го означи крајот на проектот за гасоводот Северен тек, што е повеќе од дводецениски напор што ја продлабочи европската зависност од рускиот гас и сега се смета за „тешка стратешка грешка“.
Двете експлозии доведоа до истекување на сите три цевководи на подводниот гасовод што ги поврзува Русија и Германија, како резултат на што на површината на данските и шведските води почнаа да излегуваат гасни меури, создавајќи „дамка“.
„Тоа се намерни дела, а не случајност“ изјави во вторникот данската премиерка Мете Фредериксен.
Во морето истече големо количество гас, како што соопшти данската агенција за енергетика – на бродовите и авионите им беше наредено да останат најмалку пет наутички милји од овие локации. Британски „Телеграф“ истакнува дека истекувањето на гасоводи во морето е ретко и дека три истовремено укажуваат на саботажа.
Со оглед на тоа дека цевката е на длабочина од само околу 70 метри, тајното влегување на нуклеарна подморница во Балтичкото Море би било многу тешка задача, ако не и невозможна, пренесува „Јутарњи лист“. Додека нуркачите можат да оперираат на тие длабочини, морските струи може да бидат многу незгодни, а секој придружен брод – подморница или брод – најверојатно би бил забележан со оглед на густината на сообраќајот во областа.
Се вели дека руските подморници се многу добро обучени за такви операции бидејќи со децении ги усовршувале своите вештини „истражувајќи“ подводни интернет кабли по должина на Северниот Атлантски Океан. Подморничките сили на Советскиот Сојуз беа познати меѓу западните поморски команданти по нивната способност да се движат по морското дно со специјално дизајнирани инженерски уреди за време на Студената војна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Возачот на „Фликсбас“ осомничен за убиство од небрежност во Германија
Против возачот на автобусот кој вчера се преврте на германскиот автопат при што загинаа четири лица, а многумина беа повредени, се води истрага за убиство и нанесување телесни повреди од небрежност, соопштија од јавното обвинителство.
Портпаролот на канцеларијата не можеше да каже дали мажот (62) веќе бил сослушан.
Двокатниот европски превозник „Фликсбас“ со 54 лица, меѓу кои и двајца возачи, излетал од автопатот А9 во близина на Лајпциг во средата наутро и се превртел. Автобускиот оператор претходно пријавил дека во автобусот имало 55 лица. Полицијата соопшти дека загинале четири лица, а шест лица се тешко повредени, а 29 лица се полесно повредени.
Не се соопштени детали за здравствената состојба на повредените.
Инспекторите во моментов се фокусирани на утврдување на причините за несреќата. Сите повредени кои се наоѓаат во болница ќе бидат испрашани, доколку тоа им го дозволи здравствената состојба, изјави портпаролката на полицискиот штаб во Лајпциг како одговор на истрагата.
Ќе се нареди и извештај за анализа на автобуската несреќа, соопштија од јавното обвинителство. Првите резултати се очекуваат само за неколку недели.
Идентитетот на четворицата загинати се уште не беше утврден до четвртокот напладне.
„Се трудиме и се надеваме дека ќе можеме да дадеме информации за тоа во попладневните часови“, изјави портпаролката на полицијата.
Автобусот патувал од Берлин до Цирих.
Европа
(Аудио) Кралот Чарлс ја испрати првата јавна порака по дијагнозата на здравјето на Кејт
Порака од кралот Чарлс беше емитувана денеска по повод годишната служба на Величетврток.
Аудиообраќањето на Чарлс беше емитувано на собранието во катедралата „Ворчестер“ во негово отсуство поради тековното лекување на ракот на монархот.
Тој им порача на сите „да ја подадат раката на пријателството“.
„Актот на богослужба, овде во катедралата ‘Ворчестер’, ме потсетува на заклетвата што ја дадов на почетокот на моето крунисување да го следам примерот на Христос ‘да не ми служат, туку да служам’“, рече кралот.
„Тоа е она што секогаш се трудев да го правам и правам со целото мое срце“, додаде тој.
Кралот дојде на тронот пред 18 месеци, а на почетокот на годината му беше дијагностициран рак поради што беше подложен на хемотерапија.
Европа
Заменик-началникот на генералштабот: Британија може да се бори со Русија само 2 месеца
Британските вооружени сили мора да управуваат со оперативниот ризик, што произлегува од недостигот на ресурси што би сакале да ги имаат во идните војни, пишува „Телеграф“.
Информациите се појавија откако Грант Шапс, министерот за одбрана, им рече на пратениците дека лобирал кај премиерот, Риши Сунак, и министерот за економија и финансии, Џереми Хант, повеќе пари во буџетот да се потрошат за одбраната, но не успеал да обезбеди зголемување.
За време на сослушувањето пред пратениците во Комитетот за одбрана на долниот дом, висок офицер на кралските маринци рече: „Ние бевме многу јасни дека сумата што моментно ја трошиме за муниција не ги покрива трошоците во сите области и заканите со кои се соочуваме“.
„Бевме јасни дека треба да потрошиме повеќе пари над буџетот, на она што го нарекуваме интегрирани противвоздушни ракети“.
На прашањето на Марк Франсоа, поранешен министер за вооружени сили, дали е вистина оти Обединетото Кралство „не може да се бори со Владимир Путин повеќе од неколку месеци во целосна воена ситуација поради недостиог на резерви муниција и опрема, Шапс додаде дека секој таков конфликт ќе се води заедно со сојузниците од НАТО, кои заедно би можеле да ја совладаат Русија, наместо само Велика Британија.
„За луѓето што гледаат и слушаат дека Велика Британија не е подготвена за војна исклучиво со Русија, важно е да разберат дека сме во НАТО и постои меѓусојузнички одбранбен договор Член 5, така што никогаш не би биле во таква ситуација“.
Во еден извештај пратениците рекоа дека на вооружените сили им требаат повеќе средства за „учество во операции додека развиваат воена готовност“ или ќе мора да го намалат „оперативниот товар“ на војската.
Поранешните воени началници на комитетот му кажаа дека вооружените сили се ослабени од 2010 година и дека „во конфликт со еднаков противник тие ќе бидат исцрпени по првите неколку месеци од распоредувањето“.
Шапс исто така им рече на пратениците дека лекциите научени од војната во Украина ја покажале важноста на војната со беспилотни летала бидејќи е смртоносна и евтина.
„Ова во Украина е веројатно првата вистинска војна со беспилотни летала и мислам дека никогаш повторно нема да видиме војна која не вклучува тешка употреба на беспилотни летала“, рече тој.
Минатиот месец Обединетото Кралство објави дека, заедно со Латвија, ќе ја предводи новата коалиција за испорака на илјадници беспилотни летала „камикаѕе“ во Украина во услови на растечки недостиг на муниција на фронтот.
„Дроновите ги нарушуваат нормалните факти за војната. Обично секоја генерација станува поскапа за да има смртоносен ефект, но всушност беспилотните летала, кои понекогаш чинат неколку илјади фунти, може да бидат крајно смртоносни“, рече Шапс.
Сепак, тој предупреди дека „основното војување и муницијата“ остануваат важни во секој иден конфликт.