Според последните информации во Србија се потврдени 81 случај на зараза со коронавирус, а едно лице починало.

Вкупниот број на регистрирани случаи е 33.080, а починале 744 лица.

Во последните 24 часа биле тестирани 7.466 примероци, а 1.092.359 од почетокот на епидемијата.

315 пациенти биле хоспитализирани, а 22 биле на апарати за дишење.

Стапката на смртност во Србија е 2,25 проценти.

НАТО соопшти дека има напредок во воените преговори меѓу Грција и Турција со цел да се избегнат конфликти во Источниот Медитеран. Двете земји се расправаат околу потенцијалните зони богати со природен гас.

Генералниот секретар на НАТО, Јенс Столтенберг, рече дека воените претставници на двете земји имале серија состаноци во седиштето на алијансата во Брисел, во обид да постигнат договор за „механизам на деконфликција“ со цел да се избегне ризик од конфликт.

„Состаноците се во тек и е постигнат напредок“, рече Столтенберг по разговорот со шпанскиот премиер Педро Санчез.

Столтенберг прецизираше дека тоа се технички воени преговори кои ги дополнуваат дипломатските напори на Германија за решавање на конфликтот.

Во последните месеци има зголемени тензии меѓу Грција и Турција, членка на НАТО, па Германија го презеде посредувањето.

Атина и Анкара во вторникот се согласија да започнат билатерални разговори за да ја решат кризата.

Столтенберг ја поздрави одлуката, а шпанскиот премиер оцени дека тоа е важен чекор во вистинската насока.

Здравко Кривокапиќ ќе биде мандатар за состав на новата влада во Црна Гора, одлучија пратениците на трите колаиции, пренесуваат црногорските медиуми.

Со своите потписи го поддржаа Кривокапиќ пратениците од партиите „ За иднина на Црна Гора“, „Мир е нашата нација“ и „Црно на бело“ .

„Бараме од претседателот на Црна Гора да го предложи професорот Здравко Кривокапиќ за мандатар за состав на новата влада на Црна Гора“, пишува во документот.

Во црногорското Собрание денеска се одржува седница на која се верификувани мандатите на пратениците по изборите во август и на која Алекса Бечиќ од „Мир е наша нација“, би можел да биде избран за претседател на парламентот.

Во првиот дел од седницата стигна предлог со кој се согласиле сите три коалиции, кои го потпишаа документот во кој се повикува шефот на државата Мило Ѓукановиќ да го предложи за мандатар на новата влада, носителот на листата „За иднина на Црна Гора“, Здравко Кривокапиќ.