Започнува “Тука живеам, одлучувам, постојам“, кампања на Агенцијата за остварување права на зедниците за Пописот 2021.

Слоганот е креиран и спроведен од Агенцијата за остварување на правата на заедниците во Република Северна Македонија со финансиска поддршка од Европска Унија.

„За Агенцијата за остварување на правата на заедниците сите етнички заедници се важни и придонесуваат за социо-економскиот, културниот, правниот како и политичкиот раст на Република Северна Македонија. Затоа важно е на пописот да покажеме дека ние тука живееме, одлучуваме, постоиме“, вели Еран Куртиш, директор на Агенцијата.

Во кампањата како претставник на турската заедница е вклучена студентката Елиф Илијаз, од влашката заедница новинарката и уредничка Јана Михаилова, од ромската заедница студентката Џемилиана Абдулова, од бошњачката заедница правничката Мерсиха Смаиловиќ, од српската заедница преведувачот Стефан Радуловиќ, како и Мирољуб Орландиќ кој е претседател на Мрежа за мултикултурно општество.

„Република Северна Македонија е мултикултурна држава. Во неа живеат многу различни етнички заедници, кои зборуваат на многу различни јазици и за нив пописот е важен. На овој попис секој треба слободно да си ја искаже својата етничка припадност“, истакна Орландиќ.

Според Агенцијата најважно е на овој Попис малубројните заедници да покажат дека сите заедно можеме да ги креираме политиките во државава.

Координаторот на пратеничката група на ВМРО-ДПМНЕ, Никола Мицевски вели дека стравот, паниката и слабоста која што власта и Зоран Заев ги покажаа вчера, укажуваат на тоа дека Заев не верува во своето мнозинство.

„Ден откако Зоран Заев си купи привиден мир со шверцерско гласање на доверба на Влада и тоа го претстави во јавноста како небаре да ги донесол Гугл и Фејсбук и како небаре да набавил милион вакцини, сепак реалноста е иста како и претходно“, истакна Мицевски.

Според него во државата „немаме вакцини а секојдневно луѓето умираат заради тоа“.

Мицевски напомена, дека економијата е пред колапс, а државата според него е презадолжена, додека 55 илјади луѓе кои останаа без работа во последната година сеуште се невработени.

„Со вчерашното гласање падна во вода и уште една голема лага на Заев и луѓето околу него, а тоа е лагата дека тој има пратеници од опозицијата кои го поддржуваат и ќе преминат во таборот на власта“, рече Мицевски.

Министерството за внатрешни работи ја информира јавноста дека од страна на Интерпол е добиена информација дека на профили на социјалната мрежа „Тик Ток“ во Русија и Израел се забележани повици за самоповредување на малолетни лица.

МВР апелира до граѓаните, особено родителите, да обрнат внимание на активностите на своите деца на социјалните мрежи.

„Спорeд досегашните сознанија, вакви повици нема од профили на наша територија, ниту од околните држави, но апелираме на будност и надзор со цел да се избегнат било какви несакани случувања“, се наведува во соопштението.

И српското Министерството за внатрешни работи упати сличен апел до граѓаните, а тамошните медиуми пренесоа дека станува збор за содржини на „Тик ток“ кои најавуваат масовно самоубиство на деца.