Завршните аргументи на обвинителството ќе бидат сослушани денеска на судењето на 93-годишниот поранешен нацистички стражар во концентрационен логор за соучесништво во убиството на повеќе од 5.000 лица за време на Втората светска војна, пренесува „Војс оф Америка“.

Во она што би можело да биде еден од последните вакви случаи на преживеани нацистички чувари, Бруно Деј е обвинет за соучесништво во убиството на 2.230 лица додека работел во логорот „Штутхоф“ во близина на тогашниот Данзиг, сега Гдањск во Полска.

Деј, кој се појави на суд во инвалидска количка, негира дека сноси вина за тоа што се случило во кампот. Неговата одбрана тврди дека тој не им се приклучил на СС доброволно пред да служи во логорот од август 1944 до април 1945 година, а таму бил назначен бидејќи поради проблеми со срцето не можел да биде во првите борбени редови.

Но, обвинителите тврдат дека неговото учество било клучно за убиствата бидејќи периодот додека бил во СС се совпаѓа со наредбата „Конечно решение“ за системско истребување на Евреите преку гасни комори, изгладнување или непружање медицинска нега.

На Деј му се суди на Малолетнички суд затоа што тој во времето на злосторствата имал 17 или 18 години. На неговото сведочење во мај, Деј пред судот изјави дека сака да го заборави времето поминато во кампот.

„Не сакам да се потсетувам на минатото“, рече тој пред трибуналот во Хамбург.

Судијката Ана Мејер-Геринг праша дали Деј разговарал со своите деца и внуци за времето кога бил чувар во „Штутоф“.

„Не сносам никаква вина за тоа што се случи тогаш. Не придонесов ништо за тоа, освен тоа што чував стража. Но бев принуден да го сторам тоа, тоа беше наредба “, рече Деј.

Деј минатата година призна дека бил свесен за гасните комори во кампот и дека видел „прегладнети луѓе, луѓе кои страдале“, но тврдел дека тој не е виновен.

Нацистите го основаа логорот „Штутхоф“ во 1939 година, првично за приведување на полските политички затвореници. Но во него завршија 110.000 затвореници, вклучително и многу Евреи. Околу 65.000 луѓе умреа во кампот.

Деј, кој сега живее во Хамбург, станал пекар по војната. Оженет, татко на две ќерки, тој ги надополнувал своите приходи работејќи како возач на камион, а потоа и на одржување на зградите.

Тој влезе во фокусот на обвинителите по пресудата од 2011 година против поранешниот чувар на логорот „Собибор“, Џон Демјанук, врз основа на тоа дека бил дел од нацистичката машинерија за убивање. Оттогаш, Германија се бори да ги осуди преживеаните припадници на СС по тој основ наместо за убиства или злосторства директно поврзани со обвинетиот.

Демјанук беше осуден за соучесништво во убиството на речиси 30.000 Евреи во логорот „Собибор“. Тој почина чекајќи одговор на неговата жалба. Судот пресуди дека како чувар во кампот, тој автоматски бил вмешан во убиствата извршени во тоа време.

Случајот постави нов правен преседан и предизвика неколку понатамошни пресуди на нацистичките офицери, вклучително и онаа за „книговодителот на Аушвиц“ Оскар Гронинг, кој почина на 96 години, пред да да биде затворен.

Потсетувајќи на реториката на Мао Цедонг за време на Културната револуција, кинескиот амбасадор во Лондон ги повика кинеските студенти кои студираат во Велика Британија да ѝ служат на својата татковина во ек на зголемената загриженост за влијанието на Пекинг врз западните универзитетски кампуси, пренесува „Тајмс“.

Во неодамна откриените коментари дадени за наградата на кинеската влада за извонредни самофинансирани студенти во странство, амбасадорот Лиу Сјаоминг рече: „Се надевам дека ќе продолжите со славната традиција на патриотизам. Се надевам дека секогаш ќе ги живеете личните соништа со стремеж кон Кинескиот сон за национално подмладување. Се надевам дека со она што го научивте овде и сега, можете да им служите на својата татковина и народ во иднина.“

Како одговор на коментарите, професорот Кристофер Хјуз од Лондонската школа за економија изјави за „Тајмс“:

„Идејата за патриотизам, во кинески контекст, значи поддршка на Комунистичката партија. Тоа значи да се бара обединување со Тајван. Тоа значи целосно уништување на тибетските аспирации за автономија. Тоа значи уништување на Хонг Конг. Тоа предизвикува многу наши принципи на академска слобода. Колку повеќе кинески студенти има, толку повеќе се контролирани и искористувани од Кинеската амбасада. Постојат различни групи формирани за да го следат нивното однесување. Затоа, тие не се чувствуваат безбедно. Тоа значи дека се подложуваат на самоцензура“.

Во Велика Британија во моментот има околу 120.000 кинески студенти. Во ноември, Комитетот за надворешни работи утврди дека студентите од Кина се активно вклучени во пропаганден напор на кампусите да извршат притисок врз наративот за поддршка на Кинеската комунистичка партија и да го задушат слободниот говор за чувствителните прашања за партијата, како што се Тајван и Хонг Конг.

Напорите што ги прават некои кинески студенти често се организираат од универзитетските ограноци на институтот „Конфучиј“, кој тврди дека е само средство за ширење на кинеските јазик и култура, но всушност е подружница на кинеското Министерство за образование кое е под надзор на Централниот пропаганден оддел на Комунистичката партија. Во моментов има 29 ограноци на институтот „Конфучиј“ низ цела Британија.

Кинески претставници на институтот „Конфучиј“ се обвинети во Велика Британија за конфискување документи што го споменуваат Тајван, како и за затворање на настаните во кампусот кои се фокусираа на Тајван или на Тибет.

Изјавите на кинескиот амбасадор најверојатно се одговор на растечкиот спор со САД откако американскиот претседател Донал Трамп во мај објави дека неговата администрација ќе ги ограничи визите за кинеските дипломирани студенти во услови на загриженост поради интелектуалната шпионажа.

„Со години владата на Кина спроведува незаконска шпионажа за да ги украде нашите индустриски тајни. Денес ќе издадам проглас за подобро обезбедување на виталното универзитетско истражување на нашата нација и за суспендирање на влегувањето на одредени странски државјани од Кина, кои ние ги идентификувавме како потенцијален безбедносен ризик“, рече Трамп.

Во јуни, Министерството за правда објави дека еден од водечките хемичари во Америка, поранешниот шеф на Катедрата за хемија и хемиска биологија на универзитетот „Харвард“, д-р Чарлс Либер, беше обвинет дека давал лажни изјави за неговата врска со кинеската програма Илјадници таленти (ТТП).  СЕ верува дека програмата е клучна форма на напорите на ККП за кражба на интелектуална сопственост од Западот.

Тензиите се зголемуваат и меѓу Велика Британија и комунистичкиот режим во Пекинг, кои предупредија дека Велика Британија ќе ги сноси сите последици поради одлуката на премиерот Борис Џонсон да отвори пат за државјанство за најмногу 3 милиони жители на Хонг Конг по воведувањето на драконскиот Закон за национална безбедност на градот кој ќе служи за задушување на слободата и автономијата што му беа ветени на Хонг Конг во Кинеско-британската заедничка декларација.

Демонстрантите обезглавиле статуа на Кристофер Колумбо во Конектикат, фрлиле друга статуа во пристаништето на Балтимор и ја запалиле скулптурата „семејство пионери“ во Портланд, Орегон, за време на празничниот викенд за 4. Јули додека судирите околу спорните споменици продолжуваат да беснеат низ целата земја, пренесува „Њујорк пост“.

„Иако ги поздравуваме мирните протести и конструктивниот дијалог за тоа дали и како да се стават одредени споменици во контекст или да се преселат во музеите преку правен процес, беззаконието, вандализмот и уништувањето на јавниот имот е целосно неприфатливо“, напиша гувернерот на Мериленд, Лери Хоган, на Фејсбук.

„Лидерите на Балтимор треба да ја вратат контролата на сопствените улици и веднаш да почнат да ги прават побезбедни. Ова е антитеза на демократијата и треба да биде осудена од сите, без оглед на нивната политика“, напиша Хоган.

Мермерната статуа на Колумбо, која стоеше на пиедестал во близина на квартот Мала Италија во Балтимор, беше цел на демонстрантите во саботата вечерта, на 4. јули. Толпата ја закачи со јажиња и ја собори на земја пред да ја повлече кон пристаништето и да ја фрли во водата.

Статуата е подигната во 1984 година и беше откриена од тогашниот градоначалник Вилијам Доналд Шафер и тогашниот претседател Роналд Реган.

Тоа не беше единствениот споменик на италијанскиот истражувач од 15 век уништен за време на викендот. Во Конектикат, полицијата во саботата наутро открила дека главата на гранитната статуа на Колумбо, висока 12 метри, и поставена близу Градското собрание,  била откината во текот на ноќта и сè уште е исчезната.

„Ова беше подарок за градот Вотербери од американската италијанска заедница и жално е што е уништен на овој начин“, рече Дејвид Х. Саливан, локален кандидат за Конгресот.

Статуи на историски личности – вклучително и Колумбо, Џорџ Вашингтон, личности од Конфедерацијата и други сопственици на робови – станаа мета на демонстрациите на „Блек лајвс медр“ откако националните расни немири ги обновија дебатите за нивното мешано наследство.

Полицијата во Портланд, Орегон, исто така прогласи немири во саботата кога демонстрантите ја запалија „Ветената земја“, скулптура во паркот пред судот. Поставена во чест на „Патеката во Орегон“, бронзената скулптура прикажува пионерски татко, мајка и син. Демонстрантите исто така се обиделе да го запалат и судот.

Претседателот на САД, Доналд Трамп, го осуди сквернавењето на спомениците. На неговиот митинг во Маунт Рашмор во петокот тој вети дека ќе потпише извршна наредба за создавање „национална градина на американски херои што ќе содржи статуи на големите Американци“.