Официјална Москва никому не му остана должна за барањата за купување вакцини, но во моментот нема капацитет да ги прифати сите барања, изјави денеска портпаролот на Кремљ, Дмитриј Песков.

Песков го коментира барањето на претседателот на Чешка, Милош Земан, од Русија да купи вакцини „спутник В“, пренесе агенцијата „Тасс“.

„Русија внимателно реагира на секое барање и се обидува да обезбеди што е можно повеќе вакцини за земјите што се соочуваат со недостиг на дози. Имаме премногу барања, а нашите производствени капацитети не се доволно големи за да ги прифатиме сите“, објасни Песков.

Словачката влада ќе ги заостри рестриктивните мерки против коронавирусот, вклучително и оние што го ограничуваат движењето, поради зголемувањето на бројот на новоинфицирани лица од 3 март, информираат официјалните служби.

Владата на премиерот Игор Матовиќ објави детали за новите мерки по повеќедневни дискусии со експерти, а Словачка има најлош број на новоинфицирани во светот.

Од среда Словаците ќе може да се движат од 8 до 13 часот, само на работа или на лекар, а исклучоци од ограниченото движење може да бидат само од 17 до 20 часот. Оние ште може да работат од дома мора да го сторат тоа, пишува „Ројтерс“.

Од 8 март жителите ќе може да влегуваат само во јавен превоз или продавници со заштитни маски FFP 2 со вентил.

Предучилишните и пониските одделенија во училиштата ќе работат само за деца чии родители не може да работат од дома.

Доколку овие ограничувачки мерки не го намалат бројот на нови инфекции до 21 март, владата планира уште построги ограничувања на движењето, вклучително и затворање компании и граници, објавија локалните медиуми.

Европската комисија во март ќе претстави предлог за дигитални пасоши за вакцинација против Ковид-19, што може да биде еден од условите за слободно патување во Европската Унија, изјави претседателката на Европската комисија, Урсула фон дер Лаен.

„Што се однесува до тоа како може да изгледаат дигиталните зелени пасоши – ќе размислиме. Ќе претставиме предлог-закон како би можел да изгледа“, рече Фон дер Лаен за време на видеоповик со германските конзервативни пратеници.

Лидерите на Европската Унија во петокот го поддржаа воведувањето дигитални сертификати за влез во земјите членки и отворањето на општеството по пандемијата.