Кавадарчанец заврши во осумдневен притвор поради закани упатени кон градоначалникот и неговото семејство. Основното јавно обвинителство Кавадарци поведе постапка против 40-годишниот кавадарчанец, кој во изминатите неколку месеци ја загрозил сигурноста на градоначалникот на Кавадарци и неговото семејство. Постапката е поведена за загрозување на сигурноста од член 144, став 4 и насилство од член 386, став 3 во врска со став 1 од Кривичниот законик.

Како што соопшти Обвинителството, во текот на неколку месеци, почнувајќи од август до 29 декември 2019 година, осомничениот во повеќе наврати психички ги малтретирал и навредувал градоначалникот на Кавадарци и неговото семејство, со што кај нив предизвикал чувство на несигурност, загрозување и страв. Психичкото насилство почнало со закани и објавување статии со клевети и навреди на социјалните мрежи.

„Осомничениот повикувал и други лица користејќи се со повици во кои се содржат зборови од насилна природа. Тој континуирано ги следел оштетениот и неговото семејство, ја фотографирал куќата во која тие живеат и преку нивни роднини им упатувал сериозни закани.

Ваквото однесување на осомничениот било пријавувано во Полициската станица Кавадарци, од каде што неколкупати бил опоменуван, но и покрај тоа, продолжил да врши психичко насилство и да ја загрузова сигурноста на оштетениот. Насилството кулминирало вечерта на 28 декември кога осомничениот, поради фотографирање на домот на градоначалникот, бил повикан во полициската станица, а во негово име на оштетениот телефонски му се јавило друго лице упатувајќи му сериозни закани.

Заканите продолжиле и од страна на осомничениот упатени преку социјални мрежи, во кои тој повикува градоначалникот да плати со крв и месо. Ваквите закани го исполнуваат битието од кривичното дело – загрозување на сигурноста, бидејќи со заканата упатена преку информатички систем осомничениот се заканува дека ќе стори кривично дело за кое е пропишана казна затвор од најмалку 5 години. Со психичко малтретирање на градоначалникот и на членовите на неговото семејство, кај кои предизвикал чувство на несигурност, загрозување и страв, осомничениот ги исполнил елементите на кривичното дело насилство.

Јавниот обвинител, кој постапува по предметот, оцени дека се исполнети законските основи, како и дека постои можност осомничениот да го повтори делото или да го изврши делото со кое се заканува, па во насока на непречено водење на кривичната постапка до Основниот суд Кавадарци поднесе предлог за определување на мерката притвор. Судот го прифати предлогот на Обвинителството и на осомничениот му е определен притвор во траење од 8 дена“, соопшти Обвинителството.​