Свет
Лоцирани двете црни кутии од паднатиот индонезиски авион

Лоцирани се двете црни кутии од „боингот“ на индонезиска авиокомпанија што се урна во морето во близина на главниот град Џакарта, со 62 лица.
Информацијата денеска ја објави безбедносниот одбор на индонезиското Министерство за транспорт.
„Ја локализиравме позицијата на двете црни кутии“, рече шефот на безбедносниот одбор.
„Нуркачите ќе почнат да ги бараат и се надевам дека тоа нема да трае долго“, додаде тој.
Претходно, спасувачите извлекоа делови од човечки тела, облека и парчиња метал од површината на водата. Локални рибари и вчера непосредно по несреќата пронашле делови од авионот кои пловеле во водата и тие се испратени на испитување.
Пресвртна точка во потрагата по авионот на компанијата „Сривиџаја ер“ беше кога сонарот од воен брод, вклучен во потрагата, го откри сигналот од локаторот на авионот на местото за кое се верувало дека е место на несреќата.
Сепак, сè уште не е познато ништо за причините за падот на авионот, кој, најверојатно, никој од патниците и членовите на екипажот не го преживеал, пренесува „Асошиејтед прес“ (АП).
Во авионот имало 62 лица, од кои седум деца и три бебиња. Шестмина биле членови на екипажот.
Авионот „боинг 737-500“, на компанијата „Сривиџаја ер“, вчера непосредно по полетувањето во 7 часот и 40 минути, паднал во морето откако нагло ја изгубил висината и набргу по полетувањето од индонезиската престолнина го загубил контактот со контролата на летање и исчезнал од радарите. Станувало збор за домашен лет од Џакарта за Понтијанак.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Украина изврши напади во Русија преку ноќ: дронови насочени кон Москва и Санкт Петербург

Руските власти и државните медиуми објавија напади од украински беспилотни летала во текот на ноќта низ целата земја, вклучувајќи ја Москва и западните региони на Русија.
Градоначалникот на Москва, Сергеј Собјанин, изјави дека руската воздушна одбрана соборила три беспилотни летала што се приближувале кон главниот град помеѓу 2 и 3 часот наутро по локално време. Тој додаде дека службите за итни случаи се на местото на настанот, но не даде информации за жртви или штети.
Во Санкт Петербург, аеродромот Пулково привремено го запре сообраќајот во 5 часот наутро, објави Росавијација. Иако причината не беше наведена, се верува дека станува збор за закана од беспилотни летала, бидејќи руските аеродроми често ги приземјуваат летовите поради украинските напади. Според извештаите, најмалку 10 летови биле одложени.
Државната новинска агенција ТАСС соопшти дека беспилотните летала биле соборени источно од Санкт Петербург со употреба на системи за електронско војување.
Во регионот Смоленск, јужно од Санкт Петербург, гувернерот Василиј Анохин изјави дека се соборени 14 дронови, а едно лице е повредено.
Поблиску до линијата на фронтот, гувернерот на регионот Белгород, Вјачеслав Гладков, тврди дека украински дрон убил едно лице и ранил шест други во градот Белгород. Друго лице наводно е повредено во остатокот од регионот.
Во Воронеж, руските канали на Телеграм објавија дека дрон удрил во станбена зграда, при што се повредени три деца. Гувернерот Александар Гусев изјави дека во регионот се соборени најмалку пет дрона.
Во регионот Калуга, гувернерот Владислав Шапша објави дека 14-годишно девојче е повредено откако три дрона биле соборени над регионот.
Руското Министерство за одбрана објави дека вкупно 122 украински дронови биле соборени над неколку делови од земјата.
Украинската војска сè уште не ги коментираше наводните напади. Порталот „Киев Индепендент“ забележува дека не може да ги потврди тврдењата на руските претставници или медиуми.
Регион
(Видео) Зебра избега од Зоолошката градина во Белград, повредени три лица

Од трите лица повредени вчера кога зебра избега од ограден простор во Зоолошката градина во Белград, две се однесени во Военомедицинската академија, но се пуштени на домашно лекување бидејќи повредите биле полесни, соопшти утрово Ургентниот центар на ВМА.
Зебрата удрила во маж и го прегазила, по што му биле констатирани полесни повреди, додека другата жена била донесена во ВМА без физички повреди, но во состојба на шок, изјавија за РТС.
Од Зоолошката градина во Белград вчера, зебра избегала од ограден простор и повредила вкупно три лица, од кои едно било дете, кое било пренесено во Детска клиника.
Регион
Три лица извлечени од морето во различни делови на Грција: меѓу нив и српски државјанин

Три лица, меѓу кои и еден српски државјанин, беа извлечени во несвест од морето во различни делови на Грција, соопшти крајбрежната стража.
Во раните утрински часови во среда, 88-годишен грчки државјанин беше извлечен во несвест од морето во областа Агиос Андреас Малаконтас во Еретрија, според Прототема.
Неколку часа подоцна, 69-годишен српски државјанин беше извлечен во несвест од морето во Олимпискиот брег во областа Пиерија.
Во трет инцидент, друг грчки државјанин (61) беше извлечен од морето во пристаништето Милина во општина Јужен Пелион.
За сите три инциденти, надлежните пристанишни власти спроведоа прелиминарна истрага и беше наредена обдукција.
Вчера сите беа шокирани од веста за смртта на 13-месечно бебе од Србија, кое се задуши додека беше на плажа со своите родители на Халкидики. Момчето се задавило со храна додека било во бар на плажа во областа Ормос Панагиас.