Израелските сили во вторникот по 182. пат го уништија селото Ал-Аракиб во пустината Негев, објавија „Анадолија“ и другите новински агенции. Локални извори велат дека израелските сили влегле во селото со голем број булдожери и ги урнале домовите и шаторите. Жителите биле раселени. Еден од нив, Азиз Ал-Тури, објасни дека уривањето се одвивало и покрај ужасното време.

„Врнеше и беше студено, но израелските сили сепак ги демолираа нашите домови“, рече тој и посочи дека ова е седми пат Израел да ги уништува нивните домови за време на пандемијата на Ковид-19.

Луѓето од Ал-Аракиб ја нагласија својата цврстина и решеност да останат на својата земја и повторно да ги изградат своите домови и шатори. Тие го истакнаа нивното отфрлање на плановите на Израел да уништи десетици села во Негев, со цел да ги раселат нивните луѓе и да им ја заземат земјата. Израел планира да гради еврејски градови на нивно место.

Ал-Аракиб беше демолиран за прв пат во 2010 година. Израел не го признава селото, но неговите жители истакнуваат дека тие ја поседуваат земјата уште од османлискиот период, децении пред Израел да биде создаден во окупирана Палестина. Тие имаат намера да останат таму и покрај повторените уривања.

Белата куќа во моментов не е во можност да објави какви било планови за првата прекуокеанска посета на американскиот претседател Џозеф Бајден, изјави портпаролката на Белата куќа, Џен Псаки, на брифинг со новинарите, пренесува ТАСС.

„Во моментов, немам детали за патувањето во странство на Бајден“, рече таа.

Според Псаки, тие планови ќе бидат достапни наскоро. Таа исто така изрази изненадување што администрацијата на Бајден работи само 6 часа, а новинарите веќе сакаат да знаат за патувањата во странство.

САД, под претседателство на претседателот Џо Бајден, имаат намера да се приклучат на Ковакс-механизмот, чија цел е да се доставуваат вакцини во сиромашните земји, изјави за Светската здравствена организација (СЗО) главниот медицински советник на Бајден, Ентони Фаучи.

„Претседателот Бајден ќе издаде директива подоцна денес која ја вклучува намерата на САД да се приклучат на Ковакс и ќе го поддржат АКТ-забрзувачот во унапредувањето на мултилатералните напори за вакцината против Ковид-19, терапевтската и дијагностичката дистрибуција, непристрасниот пристап и кон истражувањето и кон развојот“, рече Фаучи пред Извршниот одбор на СЗО, објави „Ројтерс“.

Тој рече дека САД ќе останат членка на СЗО.

Генералниот директор на СЗО, Тедрос Аданом Гебрејесус, ја поздрави намерата на САД изјавувајќи дека тоа е добар ден за СЗО и добар ден за глобалното здравје.

Претходникот на Бајден, Доналд Трамп, го прекина финансирањето на СЗО, каде што САД беа најголем донатор и најави постапка за повлекување од Агенцијата во јули 2021 година.