Судијата на претходна постапка по барање на Јавното обвинителство им одреди мрека пртивор од 30 дена на поранешните министри Миле Јанакиески и Спиро Ристовски, осомничени за организирање на насилниот упад во Собранието на 27 април 2017 година. Неофицијално, притвор е побаран и за Никола Груевски за кој ќе биде проширено барањето за екстрадиција и за овој предмет.

Вечерва на распит беше и поранешниот претседател на Собранието, Трајко Вељаноски, кој е исто така осомничен за организирање на упадот, но тој се повика на пратеничкиот имунитет по што го напушти судот. Неофицијално, за него најверојатно утре ќе биде доставено решение до Собранието за да му се одземе имунитетот.

Меѓу осомничените за случајот се и Никола Бошкоски и поранешниот премиер Никола Груевски кои се наоѓаат во бегство. Бошкоски во моментов е во Грција, а експремиерот доби азил во Унгарија.

За настаните од 27 април во притвор веќе неколку месеци се наоѓа поранешниот директор на УБК, Владимир Атанасовски. Тој беше притворен по сведоштвата што во судот ги даде обвинетиот Александар Василевски-Нинџа.

По информациите за вечерашното приведување на тројцата функционери на ВМРО-ДПМНЕ – Трајко Вељаноски, Спиро Ристовски и Миле Јанакиески, вечерва прес-конференција одржа лидерот на опозициската партија, Христијан Мицкоски.

Тој во обраќањето порача дека од владејачкиот СДСМ се свесни дека народот веќе не ги поддржува, па поради тоа, подмнолно внесуваат страв во општеството со, како што кажа, нова тура политички прогон.

„Деспотот Заев го гледа својот крај и затоа е најопасен. Апси врз основа на изјави од сомнителни лица со години по настанот за кој ги обвинуваат“, рече Мицкоски во врска со денешните приведувања за настаните во Собранието од 27 април 2017 година.

Како што рече Мицкоски, од власта знаат дека паѓаат и затоа сакат да ги исплашат граѓаните.

„Сакаат да се зборува за апсења и прогони за да не излезат на виделина суштинските работи и проблеми“, рече претседателот на ВМРО-ДПМНЕ.

„Апси, можеш да нарачуваш убиства, но едно да знаеш, нема да ти се исплашиме“, рече Мицкоски во порака до премиерот Заев порачувајќи: „Готов си и за тебе крајот ќе биде жесток“.

Мицкоски на прес-конференцијата истакна дека една од најважните работи за неговата патија во наредниот период е да му нанесе пораз на СДСМ на претседателските избори.

Шефицата на Обвинителството за организиран криминал при ЈО, Вилма Русковска, изјави дека распитот на осомничените ексфункционери од ВМРО-ДПМНЕ, Спиро Ристовски и Миле Јанакиески, е завршен и се чека одлуката на судија во претходна постапка по барањето на Обвинителството за нивен притвор.

Русковска истакна дека Обвинителството побарало притвор за Јанакиески и Ристовски поради опсаност од бегство и влијание врз сведоци.

Обвинителката посочи дека поранешниот претседател на парламентот, Трајко Вељаноски, се повикал на пратеничкиот имунитет по што заминал од судот.