Британската кралица Елизабета Втора е фотографирана како јава пони во паркот во Виндзор. Ова е првпат да е забележана надвор од палатата од воведувањето на мерките на изолација.

Кралицата е позната како голем љубител на јавањето коњи.

Од воведувањето на мерките, таа живее во дворецот Виндзор, заедно со својот сопруг, принцот Филип (98). Оттаму неколкупати ѝ се обрати на нацијата, преку соопштенија или телевизиски обраќања.

По неколку приватни собири што предизвикаа ново жариште на епидемијата на коронавирус во германскиот град Готинген, околу 160 луѓе ќе бидат во домашна изолација.

Властите соопштија дека 35 од нив се позитивни на Ковид-19, а присуствувале на приватни настани што биле забранети поради пандемијата.

Од нив, едно лице е во тешка состојба.

Ќе бидат тестирани сите што биле во контакт со групите.

Шпанскиот премиер Педро Санчез најави дека ќе побара од Парламентот уште едно, последно двонеделно продолжување на вонредната состојба воведена поради пандемијата.

Вонредната состојба треба да истече на 7 јуни, а Владата ќе побара продолжување во наредните денови. Вонредната состојба и овозможи на Владата да воведе забрани и ограничувања за сузбивање на ширењето на коронавирусот.

Забраните и ограничувањата селективно се попуштаат по региони, во зависност од тоа колкумина се заразени и колку региони се подготвени за можен втор бран на заразата.

Сепак, поголемите собирања и забави се причината за поголемиот број на заразени од коронавирусот деновиве, кога земјата се обидува да се врати во нормала после неколкумесечниот карантин поради епидемијата, пишува весникот „Ел Паис“.

Се наведува дека на една роденденска забава се заразиле 18 лица и сега мора да бидат во самоизолација, а во помалку случаи имало и ширење на заразата и на семејни собири.

Шпанските власти постојано ги повикуваат граѓаните да не престануваат да се штитат и строго да се придржуваат кон мерките во секоја фаза.

Во Шпанија од коронавирус досега починаа 27.000 луѓе.