Чешка побара од Германија, Швајцарија и Полска да примат десетици пациенти заразени од Ковид-19, бидејќи состојбата во чешките болници е критична, соопшти Министерството за здравство.

Земјата, со 10,7 милиони жители, беше една од најтешко погодените на глобално ниво во последните неколку недели, а голем дел од регионалните болници, кои беа преплавени со пациенти од коронавирус, беа принудени дел од пациентите да ги префрлат во други болници, стотина километри подалеку, пишуваат чешките медиуми.

„Големиот број новозаразени лица со коронавирус го зголемија притисокот врз здравствениот систем, а расте и бројот на пациенти на кои им е потребна хоспитализација“, соопшти министерството.

„Во некои региони, болниците ги исцрпија своите капацитети и повеќе не можат да обезбедат соодветна грижа или да примаат нови пациенти без помош на други земји“, рече во изјавата министерот за здравство.

Јапонската влада денес ја продолжи вонредната состојба во областа Токио за две недели во обид да се справи со Ковид-19, за што премиерот Јошихиде Суга и се извини на нацијата.

Вонредната состојба треба да заврши на 7 март, но четири и пол месеци пред Токио да биде домаќин на Олимписките игри, Суга рече дека има потреба од претпазливост поради заканата од нови видови коронавирусот и можноста од зголемување на бројот на нови случаи од коронавирусот, пишува „Ројтерс“.

„Искрено ми е жал што не успеав да ја укинам вонредната состојба, како што ветивме претходно, до 7 март. Се извинувам од дното на моето срце“, рече Суга.

Како дел од вонредната состојба во Токио и трите околни префектури, владата побара затворање на рестораните и баровите до 20 часот и да престанат да служат алкохол еден час порано.

Од граѓаните се очекува да останат дома по 20 часот, освен ако немаат суштинска причина да излезат надвор.

Папата Франциско за време на неговата прва папска посета во Ирак испрати апел за толеранција и братство меѓу народите.

Тој замоли Ирачаните да ги почитуваат верските малцинства и да гледаат на нив како на „вреден ресурс“ за заштита, а не на пречка која треба да се елиминира.

Папата му рече на претседателот Бархам Салих и на другите ирачки официјални лица собрани во палатата во Багдад во рамките на силно утврдената зелена зона, дека никој не смее да се смета за граѓанин од втор ред. Тој рече дека Ирачаните од сите вери имаат исти права на заштита како припадниците на шиитското мнозинство.

„Само кога ќе ги оставиме зад нас разликите и ќе се погледнеме едни со други како членови на исто човечко семејство, тогаш ќе можеме да почнеме ефикасен процес на обновување на идните генерации кон подобар, пофер и похуман свет“, рече тој.

И покрај загриженоста за пандемијата од коронавирусот и влошената безбедносна состојба, папата дојде во Ирак за да ги охрабри припадниците на христијанската заедница. Тој ги замоли да останат во Ирак и да помогнат во обновата на нивната земја по долгогодишната војна.