Македонија
(Видеодебата) Судир меѓу извршителите и граѓаните со блокирани сметки
Новиот предлог-закон за извршување ги разгоре и онака спротивставените интереси меѓу извршителите и граѓаните со блокирани сметки. И новиот како и стариот закон речиси во целост е на страната на правдата за извршителите, кои ги штитат интересите на доверителите, а должниците, особено граѓаните врз кои како физички лица се спроведува овој закон, остануваат со скинати џебови и без излез од нехуманиот закон. Во жестока дебата размислувањата ги соочија заменик-министерот за правда Оливер Ристовски, професорката Мирјана Најчевска, граѓанската активистка Ана Глигорова и претседателката на Надзорниот одбор на Комората на извршителите, Весна Деловска.
Додека неколку граѓански асоцијации што ги застапуваат правата на граѓаните со блокирани сметки тврдат дека извршителите постапуваат незаконски кога ги блокираат сметките, вршат извршување и финансиско одземање и во случаи на лица со сериозни социјални и економски проблеми, заменик-министерот за правда, Оливер Ристовски, тврди дека овој закон за извршување е меѓу најдобрите во Европа.
Според него, моделот е преземен од холандскиот закон и тој во Холандија се покажал како успешен. Тој не сакаше да ја коментира несоодветната споредба бидејќи една високоразвиена правна и социјална држава како Холандија, во која социјалните случаи добиваат висока социјална помош, е тешко споредлива со состојбите во Македонија.
Овој закон за извршување, според Ристовски, не може да ги регулира тие неправди што се констатирани во делот на наплатата на каматите и застарените долгови, па предлага за ова да се подготви нов закон за облигација.
Како претставник на граѓанските здруженија за заштита на човековите права „Но пасаран“, „Човекот над профитот“, „Гласен текстилец“ и Конфедерацијата на синдикалните организации, Ана Глигорова вели дека ниту еден нивни член не бил консултиран во изготвување на новиот закон за извршување иако неколкупати тие упатувале барања и до Министерството за правда да се најде решение за овој горлив проблем, односно да се стави крај на финансискиот геноцид на граѓаните. Таа посочи примери на незаконско постапување на извршители кога станувало збор и за блокирање сметки и одземање парични средства на старател на сираци, како и на други социјално загрозени лица.
Според податоците на Централниот регистар, вкупните приходи на извршителите за периодот од 2012 година до 2016 година изнесувале 60 милиони евра, а во истиот период оствариле добивка од 23 милиони евра.
Претседателката на Надзорниот одбор на Комората на извршителите, Весна Деловска, вели дека се согласува оти треба да се најде начин да нема извршување врз застарени долгови, но главниот притисок да спроведуваат извршување, дури и таму каде што ќе проценат дека тоа не треба да го направат, таа вели дека го добиваат од доверителите.
Според Деловска, најмногубројни предмети за извршување има од комуналните фирми, како ЕВН, БЕГ, „Водовод“ ,па потоа од банките.
Општиот заклучок е дека проблемот е системски и се случил како последица на негрижа на државата кон граѓаните. Во неколку наврати на дебатата беше посочено дека банките и други приватни фирми под капата на законот може да ги блокираат сметките на граѓаните, односно да наложат извршителите да ги блокираат сметките. Се чини дека во меѓуинституционална соработка не се направени анализи што ќе го забележат овој голем социјално-економски проблем и дека барањата на граѓанските асоцијации се слушаат само како ехо. Сепак, доколку и натаму не се преземе законска регулатива, која ќе овозможи поедноставен пат за решение на блокираните сметки на граѓаните, активистите најавуваат масовни протести, а според нивна процена, со овој проблем се соочуваат половина од македонското насление.
Ана Василевска
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Државата е украдена од народот од страна на ДУИ и нивните измеќари СДС
Многу е важно да споменеме што ни се случуваше изминативе 6 и половина години, грабеж, понижување, срам и да не дозволиме никогаш повеќе да се повторат. Ветуваа дека ќе донеле правда и мир, а ниту правда ниту мир донесоа, никогаш полошо не се живеело криминалци царуваат со градовите, а оние кои треба да се одговорни за правдата и мирот се најверни коалициони партнери на криминалците, изјави претседателот од ВМРО-ДПМНЕ, Христијан Мицкоски на митингот во Кратово.
Мицкоски нагласи дека законите не важат за сите подеднакво, државата му е украдена на народот и со неа управува мала тесна клика на власта која континуирано ја понижува, ограбува и срами Македонија, како и дека има цикличен артаноиден режим во Македонија.
– Шансата за сето ова да се промени ја имаме на 24 април да излеземе да го заокружиме бројот 2 да ја поддржиме идната претседателка Гордана Силјановска Давкова а потоа уште помасовно на 8 мај, Македонија не само горда, да ја направиме и повторно твоја, рече Мицкоски.
Тој нагласи дека оваа власт ветуваше подобар живот и за земјоделците, за пензионерите, учениците, за здравството, но наместо тоа гледаме да нема загарантиран откуп за земјоделците, да нема учебници за учениците, пензионерите да протестираат за пензии, а во здравството видовме како се запали модуларната и луѓе загинаа, а бевме во првите 5 држави по смртност во корона пандемијата.
Мицкоски се осврна и на ДУИ за кои рече дека ги напаѓа затоа што се криминалци.
„Тие ме нарекуваат анти Албанец, не јас сум анти ДУИ криминалците. Ќе зборувам против принципот на владеење „како до сега“ како му рече Ахмети на Ковачевски. Ќе бидам против системот на владеење каде момчиња кои само што се од фамилијата Ахмети купуваат милионски имоти во центрите на градовите, тие кои се дел од тоа семејство и сватови имаат возен парк од неколку милиони евра, а народот нема леб да јаде“, нагласи Мицкоски.
Лидерот на ВМРО-ДПМНЕ посочи дека по 8 мај владата на коалицијата Твоја Македонија предводена од ВМРО-ДПМНЕ има задача сите кои ја ограбија и понижија Македонија да ги прати во затвор, доста беше од овие стотина разбојници кои ја уништија Македонија.
Говорејќи за Пендаровски, Мицкоски потсети како Пендаровски едно зборува наутро, друго на пладне, а навечер ги демантира двете, како и дека во меѓувреме ќе кажува дека Гоце Делчев бил Бугарин, дека ако не бил претседател ќе се селел од Македонија, ќе навредува дама како професорката Гордана Силјановска Давкова.
„Од друга страна имаме титан како професорката Силјановска Давкова која изминативе години ги бранеше македонските национални интереси, заслужува поддршка и историска победа на овие избори. Таа застана заедно со нас во првите редови одлучи за да се бори за Македонија за својот народ, за сите нас за достоинствена просперитетна држава со можности и шанса за секого“, истакна Мицкоски.
Тој повика „сите масовно да се обединиме на 24 април да му помогнеме на Пендаровски да ги пакува куферите, да гласаме за Гордана Силјановска Давкова, а потоа на 8 мај да ја направиме Македонија и повторно горда и повторно горда и да стигнеме до 61 пратеник, да ја ослободиме Македонија од овие стотина разбојници од ДУИ и нивните измеќари од СДСМ“.
Македонија
Таравари: Ќе се погрижам од Уставот да се елиминира навредливата дефиниција на албанскиот јазик
Кандидатот за претседател од редовите на ВЛЕН, Арбен Таравари, во едно од своите ветувања на политичката платформа, јасно наведува дека ќе се погрижи навредливата дефиниција на албанскиот јазик како „друг јазик што го зборуваат најмалку 20 %од граѓани“ да се елиминира од Уставот.
„Ќе се погрижам од Уставот да се елиминира навредливата дефиниција на албанскиот јазик како „друг јазик што го зборуваат најмалку 20% од граѓаните„ и албанскиот јазик, во неговото писмо, да биде службен јазик на целата територија на државата на еднакво ниво со македонскиот јазик“.
Македонија
Ковачки: Во рамките на проектот „Злетовица“, изградба на шест мали и две хидроцентрали со цевководи за водоснабдување на општините Пробиштип и на Кратово
Изминатите години се години кои се црно минато за нашата држава. Години кои ќе сакаме да ги заборавиме и никогаш повеќе да не ни се повторат. Години на тешки национални предавства, криминал и корупција од енормни размери, опасна економска катастрофа, јавен долг од 8,8 милијарди евра, најниски плати и пензии во Европа, а највисока инфлација во регионот и пошироко. СДС-ДУИ забегаа во секоја смисла на зборот, без никакви чувства, без никакви сопирачки, рече Драган Ковачки, носител на листата на пратеници во третата изборна единица од митингот во Кратово во рамките на предизборната кампања за парламентарни и претседателски избори.
Ковачки истакна дека иселувањето има земено загрижувачки размери, огромен дел од младите размислуваат за селење во странство и скоро да нема фамилија што нема свои блиски раселени по белиот свет, при што запраша каде се сега СДС да оставаат чевли пред Влада, како симбол за сите наши што се иселија.
„Устата им е полна со Европската Унија“, рече Ковачки и додаде, „ама во Европската Унија заминаа само тие што се иселија, сите останати сме тука во татковината, грчевито се бориме на парчето земја кое го населувале нашите татковци, дедовци и прадедовци и сакаме тука да останеме, да живееме нормално и да бидеме во друштво со европските народи“.
Ковачки посочи дека за тоа да се реализира треба работа, многу работа, многу напредок и љубов за сопствената земја за што ВМРО-ДПМНЕ како во минатото, така и во иднина ќе работи за интересите на сите граѓани и на граѓаните од Кратово.
Пред присутните на народниот собир во Кратово, Ковачки наброја дел од проектите предвидени во предизборната програма „Платформа 1198“ кои ќе бидат реализирани во градот во наредниот четири годишен мандат.
„Во рамките на третата фаза од проектот „Злетовица“ – Предвидуваме изградба на шест мали хидроцентрали меѓу кои и две хидроцентрали со цевководи за водоснабдување на општините Пробиштип и на Кратово;
Предвидуваме заживување на проектот „Плавица“ и отворање на Рудникот за бакар, злато и сребро;
Изградба на дом за стари лица во Кратово;
Реконструкција на детска градинка Царка Андреевска;
Реконструкција на градска сала;
Регулација на речно корито и изградба на колекторски систем за уредување на дел од Манцева река и дел од Кратовска река;
Реконструкција на патиштата до селата Близанци, Куново, Мушково и Нежилово до Каврак;
Изградба на мала пречистителна станица во село Приковци;
Реконструкција на зградата на поранешна Кристалограверница и многу други проекти кои што планираме да ги реализираме во Кратово“, рече Ковачки.