Европа
(Видео) Илјадници Французи излегоа на улиците поради убиството на наставникот
Илјадници луѓе излегоа на улиците на Франција во знак на поддршка на наставниците и со цел да ја одбранат слободата на изразување по убиството на наставник по историја. Од Париз до Лион, Марсеј и Лил, луѓето се собираа во тишина, оддаваа почит со едноминутно молчење, а потоа ја пееја химната, пренесува Ројтерс
Францускиот премиер Жан Кастекс, министерот за образование Жан-Мишел Бланкер, како и други политичари присуствуваа на митинг на плоштадот во Париз во знак на солидарност по нападот.
„Не се плашиме. Нема да не разделите. Ние сме Франција”, рече Кастекс подоцна на Твитер.
Демонстрантите носеа заштитни маски поради пандемијата на коронавирус и транспаренти на кои пишуваше „Да учиме, не да крвариме“ и „Јас сум Шарли“, алудирајќи на сатиричното списание „Шарли ебдо“, кое беше мета на масакр пред пет години.
Vous ne nous faites pas peur.
Nous n’avons pas peur.
Vous ne nous diviserez pas.
Nous sommes la France ! pic.twitter.com/GjUQo9AePa— Jean Castex (@JeanCASTEX) October 18, 2020
„Тука сме да ја браниме Република, вредностите на Републиката: слобода, еднаквост, братство и секуларизам“, рече еден од учесниците на протестот во Париз, Пјер Фурние.
Од собирите беше речено дека наставниците биле скршени, но дека тоа нема да ги заплаши, објави Гардијан.
„Страшно е што во Франција во 21 век, наставникот може да биде обезглавен на улица затоа што ја врши својата работа. Ние ќе продолжиме да зборуваме за слободата на говорот и да ги охрабруваме учениците и да им објаснуваме дека секој има право да не се согласува со други мислења”, рече претседателот на синдикатот.
Учесниците на протестот повикаа на национално единство и солидарност.
Citoyens libres d’une République une, indivisible et solidaire. pic.twitter.com/10eQ67rWh5
— Jean Castex (@JeanCASTEX) October 18, 2020
Демонстрациите беа најавени во време кога француските власти објавија дека уапсиле десетто лице по ужасниот инцидент. Обвинителот објави дека е поведена истрага поради убиството со сомневање за терористички мотив. Последните четири уапсени лица се членови на семејството на напаѓачот, кому во март му беше дадена десетгодишна дозвола за престој во Франција како бегалец. Неговата полусестра се приклучила на Исламската држава во Сирија во 2014 година, но обвинителот не го откри нејзиниот идентитет ниту каде се наоѓа сега.
Тој рече дека во телефонот на осомничениот е пронајден текст во кој тој ја презема одговорноста за нападот, како и фотографија од жртвата. Откриен е и неговиот профил на Твитер, како и фактот дека на оваа социјална мрежа објавил фотографија со отсечена глава неколку минути по нападот, со порака дека го погубил човекот затоа што се осмелил да го понижи Мухамед.
Наставникот Самуел Пати беше убиен во селото Конфлан Сен-Онорин, предградие северозападно од Париз. Пати беше наставник на средно училиште, кој на децата им покажувал карикатури на пророкот Мухамед.
Полицијата го забележала осомничениот напаѓач додека носел нож на кратко растојание од местото на нападот и пукала во него. Извор од полицијата рече дека сведоците слушнале како напаѓачот извикува „Алаху Акбар“ или „Бог е голем“. Портпарол на полицијата изјави дека информациите се проверуваат.
Осомничениот, по потекло од Чеченија, е роден во Москва и имал 18 години, пренесоа француските медиуми.
Франција им понуди азил на многу Чеченци од почетокот на конфронтацијата на Русија со исламистичките сепаратисти во Чеченија во 90-тите и раните 2000-ти, а во Франција има чеченски заедници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
(Аудио) Кралот Чарлс ја испрати првата јавна порака по дијагнозата на здравјето на Кејт
Порака од кралот Чарлс беше емитувана денеска по повод годишната служба на Величетврток.
Аудиообраќањето на Чарлс беше емитувано на собранието во катедралата „Ворчестер“ во негово отсуство поради тековното лекување на ракот на монархот.
Тој им порача на сите „да ја подадат раката на пријателството“.
„Актот на богослужба, овде во катедралата ‘Ворчестер’, ме потсетува на заклетвата што ја дадов на почетокот на моето крунисување да го следам примерот на Христос ‘да не ми служат, туку да служам’“, рече кралот.
„Тоа е она што секогаш се трудев да го правам и правам со целото мое срце“, додаде тој.
Кралот дојде на тронот пред 18 месеци, а на почетокот на годината му беше дијагностициран рак поради што беше подложен на хемотерапија.
Европа
Заменик-началникот на генералштабот: Британија може да се бори со Русија само 2 месеца
Британските вооружени сили мора да управуваат со оперативниот ризик, што произлегува од недостигот на ресурси што би сакале да ги имаат во идните војни, пишува „Телеграф“.
Информациите се појавија откако Грант Шапс, министерот за одбрана, им рече на пратениците дека лобирал кај премиерот, Риши Сунак, и министерот за економија и финансии, Џереми Хант, повеќе пари во буџетот да се потрошат за одбраната, но не успеал да обезбеди зголемување.
За време на сослушувањето пред пратениците во Комитетот за одбрана на долниот дом, висок офицер на кралските маринци рече: „Ние бевме многу јасни дека сумата што моментно ја трошиме за муниција не ги покрива трошоците во сите области и заканите со кои се соочуваме“.
„Бевме јасни дека треба да потрошиме повеќе пари над буџетот, на она што го нарекуваме интегрирани противвоздушни ракети“.
На прашањето на Марк Франсоа, поранешен министер за вооружени сили, дали е вистина оти Обединетото Кралство „не може да се бори со Владимир Путин повеќе од неколку месеци во целосна воена ситуација поради недостиог на резерви муниција и опрема, Шапс додаде дека секој таков конфликт ќе се води заедно со сојузниците од НАТО, кои заедно би можеле да ја совладаат Русија, наместо само Велика Британија.
„За луѓето што гледаат и слушаат дека Велика Британија не е подготвена за војна исклучиво со Русија, важно е да разберат дека сме во НАТО и постои меѓусојузнички одбранбен договор Член 5, така што никогаш не би биле во таква ситуација“.
Во еден извештај пратениците рекоа дека на вооружените сили им требаат повеќе средства за „учество во операции додека развиваат воена готовност“ или ќе мора да го намалат „оперативниот товар“ на војската.
Поранешните воени началници на комитетот му кажаа дека вооружените сили се ослабени од 2010 година и дека „во конфликт со еднаков противник тие ќе бидат исцрпени по првите неколку месеци од распоредувањето“.
Шапс исто така им рече на пратениците дека лекциите научени од војната во Украина ја покажале важноста на војната со беспилотни летала бидејќи е смртоносна и евтина.
„Ова во Украина е веројатно првата вистинска војна со беспилотни летала и мислам дека никогаш повторно нема да видиме војна која не вклучува тешка употреба на беспилотни летала“, рече тој.
Минатиот месец Обединетото Кралство објави дека, заедно со Латвија, ќе ја предводи новата коалиција за испорака на илјадници беспилотни летала „камикаѕе“ во Украина во услови на растечки недостиг на муниција на фронтот.
„Дроновите ги нарушуваат нормалните факти за војната. Обично секоја генерација станува поскапа за да има смртоносен ефект, но всушност беспилотните летала, кои понекогаш чинат неколку илјади фунти, може да бидат крајно смртоносни“, рече Шапс.
Сепак, тој предупреди дека „основното војување и муницијата“ остануваат важни во секој иден конфликт.
Европа
Кремљ за евентуалното блокирање на „Телеграм“: „Сè повеќе станува алатка во рацете на терористите“
Портпаролот на Кремљ, Дмитриј Песков, денеска изјави дека во моментот не се планира блокирање на социјалната мрежа „Телеграм“ во Русија.
„Не, во моментот нема такви планови“, изјави Песков за каналот „Шот“ на прашањето дали Русија планира да го блокира „Телеграм“.
Тој додаде дека основачот на оваа платформа, Павел Дуров, треба повеќе да внимава како се користи оваа социјална мрежа.
„Секако, би очекувале поголемо внимание од Павел Дуров бидејќи овој уникатен и феноменален ресурс од технолошки аспект, кој порасна, всушност, пред очите на нашата генерација сè повеќе станува алатка во рацете на терористите, се користи за терористички цели“, рече портпаролот на Кремљ, пренесува „РИА новости“.
Како што изјави во средата за „РИА новости“ извор запознаен со ситуацијата, сторителите на терористичкиот напад во предградието на Москва биле регрутирани преку каналот на „Телеграм“, „Глас Хорасан“, сопственост на авганистанското крило на Исламската држава.
Пратеникот на државната Дума од Обединета Русија, Олег Морозов, денеска оцени дека е неопходно да се развие механизам за автоматско блокирање на каналите на „Телеграм“, кои регрутираат терористи користејќи клучни зборови користејќи вештачка интелигенција.