Македонија
Јанакиески до судот: Дали треба да се најде жртвено јагне за да ја понесе одговорноста за постапките на Груевски?
„Ниту сум прифатил, ниту сум дал насоки, ниту сум поттикнувал“, вели обвинетиот ексминистер Миле Јанакиески во завршните зборови на рочиштето за „Насилство во Центар“. Тој смета дека обвинението отсликува толкуван разговор од објавените „бомби“ и дека истото е креирано според исказот на осудениот сведок Томислав Лазаров. Во однос на доказите, Јанакиески тврди дека обвинителите не доставиле ништо со кое ќе потврдат дека ги сторил делата за кои го гонат. Тој во завршните зборови, обраќајќи му се на судијата, посочи дека очекува ослободителна пресуда, бидејќи, според него, на тоа укажуваат доказите кои се изведени.
„Ако добро се анализира старото и новото обвинение ќе видите дека истото е адаптирано на исказот на осудениот Томислав Лазаров, па сè што и се ставаше на товар на претходно обвинетата Даниела Рангелова е директно префрлено кај мене. Во неколкуте материјални докази кои беа презентирани пред судот, кои се однесуваат на овој кривичноправен настан, воопшто ме нема. Моето име не е спомнато и во ниеден исказ на сведок, ниту обвинет во насока на какво било дејствие од моја страна, дека јас сум го поттикнал некого да изврши кривично дело насилство. Денес се судам за шлаканици кои не се случија. Даниела Рангелова се ослободи, осудениот Томислав Лазаров се договори, Никола Груевски замина и остана Миле да биде огласен за виновен за некој да може да поентира од овој случај“, вели Јанакиески, според кого за случајот ќе одговара само тој бидејќи Груевски е помилуван, а на Кирил Божиновски му е застарено делото.
Во новото обвинение, Обвинителството тврди дека толпата станувала агресивна откако осудениот сведок Томислав Лазаров ќе испрател порака до Јанакиески, а обвинетиот реагираше на ваквото тврдење.
„Обвинетите потврдија пред овој суд дека ниту сме се познавале, ниту, пак, сум им давал некакви насоки или сум ги поттикнувал на дејствијата за кои се гонат со обвинителниот предлог. И замислете ја тука ситуацијата надвор пред салата има 2 до 3.000 лица, Томислав ми испраќа порака и потоа јас со волшебно стапче само во рок од 5 минути ги хипнотизирам тие 3.000 луѓе и тие веднаш почнуваат погласно да протестираат. Тука сакам да истакнам дека како што Даниела реално не можела со телефон во рака да контролира маса луѓе, не сум го можел, ниту јас преку пораки во рок од 5 минути да воспоставам контрола на 2 до 3.000 луѓе, а уште помалку на со обвинетите кои ниту ги познавав, ниту имав контакт со нив. Но, не е дозволиво и е надвор од разумно сè она што беше избришано кај Даниела од обвинителниот предлог да се става на мој товар преку изјава на Томислав Лазаров“, рече Јанакиески во завршните зборови.
Тој на рочиштето го праша судот дали треба да се најде жртвено јагне за да ја понесе одговорноста за постапките на Груевски, по што додаде дека е свесен какво влијание имале аудиоснимките кај јавноста, која го осудила уште при нивното објавување.
„Откако Груевски не е во Македонија, притисокот за понесување одговорност е врз мене. И затоа се водат осум постапки пред судот. Разбирам дека некој мора да биде осуден за да има привидно чувство дека правдата некого стасала, но она што не го разбирам е за каква правда зборуваме во мојов случај? Ако судот ја базира својата пресуда за мене врз основа на тоа што го изговорува Груевски во разговорот со мене, тогаш ќе направи враќање кон еден напуштен правен систем кога вербалниот деликт, односно кажаниот збор, доколку не ѝ се допаѓаше на државата да претставува кривично дело. Но, во мојот случај, тоа би било едно сосема ново ниво на кривична одговорност, односно ќе треба јас да одговарам кривично за искажан збор од друго лице“, вели Јанакиески.
Ако добие затворска казна, обвинетиот Миле Јанакиески смета дека ќе биде изречена без докази, а нема да донесе ниту правда, туку поголема неправда.
„Во јавноста веќе се лицитира со бројка за ефективна затворска казна, бидејќи по звучност на име некој пред јавноста треба да биде прогласен за виновен дури и без ниеден доказ. Судија, очекувам исклучиво да ја исполните обврската и заклетвата која ја имате дадено и да донесете праведна одлука со ослободителна пресуда за мене, како што впрочем и сите факти и докази недвосмислено покажуваат“, посочи Јанакиески обраќајќи му се на судот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Сервисни информации
Променливо облачно со повремени врнежи од дожд, а на планините со повремен снег
Времето денеска ќе биде, променливо облачно со повремени врнежи од дожд, а на планините со повремен снег.
Локално, врнежите ќе бидат поројни, проследени со појава на ретки грмежи. Ќе дува слаб до умерен ветер од северозападен правец. Минималната температура ќе биде во интервал од 5 до 10, а максималната ќе достигне од 11 до 18 степени.
Во Скопје променливо облачно со повремени врнежи од дожд. Кон крајот на денот врнежите ќе престанат. Ќе дува слаб до умерен ветер од северен правец. Минималната температура ќе се спушти до 8, а максималната ќе достигне до 15 степени.
Од петок следува период на претежно стабилно и потопло време со пораст на температурите на воздухот.
Скопје
Осум скопски општини денеска без струја
Според добиеното известување од ЕВН Македонија АД, Регионалниот центар за управување со кризи-Град Скопје, информира дека, поради планирани технички зафати во електро дистрибутивната мрежа, денеска без електрична енергија ќе останат неколку скопски општини.
· Во периодот од 08:30 до 14:00 часот, дел од корисниците на ул.Максим Горки, реон Дом на градежници (општина Центар).
· Во периодот од 09:00 до 14:00 часот, поголемиот дел од потрошувачите на ул.Ринхини.(општина Ѓорче Петров)
· Во периодот од 09:00 до 10:30 часот, корисниците од с.Визбегово, дел од с.Мирковци, Бразда, Глуво, Чардак, Оризари.(општините Бутел, Шуто Оризари и Чучер Сандево)
· Во периодот од 09:00 до 15:00 часот, корисниците од ул.Кавалска.(општина Кисела Вода)
· Во периодот од 09:00 до 12:00 часот, корисниците на пат за Долно Лисиче, од Кодакопласт, кон Паци Петрол до реката, од Св.Петар и Павле по патот кон Долно Лисиче.(Аеродром)
· Во периодот од 09:00 до 10:00 часот, корисниците од дел од ул. 4031, село Марино.(општина Илинден)
· Во периодот од 09:00 до 13:00 часот, корисниците на дел од бул.Борис Трајковски (од Техноскоп до кружниот тек пред Драчево).(општина Кисела Вода)
· Во периодот од 10:30 до 12:00 часот, корисниците од с.Сандево, Бањане, Горњане, Дел од с.Мирковци.(општина Чучер Сандево)
· Во периодот од 13:00 до 15:00 часот, дел од корисниците на ул. Исаија Мажовски и Воин Драшкоци.(општина Ѓорче Петров)
Македонија
Димитриевски до Пендаровски: Разликата е огромна, откажете се од оваа битка и оставете нè да победиме во вториот круг
Денеска ЗНАМ заедно со сите свои пддржувачи ја испишува новата политичка историја на македонската политичка сцена, рече вечерва претседателскиот кандидат на ЗНАМ, Максим Димитриевски. Иако е јасно дека не влегува во вториот круг, Димитриевски првиот круг од изборите го смета за голем успех.
„Можам да потврдам дека се роди третата политичка сила во македонскиот политички блок во државата која што имаме намера во следниот период дополнително да ја потврдиме и надградиме, со цел еден ден граѓаните да имаат можност да изберат нешто ново“, рече Димитриевски.
На противкандидатите им честиташе за успехот и се заблагодари на можноста да води кампања за која рече дека не била еднаква за сите оти законот кој е во сила не дава еднаква можност за медиумско претставување на сите партии.
Рече дека е горд на секој глас што го добиле како партија регистрирана пред само три месеци.
„Факт е дека јас како кандидат и ЗНАМ освоивме повеќе од 80.000 гласови. Регистриравме субјект кој постои нешто повеќе од три месеци и со граѓанската поддршка се етаблираше на трето место во политичкиот блок. Сметам дека тоа е одличен појдовен резултат за понатамошна борба. Јас не се сеќавам дека во историјата на плурална Македонија имало вакви примери, да имате партија со некаде три и пол илјади членови, а да освоите над 80.000 гласови. Искрено сум горд на секој тој еден глас што дојде, како поддршка за мене и ЗНАМ. И покрај тоа што трендовите се тие, десницата добива, а левицата губи, единствено десницата доживеа пораз во бастионот на асномска Македонија, а тоа е Куманово“, рече Димитриевски.
Порача на сите политичари дека треба да учат од овие избори оти граѓаните дале јасна насока каде сакаат да се движи државата, а посебна порака упати до Стево Пендаровски, кој освои повеќе 100.000 гласови помалку од Гордана Сиљановска-Давкова.
„Почитуван мој претседателе, разликата е огромна. Доколку сакате да опстане централната и левата идеја во државата, откажете се од оваа битка и оставете не да победиме во име на граѓаните во вториот круг“, порача Димитриевски.
Кога ќе завршат парламентарните избори, Димитриевски е уверен дека ЗНАМ ќе биде политички фактор за стабилност во државата без кој нема да може да се формира идната влада. Најави дека кога ќе ги почнат преговорите за формирање парламентарно мнозинство, на сите политички партии ќе им ги испорачаат нивните предлози за црвените линии на македонскиот народ.