(Видео) Крмов: Реконструкцијата на Владата е пазар за фотелји и подготовка за предвремени избори

Пратеникот од Левица, Борислав Крмов, во обраќањето на денешната собраниска седница за реконструкција на Владата оцени дека не станува збор за суштински кадровски промени, туку за политички пазар и подготовка за предвремени парламентарни избори. Според него, реконструкцијата не е насочена кон подобрување на работата на институциите, туку кон прераспределба на функциите и коалициски калкулации.

„Целиот процес најдобро може да се опише со еден збор – пазар. Зборуваме за највулгарен политички пазар, кој е увертира и подготовка за предвремени избори.“

Крмов посочи дека Владата денес разрешува министри и заменици-министри, но именува само министри, што, според него, покажува дека пазарот за заменичките функции сè уште не е завршен.

„Кај нас заменик-министер е практично на ниво на министер – има кабинет, секретар, тим, службено возило и шофер. Тие позиции се една од главните парички за поткусурување во внатрешните пазари на владејачките коалиции, а цената за тоа не ја плаќаат политичарите, туку македонскиот народ.“

Осврнувајќи се на смената на министерот за земјоделство, Крмов потсети дека владејачкото мнозинство неодамна го бранеше за време на интерпелацијата, претставувајќи го како успешен министер.

„Ако навистина постигнал толку резултати и вовел ред во земјоделието, тогаш зошто денес го менувате? Зборуваме за министер за време на чиј мандат земјоделството практично е во колапс – со десетици милиони евра неисплатени и скратени субвенции, како и криза со млекото, оризот, пченката и јачменот.“

Според Крмов, Министерството за земјоделство станало „жежок компир“ што коалициските партнери си го префрлаат меѓусебно.

„Очигледно власта нема пари за земјоделците и планира Министерството за земјоделство да го пушти низ вода. Тоа покажува дека реконструкцијата не е кадровска политика за подобри резултати, туку чисто политичка реконструкција.“

Во однос на распределбата на ресорите, Крмов оцени дека ЗНАМ излегува ослабена од реконструкцијата, додека ВЛЕН добива значително посилна позиција.

„ЗНАМ капитулираше околу Министерството за правда. Предупредувавме дека тоа е краткорочен политички проект кој ќе стане вагон-партија на ВМРО-ДПМНЕ.“

За доделувањето на Министерството за правда на ВЛЕН, Крмов рече дека станува збор за политичка калкулација поврзана со актуелните дебати за правосудниот испит.

„На олтарот на политичките калкулации се става македонското правосудство. Ако прифатиме правосудниот испит да се полага на албански јазик, тогаш де факто влегуваме во процес во кој и македонското правосудство на долг рок ќе биде двојазично.“

Говорејќи за причините за реконструкцијата, Крмов истакна дека Владата, и покрај стабилното парламентарно мнозинство, веќе се подготвува за предвремени избори.

„Во третата година од владеењето очекувањата на граѓаните за резултати драстично растат. Тогаш повеќе не поминува оправдувањето дека за сè е виновна претходната власт. Затоа очекувам токму тогаш да бидат распишани предвремени избори.“

Според него, оваа тактика не е нова и претставува обид повторно да се создаде впечаток за „нов почеток“.

„Тоа е стратегија што ја гледавме и порано – на секои две или две и пол години нов изборен циклус, нова влада и нов почеток, иако продолжува истата политика.“

На крајот од своето обраќање, Крмов порача дека по следните предвремени парламентарни избори политичката сцена ќе изгледа поинаку.

„Единственото навистина ново што ќе се случи по предвремените парламентарни избори во 2027 година е тоа што главен ривал на ВМРО-ДПМНЕ за власта ќе биде Левица.“