САД протераа 35 руски дипломати и затворија две руски згради во Њујорк и во Мериленд, оправдувајќи го тоа со наводен притисок врз американските дипломати во Москва, изјави во четвртокот вечерта неименуван висок американски функционер.

Одлуката е насочена против дипломатите во руската амбасада во Вашингтон и во конзулатот во Сан Франциско, како одговор на руската кампања на застрашување на американските дипломати во Москва и вмешувањето на Русија во американските претседателски избори, рекол анонимниот извор на Reuters.

Администрацијата на американскиот претседател Барак Обама, чијашто кандидатка Хилари Клинтон од Демократската партија беше поразена на 8-ми ноември од републиканскиот кандидат Доналд Трамп, најавила и низа мерки против Русија. Тоа е одговор на наводните руски хакирања на американските политички институции, односно на поразената Демократска партија и нејзини поединци, и на наводно истекување на информации за да им се помогнело на Трамп и на другите републикански кандидати, рекле за агенцијата двајца американски функционери.

Трамп, кој ја презема должноста на 20-ти јануари, се зазема за подобрување на односите со Русија. Тој претходно седмицава го обвини Обама за намерно предизвикување заострување на односите и со традиционалниот американски блискоисточен сојузник Израел, откако САД првпат од 1979 година не вложија вето во Советот за безбедност на ОН за резолуција насочена против еврејската држава. Засега не е познато дали тој ќе ги поништи овие мерки.

На руските дипломати им е даден рок од 72 часа да ги напуштат САД, рекол американскиот функционер. Тој одбил да ги именува дипломатите на кои се однесува мерката, но рекол дека амбасадорот Сергеј Кислјак нема да биде протеран.

Пристапот кон двата комплекси згради кои руските службеници кои користат за разузнавачки состаноци, според билатералниот договор во однос на трети страни или земји, ќе им биде ускратен на сите руски службеници од петокот на пладне, додале соговорниците на Reuters.

„Тие мерки се преземени како одговор на руските притисоци на американските дипломати и дејствувањето на дипломатите за кои оценивме дека не се во согласност со дипломатската практика“, изјавил функционерот.

„Се надеваме дека по наметнувањето на трошоците за руските дипломати во САД и скратувањето на пристапот на двете локации, руската влада ќе ги преиуспита своите постапки , кои го отежнуваат дејствувањето и ја загрозија безбедноста на нашата амбасада во Русија“, изјавил американскиот функционер без да прецизира.

Руските медиуми дознаваат дека под американските санкции се и руските безбедносни служби Федералната служба за безбедност (ФСБ) и воената Генерална управа за разузнавање (ГРУ), пишува агенцијата ТАСС, повикувајќи се на министерството за финансии на САД кое дејствувало по указ на претседателот Обама.

Покрај овие служби, под санкции се и компаниите „Специјален технолошки центар“ во Санкт Петербург и „Професионалната асоцијација на дизајнери а обработка на податоци“ и „ЦОР Секјурит“ во Москва.

Покрај тоа на „црната листа“ на САД се и шест физички лица, кои ТАСС ги именува, а кои наводно според американската администрација биле службеници на ГРУ, како и за едно лице кое има и руски и латвиско државјанство./крај/мф/сн