Daily news
ВМРО-ДПМНЕ му порача на СДСМ да не се правда со неа за договорениот двонеделен одмор на пратениците
По објавата дека народните избраници се договориле да се појават на работа на 9 јануари, по Божик, со коментар на социјалните мрежи се јави пратеничката на НСДП, Соња Мираковска, која е дел од коалицијата на СДСМ.
„Тоа е така затоа што опозицијата вети дека ќе се врати на 9 јануари во Собранието“, напиша Мираковска.
Од опозициската ВМРО-ДПМНЕ за „Макфакс“ велат дека сè уште се на ставот за конструктивен однос и дека местото им е во парламентот, но дека од партијата сè уште нема конечна одлука кога ќе се вратат во Собранието. Од таму додаваат дека доколку СДСМ се правда со опозицијата за да почне со работа во Собранието, тогаш можеле да одмораат и пред празниците со истото образложение.
„Нашиот став е познат, ние порачавме дека парламентарното мнозинство е тоа што треба да обезбеди услови за работа во Собранието. Власта ја има таа одговорност, а ВМРО-ДПМНЕ не кажала дека не е за конструктивност, но треба да има доверба од двете страни“, велат од ВМРО-ДПМНЕ.
Од пратеничката група на СДСМ велат дека претседателот на Собранието одлуката за продолжен одмор ја донел по претходна координација со пратеничките групи со цел да ѝ се даде можност на опозицијата да се врати во Собранието.
„Договорот е донесен врз основа на меѓусебни договори, координации и средби на неколку нивоа помеѓу коалиционите партнери, власта и опозицијата“, рече пратеникот и координатор на пратеничката група на СДСМ, Томислав Тунтев. Но, Тунтев не одговори на прашањето дали на координацијата станало збор за тоа дека овие две недели ќе им се сметаат како платен двонеделен одмор или ќе земат помала плата.
Инаку, на заедничката координација се договориле од наредната недела да почнат со работа кога се очекува да бидат закажани две расправи на собраниски комисии.
Засега единствена закажана седница на официјалната веб-страница на Собранието е на Комисијата за европски прашања на 15 јануари кога пред пратениците ќе бидат претставени програмата и приоритетите за работата на бугарското претседателство со Советот на Европската Унија за периодот јануари – јуни 2018 година.
Нема да одат на работа, но ќе си примат цела плата за јануари
По објавувањето на веста за двонеделниот одмор на пратениците, во јавноста преку коментари на социјалните мрежи се отвори токму прашањето дали пратениците ќе земат цела плата за јануари. Собраниски извори за „Макфакс“ информираат дека пратениците ќе примат цела плата и дека тоа им го дозволува законот.
„Нивната работа е да бидат во Собранието, но само тогаш кога ќе има извештај, нацрт-закон, седница или слично. Засега таква активност нема, па затоа не се во парламентот“, брифира нашиот извор.
Досега не се случило на пратениците да им биде скратено правото на плата. Кога СДСМ 15 месеци го бојкотира Собранието редовно примаше плата, а тоа се случи и минатата година кога Собранието беше запрено два месеца поради одложувањето на конститутивната седница.
Инаку, платата на пратениците е три и полпати поголема од просечната исплатена во Република Македонија. Платата на пратеник во просек, според статистиката, изнесува 1.335 евра месечно.
Г.Д.М.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.