Uncategorized
Пратениците треба да поднесат анкетен лист и изјава за судир на интереси до ДКСК
Новоизбраните пратеници и оние на кои им престана мандатот, до 30-ти јануари треба да поднесат анкетни листови и изјава за судир на интереси до Државната комисија за спречување на корупцијата.
„Согласно законот за спречување на корупција, сите избрани и именувани лица во рок од 30 дена од нивното назначување, во конкретниов случај за пратениците на коишто им престана мандатот и на оние коишто им почна новиот мандат од денот на нивното назначување, односно изборот, имаат обврска да поднесат Анкетни листови и изјава за судир на интереси до Државната комисија за пречување на корупцијата за да го обелоденат имотот со она што располагаат“, рече Игор Тантуровски, претседател на ДКСК.
Тој во моментот немаше информација дали нешто е пристигнато, поради празничниот период.
„Досега можам да кажам дека можеби и сто отсто пратениците се придржуваат кон законските одредби и го пријавуваат својот имот до ДКСК. Очекувам дека и сега ќе се случи истото. И на оние, на коишто им престана мандатот ќе поднесат Анкетни листови за престанок на функцијата. Доколку не се поднесат, согласно законот, предвидени се и законски санкции, но се надеваме дека до тоа нема да дојде“, рече Тантуровски.
Пратеникот е должен најдоцна во рок од 30 дена од верификацијата на мандатот да пополни анкетен лист со детален попис на недвижен имот, подвижни предмети од поголема вредност, хартии од вредност и побарувања и долгови, како и друг имот што е во негова сопственост, или сопственост на членовите на неговото семејство, со наведување на основот на стекнување на пријавениот имот и депонира заверена изјава од нотар за откажување од заштита на банкарска тајна во однос на сите сметки во домашни и странски банки.
Пратеникот, исто така, е должен да пополни анкетен лист во рок од 30 дена по престанокот на мандатот.
Доколку пратеникот во рок од 30 дена по престанокот на мандатот биде избран или именуван на иста или на друга функција, должен е да ја извести Државната комисија за спречување на корупцијата за новиот избор или именување.
Податоците од анкетните листови на пратениците, според Законот, претставуваат информации од јавен карактер освен податоците заштитени со закон и се објавуваат согласно со закон./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Uncategorized
Москва: Бројот на повредени во нападот во „Крокус сити хол“ се зголеми на 360 лица
Бројот на повредени во нападот на концертната сала „Крокус сити хол“ се искачи на 360, соопшти денеска медицинската служба.
„Со податоците од утринава, во терористичкиот напад се повредени 360 лица, меѓу кои 11 деца“, се наведува во соопштението што го пренесува „Тас“.
Вкупно 92 лица повредени во нападот се хоспитализирани, 63 веќе се отпуштени од болниците, а 205 се на амбулантско лекување, додаде здравствениот претставник.
Исламската држава ја презеде одговорноста за терористичкиот напад во петокот вечерта во „Крокус сити хол“, во предградието на Москва, во кој загинаа најмалку 139 лица.
За нападот се уапсени 11 осомничени, меѓу кои и четворица вооружени напаѓачи, кои биле приведени во областа Брјанск, југозападно од Москва, додека се обидувале, како што тврдат руските власти, да побараат засолниште преминувајќи ја блиската украинска граница, пренесува „Танјуг“.
Uncategorized
Уапсена 60-годишна скопјанка: нападнала 33-годишен маж, а подоцна и полицаец
Синоќа, во 23.20 часот, полициски службеници од ОВР Кичево ја лишиле од слобода В. Ј. (60) од Скопје.
Таа, претходно, на улицата Трајче Стрезоски во Кичево, физички го нападнала Ф. С. (33) од Скопје и ја оштетила неговата службена опрема, а потоа во службените простории на ОВР Кичево, каде што била повикана на разговор, физички го нападнала полицискиот службеник и го уништила изготвениот службен материјал.
По целосно документирање на настанот, против неа ќе биде поднесена соодветна пријава.
Uncategorized
Повреден мотоциклист од Пехчево, пренесен во комплексот клиники во Скопје
Вчера во 18.05 часот во Полициското одделение Пехчево било пријавено дека на место викано „Елата“ во атар на Пехчево, 31-годишниот Д.Ц. од Пехчево, управувајќи мотоцикл, паднал на патот, извести МВР.
„Во несреќата, со повреди се здобил мотоциклистот и бил пренесен во Комплекс клиники „Мајка Тереза“ за укажување лекарска помош“, соопшти МВР.
Извршен бил увид.