Македонија
Армијата доби нова опрема за атомска, биолошка и за хемиска одбрана
Работиме со полна пареа и капацитетите на Армијата за заштита од специфични закани по безбедноста на државата се развиваат континуирано, рече денеска министерката за одбрана, Радмила Шекеринска, која во касарната „Ѓорче Петров“ изврши увид во тукушто пристигнатата нова опрема за атомска, биолошка и за хемиска одбрана.
Шекеринска посочи дека оваа опрема е исклучително важна како дел од потребите на одбраната, опрема која е донација како дел од програмата „Три-три-три“ на Европската команда на вооружените сили на Соединетите Американски Држави за зајакнување на нашите одбранбени капацитети. Додаде дека ова е првата фаза од донацијата планирана за оваа година, а целосната донација ќе биде комплетирана во текот на 2020 година.
Опремата се состои од заштитни маски и костими, цедила за маски, заштита за нозете, заштитни чизми, боци за воздух за заштитните маски, мегафони за заштитните маски и компресори за воздух, а во рамките на донацијата од почетокот на идната година вклучена е и обука за сите припадници што ќе ја користат опремата.
Министерката Шекеринска рече дека Армијата и државата се подготвени за полноправно членство во алијансата, до кое нè делат само уште три ратификации, од кои две се очекуваат да завршат овој месец, и ратификацијата во Шпанија, која зависи од шпанскиот парламент имајќи предвид дека во таа земја во тек е предизборен период.
„Како Армија, како Министерство за одбрана и како држава покажавме дека сме партнери и идна членка на која алијансата може да смета. Ги следиме препораките за зголемување на издвојувањето за одбраната, ги менуваме законите за одбрана и за служба во Армијата, кои се во собраниска процедура, ги зголемивме не само платите туку и шансите за напредување и за тренинг на припадниците на Армијата и ги решаваме проблемите со кои се соочувале со години“, рече министерката. Потсети дека минатата недела ги посети просториите на нашата држава во седиштето на НАТО во Брисел, простории што ќе ѝ припаѓаат на државата, за кои што ќе имаме целосна одговорност, и изрази очекување подготовките да привршат во почетокот на следната година.
Шекеринска информира дека се прават исклучителни напори за војничката професија да биде уште поатрактивна за младите граѓани, со нова опрема, со голем број можности за обука и со зголемена финансиска инјекција кон Армијата.
„Позитивен беше знакот што минатата година успеавме да примиме речиси 400 нови млади војници, оваа година се надевам до крајот на годината бројката дополнително ќе се зголеми за 250. Вчера можевте да видите дека целосно го решивме прашањето на 97 професионални војници, кои оваа година наполниле 45 години и за сите обезбедивме добри и добро платени места“, истакна министерката и дополни дека тој процес е направен со ист пристап кон сите, без дискриминација, без проблеми и без политика.
Во НАТО, заклучи министерката, ќе влеземе како земја членка која се гордее на своето достигнување и на својот успех и додаде дека сите граѓани се нестрпливи да го видат нашето знаме пред седиштето на НАТО.
„Тоа ќе биде и наш влог во идните генерации, кои очекуваат да им обезбедиме сигурна иднина и да им обезбедиме шанса за повеќе просперитет“, рече Шекеринска.
Министерката изрази благодарност до претставниците на САД за донацијата и порача дека партнерството помеѓу Северна Македонија и САД е вистинско, долготрајно и една од причините зошто државата ќе биде дел од алијансата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Властите во Бугарија продолжија да негираат регистрација на етничко-македонски активистички групи“, се наведува во извештајот на Стејт департментот
Министерот за правда ги затвори бугарските културни клубови „Цар Борис Трети“ и „Иван (Ванчо) Михајлов“, повикувајќи се на законот од 2022 година, со кој се бара од организациите именувани по поддржувачи или соработници на фашизмот да ги променат своите имиња, се наведува во извештајот на Стејт департментот.
„Во февруари, по препорака на Комисијата за антидискриминација, обвинителството во Битола отвори прелиминарна истрага за клубот „Иван (Ванчо) Михајлов“ поради говор на омраза. Претседателот на клубот беше обвинет за поттикнување етничка и расна омраза и нетолеранција и ширење расизам и ксенофобија. Две лица се обвинети за нанесување тешки телесни повреди на Христијан Пендиков, кој се саморегистрирал како Бугарин, по национална и етничка основа на омраза“, се вели во извештајот.
Во однос на слобода на здружување во Бугарија, во извештајот се наведува дека Законот предвидува право на слобода на здружување и владата генерално го почитувала.
„Властите продолжија да негираат регистрација на етничко-македонски активистички групи како што се Обединета македонска организација-Илинден, Друштвото на угнетените Македонци во Бугарија-жртви на комунистичкиот терор, Здружението за заштита на основните индивидуални човекови права 2023 година и Македонскиот културен клуб „Никола Вапцаров“ и покрај бројните претходни одлуки на Европскиот суд за човекови права дека негирањето ја нарушува слободата на здружување на групите.
Во февруари, Окружниот суд во Пловдив ја потврди одлуката на Агенцијата за регистрација со која се одбива регистрацијата на Обединетата македонска организација Илинден-Пловдив со образложение дека целите на групата, вклучително и официјалното признавање на македонското етничко малцинство, биле насочени кон поделба на нацијата и ќе создадат услови за етнички конфликт. Во мај, Апелацискиот суд во Пловдив ја потврди одлуката на понискиот суд“, нотира извештајот.
Македонија
Недоверба кон судството, насилства кон ЛГБТ-и заедницата и поткопана слобода на изразување, забележа Стејт департментот во извештајот за човекови права во Македонија
Сериозна владина корупција, сериозни ограничувања на слободата на изразување и слободата на медиумите, насилство и закани за насилство насочени кон ЛГБТ-и заедницата се само дел од забелешките во извештајот на Стејт департментот за состојбата со човековите права во Северна Македонија во 2023 година.
Извештајот меѓудругото нотира значителни „одложувања во судењата кои вклучуваат сериозна корупција, при што само неколку беа завршени до септември, вклучително и оние против поранешни владини функционери. Уставот предвидува независно судство, но владата не секогаш ја почитувала судската независност и непристрасност, вели извештајот.
„Веродостојните извештаи за неоправдано судско несоодветно однесување, непотребен политички и деловен притисок врз судиите, непотизам, клиентелизам, долготрајна правда, несоодветно финансирање, отпор кон користење на законски задолжителна технологија и недоволен кадар, ја попречија судската ефикасност и влијаеше на довербата на јавноста во владеењето на правото“.
Анкетите покажале силна недоверба на јавноста кон судството.
„Унапредување под политичко влијание без заслуга или транспарентност се случи во судството и обвинителството. Во јануари, Судскиот совет утврди дека двајца судии на Апелациониот суд во Скопје свесно ги одложиле одлуките за да ги истуркаат обвинетите да го поминат рокот на застареност. На 26 април, Судскиот совет го разреши својот претседател, потег што критичарите тврдеа дека укажува на политичко мешање. Двајца членови поднесоа оставки од Судскиот совет како одговор, а неколку истакнати граѓански организации побараа целосна оставка на Советот“.
Слободата на изразување била поткопана од неефикасноста на правосудниот систем, недостатокот на транспарентност во однос на медиумското рекламирање од страна на државните институции, несоодветното однесување во име на јавните службеници во нивната интеракција со новинарите, притисокот врз новинарите кои истражуваат корупција, дезинформациите, говорот на омраза во онлајн и социјалните медиуми, и самоцензура.
Македонија
Одрони на неколку патни правци
ЦУК извести дека преку единствениот број за Итни повици Е-112 добиена е дојава за одрон на патот кај Калиманци, на регионалниот пат Македонска Каменица-Виница, 5 километри пред влезот на Македонска Каменица.
За настанатата состојба известени се ЈП за оддржување на регионалните и магистралните патни правец и екипите се излезени на терен за да го саниррат одронот, додаваат од ЦУК.
Исто така добиена е дојава за одрон на патен правец село Удово-Демир Капија.
„Точната локација е 2-3 километри после село Удово во правец спрема Демир Капија. За настанатата состојба известени се ЈП за оддржување на регионалните и магистралните патни правец и екипите се излезени на терен за да го санираат одронот“, соопшти ЦУК.