Новите сопственици на приватна зоолошка градина со тигри во Оклахома, прикажана во хит-документарецот Tiger King на „Нетфликс“, добија наредба да ѝ ги предадат на сојузната влада сите тигарчиња и нивните мајки.

Случајот е поднесен против Џеф и Лорен Лоу, сопственици на паркот со егзотични животни Greater Wynnewood. Тие се обвинети за кршење на Законот за загрозените видови и Законот за благосостојба на животните.

Џеф Лоу е поранешен деловен партнер на Џо Егзотик, ексцентричниот крал на тигри, кој беше главна sвезда на документарецот.

Егзотик, кому вистинско име му е Џозеф Малдонадо-Пасаж, во моментот издржува 22-годишна казна затвор за вмешаност во заговор за убивање и злоупотреба на животни.

Американската федерација на ТВ и радиоуметници (АФТРА) ќе одржи состанок на кој ќе решава за исклучување на американскиот претседател, Доналд Трамп, од своите редови.

Синдикатот САГ-АФТРА, кој обединува околу 160.000 актери, новинари и други медиумски професионалци, во соопштението вели дека свикал состанок на својот дисциплински комитет во врска со улогата на Трамп во насилниот упад на толпата во американскиот Капитол на 6 јануари.

„Доналд Трамп ги нападна вредностите што ова здружение ги смета за најсвето – демократијата, вистината, почитта кон нашите сограѓани од сите раси и вери и светоста на слободниот печат“, рече Габриел Картерис, претседателка на САГ-АФТРА.

„Рамна е линијата од неговото безобразно непочитување на вистината до нападите врз новинари извршени од неговите следбеници“, додаде таа во изјавата.

Трамп стана член на САГ од неговите појавувања во неколку холивудски филмови и ТВ-емисии почнувајќи од „Сам дома 2“ до „Сексот и градот“ во раните 90-ти.

Новата проширена верзија на „Лига на правдата“, во режија на Зак Снајдер, ќе биде игран филм, а не серија во четири епизоди, како што претходно беше најавено.

Режисерот ги потврди своите планови за новата таканаречена „снајдер кат“ верзија на ДС-филмот и откри дека ќе биде игран филм. Претходно беше објавено дека форматот на проектот на Снајдер ќе биде мини серија во 4 дела, секој дел во траење од 1 час.

Без оглед на форматот, ова е нешто што фановите со нетрпение го очекуваа уште од 2017 година по „Лига на правдата“ на Џос Ведон, коментираат медиумите.

Новиот филм на Снајдер треба да ја има својата премиера во март на „ХБО макс“.