Платформата „Јутјуб“ неодамна почна да објавува познати холивудски филмови, кои корисниците може да ги гледаат бесплатно.

Иако изборот на филмови за време на кои се емитуваат и реклами не е голем, меѓу нив може да се најдат холивудски класици, како „Роки“ и „Терминатор“, но и познати комедии како „Легално русокоса“.

Корисниците на најголемата интернет-платформа за дистрибуција на видеосодржини досега имаа можност да купат или да изнајмат филмови во дигитален формат преку Google Play Movies & TV, а филмовите набавени на овој начин се прикажуваа на јутјуб-каналот на корисникот доколку при нарачката пристапувал од ист кориснички налог.

Гледачите, сепак, бесплатно нема да може да ги следат најновите холивудски филмови, туку само постари познати хитови.

Новата услуга е достапна од крајот на октомври, засега само за корисниците во САД. Се очекува дека набргу ќе се прошири и на други земји во светот.

Идејата за контрола на предмети со користење на нашиот ум изгледа како сцена од научнофантастичен филм, но таа всушност и не е толку недостижна.

Во минатото сме виделе како со помош на мислите луѓето може да контролираат уреди, како што се инвалидските колички, поради што употребата на умот за контрола на телевизори и не изгледа толку невозможно. Всушност, за време на конференцијата на програмери на „Самсунг“ компанијата откри дека работи на софтвер што потенцијално ќе им овозможи на корисниците да ги контролираат своите телевизори со помош на мозокот.

Според „Самсунг“, работата на овој проект е почната пред три месеци во партнерство со Центарот во Швајцарија – EPFL, со идеја да им овозможи на оние со одредени пречки во развојот да ги контролираат своите уреди.

Според Ричард Чаваријага, научник во EPFL, кој исто така работи на проектот, станува збор за технологија која е сложена и интелигентна, односно токму каква што треба да биде со оглед дека е наменета за да се поврзе со луѓето.

Компанијата „Фејсбук“ соопшти дека прави напредок во откривањето говор на омраза, графичко насилство и други облици на кршење на правилата на социјалната мрежа, дури и пред корисниците да ги забележат и пријават ваквите содржини.

Во извештајот за спроведувањето на стандардите на компанијата, од „Фејсбук“ велат дека во периодот од април до септември двојно се зголемило проактивното откривање на говор на омраза во споредба со претходните шест месеци.

Исто така, се истакнува дека деактивирани се повеќе од 1,5 милијарда лажни наводи во изминатите шест месеци во споредба со 1,3 милијарда во претходното полугодие.

Повеќето лажни наводи биле финансиски мотивирани, а не поради дезинформации, објави агенцијата АП.

„Фејсбук“ има околу 2,3 милијарди корисници во светот.