Едно лице пронашло две многу вредни масла на платно, стари 350 години, во контејнери на паркинг во Германија.

„Сликите се пронајдени на постојка за одмор на патот А7, во близина на јужниот град Нирнберг“, објави германската полиција.

Човекот ги однел сликите во полицијата во Келн.

Првичните експертски проценки сугерираат дека и двете слики може да бидат оригинални.

Една од сликите може да биде „Портрет на момче“ од Самуел ван Хогстратен, холандски сликар од 17. век, кој бил ученик на Рембрант.

Втората е најверојатно „Автопортрет на уметник“ од италијанскиот сликар Пјетро Белоти од истиот век.

Властите сега се обидуваат да откријат како овие два дела завршиле во отпад.

Полицијата ги објави сликите на Интернет, прашувајќи: „Кој ги препознава овие слики и кој знае како завршиле во отпад?“

Во северозападна Кина е откриен нов вид на праисториски гигантски носорог, еден од најголемите цицачи што чекорел по Земјата, објавија научниците.

Видот чиј латински назив е Paraceratherium linxiaense живеел пред приближно 26,5 милиони години и тежел 21 тон, колку четири големи африкански слонови.

Со главата можел да достигне висина од седум метри и да јаде од дрвјата, што го прави повисок од жирафа.

Овие заклучоци се направени врз основа на фосили откриени во северната кинеска провинција Гансу.

Во студија објавена во четвртокот во списанието Communications Biology, истражувачите пишуваат дека анализата на фосилите, откриени во 2015 година, покажала дека тие припаѓаат на нов вид, различен од досега познатите џиновски носорози.

Целосно сочуваниот череп и вилица покажуваат сличност со денешниот тапир, е заклучокот на студијата предводена од Денг Тао од Палеонтолошкиот институт во Пекинг.

Новиот вид е поврзан со гигантските носорози кои некогаш живееле во Пакистан, што сугерира дека тие се движеле низ Централна Азија.

Носорозите слободно се движеле помеѓу северозападна Кина и индо-пакистанскиот потконтинент, што значи дека тибетската висорамнина во тоа време имала низински области, велат научниците.

„Тропските услови дозволиле огромниот носорог да се враќа на север во Централна Азија, што имплицира дека Тибет сè уште не бил високо плато“, вели Денг.

Пејачот и текстописец Ед Ширан го најави својот прв соло сингл во последниве четири години, насловен Bad Habits („Лоши навики“).

30-годишниот Британец од врвот на топлистит сподели дел од песната и го потврди нејзиното издавање на 25 јуни преку „Атлантик рекордс“.

Ова ќе биде првпат Ширан да издаде сингл во кој нема соработник од Happier, нумера oд албумот Divide од 2017 година.

„Работев во студио во последниве месеци и едвај чекам да ја слушнете Bad Habits,“ рече тој.

Ширан реши да се одмори од музиката откако во август ја пречека ќерката Лира Антарктика Сиборн Ширан.

Тој во јули 2019 година објави Проект соработки бр. 6, во кој учествуваа неколку колеги уметници меѓу кои Џастин Бибер, Камила Кабело и Тревис Скот.