Познатиот холивудски режисер Квентин Тарантино (56) и неговата сопруга Даниела Пик (35) го очекуваат своето прво дете, пишуваат американските таблоиди.

„Даниела и Квентин се многу среќни што може да потврдат дека го очекуваат своето прво дете“, изјави портпаролот на реномираниот режисер за списанието „Пипл“.

Веста дека славната двојка очекува принова дојде девет месеци по венчавката. Минатиот ноември Квентин и Даниела решија да стапат во брак по девет години врска. Тие организираа интимна еврејска церемонија во Лос Анџелес за семејството, најблиските пријатели и соработниците.

Шпанскиот актер, оскаровецот Хавиер Бардем (50), во говорот одржан во понеделникот во ОН ја пофали младата активистка Грета Тунберг, која се залага за заштита на климата нарекувајќи ја составен дел од општествените промени.

„Таа е промената“, рече Бардем.

Гласот на 16-годишната Швеѓанка е значаен во дискусиите за климатските промени токму поради нејзината возраст, знаење и посветеност, рече тој. Тунберг е инспирација за нејзината генерација затоа што, повикувајќи на протести, предупредува на опасностите од климатските промени, рече актерот.

Гласниот поборник за заштита на животната средина, Бардем, зборуваше во ООН како претставник на „Гринпис“, кој се залага за договорот за океаните да се дискутира во Обединетите нации.

Познатиот водител Лари Кинг (85), по 22 години брак, се разведува од својата седма сопруга, актерката Шон Кинг (59), пренесува „Пипл“. Сепак, како што тврдат странските медиуми, ова воопшто не е изненадување. Иако биле долго време заедно, нивните пријатели велат дека претпоставувале дека тоа ќе се случи.

Лари во еден период стравувал за своето здравје, а Шон наводно го изневерувала во 2016 година.

„Тој сфати дека не е среќен долго време. Тие се расправаа цело време, но Лари сакаше да ги заштити децата. Тие, всушност, се разделени десет години. Дури спијат и во одделни простории“, изјави пријател на Лари.

Лери и Шон се венчаа во 1997 година и имаат два сина, Шанси (20) и Канон (19). Во вторникот адвокатот потврди дека Лари ги предал документите за развод.