Пејачот Р Кели е обвинет за сексуална злоупотреба на жени и тинејџерки, објавија американските медиуми. Тој се товари со 10 точки од обвинението за тешки криминални сексуални малтретирања, особено деца.

Аренби-ѕвездата, чие вистинско име е Роберт Силвестер Кели, никогаш не бил осуден и претходно ги отфрлил сите наводи.

52-годишниот пејач се очекува да се појави пред судот во Чикаго, каде што живее, на 8 март.

Според американските медиуми што ги виделе судските досиеја, има четири наводни жртви, кои биле на возраст од 13 до 16 години во времето кога пријавиле напад од страна на пејачот.

Кели, чиј најпознат хит е песната „Верувам дека можам да летам“, се соочи со многубројни обвинувања за сексуална злоупотреба, непристојни фотографии на деца и други престапи.

Во 2017 година Кели ги негира тврдењата дека држи голем број млади жени во т.н. култ.

Работници што работеле на брана на реката Парну во Естонија мислеле дека спасуваат куче од замрзнатата река не знаејќи дека, всушност, во својот автомобил ставиле див волк, пренесе Би-би-си.

Кога пробиле пат низ мразот, тие го зеле замрзнатото животно и веднаш го однеле на ветеринар. Дури тогаш кај ветеринарот забележале дека се работи за волк, а не за куче.

Здружението за заштита на животните на Естонија соопшти дека волкот имал низок крвен притисок кога пристигнале кај ветеринарот, што ja објаснува неговата мирна и послушна природа кога луѓето го носеле во автомобилот за да го стоплат.

„Тој беше мирен, дури легна на моите нозе. Кога сакав да ги помрднам, за момент ја исправи главата“, рекол еден од спасувачите.

Според ветеринарите, се работи за локален млад волк, кој е на возраст од една година, познат меѓу ловците во регионот.

Американскиот актер Џаси Смолет, ѕвезда од серијата „Империја“, е уапсен откако полицијата утврдила дека тој исценирал расистички напад врз него за време на кој, наводно, речиси бил линчуван со поставување јамка околу вратот.

Смолет, кој е Афроамериканец, пред неколку недели во полицијата во Чикаго пријавил дека на улица бил претепан од двајца мажи и дека нападот бил расно мотивиран, но потоа се покажало дека актерот самиот ги ангажирал наводните напаѓачи и заедно го исценирале инцидентот – со цел да се зголеми неговиот актерски хонорар.

Агенцијата АП, повикувајќи се на лице запознаенo со ситуацијата, пренесува дека Смолет заработувал повеќе од 100 000 долари по епизода од популарната серија во продукција на „Фокс“.

„Гласот на Америка“  објави дека наводната жртва станала осомничен откако Смолет вчера наутро бил уапсен во Чикаго, под сомнение дека во полиција пријавил лажен напад.

„Смолет прво се обидел да привлече внимание со испраќање на лажно писмо, базирано на расни, хомофобични и политички навреди. Кога тоа не му успеало, тој платил 3.500 долари за лажирање напад“, рекол полицискиот службеник од Чикаго, Еди Џонсон.

Се наведува дека Смолет со недели тврдел дека среде улица го претепале двајца мажи кои истовремено го навредувале на расна основа и наводно му ставиле јамка околу вратот.

Адвокатите на Смолет во негова одбрана рекле дека актерот, како и сите други граѓани, има право на пресумција на невиност.