Маркос Хивс, Бразилец кој наликува на холивудската ѕвезда Киану Ривс, доби пресуда против „Фејсбук“ откако компанијата го деактивираше неговиот кориснички профил.

Судот во Рио де Жанеиро пресуди во корист на Маркос, кому пред две години му беше суспендиран профилот на оваа социјална мрежа.

На „Фејсбук“ му е наложено да го реактивира неговиот кориснички профил во рок од пет дена и да му плати оштета во износ од 5.000 бразилски реали (околу 920 долари). Доколку не го стори тоа во одредениот рок, „Фејсбук“ ќе мора да му плаќа дополнителни 200 реали (37 долари) за секој нареден ден.

„Борбата траеше две години. Штом сфатија дека изгледам како актерот, за неполни три месеци ми го затворија профилот. Во исто време, има бројни профили кои се преправаат дека сум јас и бараат пари од фановите, а кои останаа активни“, изјави Хивс.

Хивс сфатил дека личи на Ривс пред 17 години, но не мислел дека може да заработи од таа сличност сè додека не ја изгубил работата на танкер. Lаdbible пишува дека после тоа се внесол во улогата на ѕвездата на „Матрикс“ и дека го користи Фејсбук за промоција и за договарање работни места.

Го смени морето за живот на славна личност и удобно живее личејќи на Ривс, користејќи ја својата Фејсбук-страница за добивање професионални ангажмани, пишува порталот.

Повеќе од четири децении откако изумреа локално, носорозите повторно талкаат во дивината на Мозамбик, кој носи загрозени видови од Јужна Африка во обид да вдахне нов живот во своите паркови и да го поттикне локалниот туризам.

Група ренџери ги фатиле црно-белите носорози, им дала седативи за да може да ги преместат на над 1.600 километри оддалеченост во Националниот парк „Зинаве“ во Мозамбик, кој зафаќа повеќе од 400.000 хектари и има повеќе од 2.300 други донесени животни.

„Носорозите се важни за екосистемот, што е една од причините зошто ги селиме на толкава оддалеченост и ги правиме сите овие напори за да ги донесеме тука“, рече Кестер Викери, конзерватор кој го надгледува целиот процес.

Групата Peace Parks Foundation (PPF), која ја води операцијата, има за цел да премести повеќе од 40 носорози во следните две години во Мозамбик. Проект-менаџерот Ентони Александер изјави дека групата веќе донела некои предатори и многу слонови во паркот, а сега на ред се носорозите.

Оваа иницијатива е дел од кампањата за спас на загрозените видови со нивно преместување во безбедни засолништа, каде што имаат можност да ја зголемат својата популација.

Викери се надева дека за 10 години ќе види просперитетна популација на бели носорози во паркот Зинаве.

Во летните месеци многу луѓе сакаат да одат на одмор со своите миленици. Сепак, кучињата на некои места се непожелни бидејќи нивното гласно лаење понекогаш ги вознемирува луѓето. Затоа ова куче, кое стана вирално на социјалните мрежи, научи тивко да лае за никому да не му пречи.

Видеото е објавено на „Редит“ под наслов „Додека бевме во стан во кој е забрането лаење, ова куче научи да лае со шепот“. Кучето прво лае нормално, а потоа сопственикот го предупредува дека треба малку потивко. Таа му објаснува дека мора да лае како да шепоти, на што тој веднаш реагира.

„Тоа е едно слатко и паметно куче“, „Имав куче што се обиде да лае така, но звучеше како да кашла“, „Дарвин мора да е горд“, „Некој ве молам да ги научи моите корги да лаат така“, пишуваат луѓе во коментари.