Новата проширена верзија на „Лига на правдата“, во режија на Зак Снајдер, ќе биде игран филм, а не серија во четири епизоди, како што претходно беше најавено.

Режисерот ги потврди своите планови за новата таканаречена „снајдер кат“ верзија на ДС-филмот и откри дека ќе биде игран филм. Претходно беше објавено дека форматот на проектот на Снајдер ќе биде мини серија во 4 дела, секој дел во траење од 1 час.

Без оглед на форматот, ова е нешто што фановите со нетрпение го очекуваа уште од 2017 година по „Лига на правдата“ на Џос Ведон, коментираат медиумите.

Новиот филм на Снајдер треба да ја има својата премиера во март на „ХБО макс“.

Легендарната британска готвачка и ТВ-ѕвезда, Мери Бери, откри дека примила вакцина против коронавирусот и смета дека луѓето треба да го следат нејзиниот пример и да мислат и на другите.

Бери (85) деновиве откри дека таа и сопругот Пол (88) се вакцинирале и ќе ги охрабрат сите да го сторат тоа.

„Луѓето не треба да се двоумат во врска со вакцините генерално“, рече таа повикувајќи се на сопственото искуство од детството кога имала детска парализа.

„Ако сте биле во болница како што бев јас, со луѓе во агонија, со болка… Мислам дека сите треба да се вакцинираат“, рече таа за „Радио тајмс“. „Имав детска парализа, но сега речиси сите во светот се вакцинирани против тоа“, рече таа додавајќи дека имала огромна среќа што болеста ја погодила само левата страна на нејзиното тело.

Мери Бери е британска готвачка, авторка на кулинарски книги и телевизиска водителка. Има објавено повеќе од 75 книги за готвење, од кои најпозната е Baking Bible.

„Тор: Љубов и молња“ на Таика Ваити почна да се снима овој месец, а актерската екипа продолжува да расте. Британски „Дејли мејл“ објави дека Мет Дејмон ќе глуми во филмот на „Марвел“ со Крис Хемсворт (моќниот бог Тор).

Оскаровецот наводно слетал во Сиднеј со приватен авион и моментно е во задолжителен карантин пред продукцијата.

„Многу сум возбуден што јас и моето семејство ќе престојуваме во Австралија следните неколку месеци“, рече Дејмон. „Австралиските филмски екипи се познати во светот по својата професионалност, задоволство е да се работи со нив, така што карантинот од 14 дена ќе вреди“.