Уште еден доктор во случајот со смртта на Метју Пери се изјасни за виновен

Калифорнискиот доктор Салвадор Пласенсија се согласи да се изјасни за виновен за обезбедување пристап до кетамин на Метју Пери во неделите пред неговата смрт, објави Би-би-си.

Пласенсија ќе се изјасни за виновен по четири точки од обвинението за дистрибуција на кетамин, соопштија федералните обвинители во понеделникот. Изјаснувањето носи максимална казна од 40 години затвор, а се очекува докторот да се изјасни во наредните недели.

Пери, најпознат по улогата на Чендлер Бинг во серијалот „Пријатели“, беше пронајден мртов во своето џакузи во Лос Анџелес во октомври 2023 година. Имаше 54 години. Иако отворено зборуваше за своите борби со депресијата и зависноста, неговата смрт ги шокира обожавателите во светот. Според пораките доставени до обвинителите од д-р Марк Чавез, лекар што веќе се изјасни за виновен во случајот, д-р Пласенсија го нарекол Пери кретен и се прашувал колку би бил спремен да плати за лекот.

Му продал 20 ампули кетамин за две недели

Документите поднесени како дел од спогодбата за признавање вина тврдат дека д-р Пласенсија му дал на Пери инјекции со кетамин во неговиот дом и на паркингот на аквариумот „Лонг Бич“. Тој исто така го обучил асистентот на Пери, кој исто така е обвинет, како да го администрира лекот и им продал дополнителни ампули за да ги чуваат дома.

Пласенсија е еден од петте обвинети што сочинувале мрежа од нелегални дилери и медицински професионалци за кои обвинителите тврдат дека го снабдувале Пери со кетамин. Актерот земал законски пропишани количини кетамин за лекување депресија, но сакал повеќе отколку што му било дозволено.

Во периодот од 30 септември до 12 октомври 2023 година, според договорот, д-р Пласенсија им продал на Пери и на неговиот асистент вкупно 20 ампули од 5 мл кетамин (100 мг/мл), како и помала количина кетамински таблети и шприцови.