Еден од најпопуларните австралиски магазини специјализиран за венчавки – „Вајт“ (White) стави клуч на врата откако одби да објавува текстови за истополови бракови и остана без приходи од реклами. Магазинот постоел 12 години.

Основачите на магазинот, Лук и Карла Барел, објасниле дека избегнувале текстови за геј браковите затоа што не сакале да предизвикаат општествена, политичка или правна војна.

Во последниот блог пост напишале дека поради нивниот став биле под напад од активистите и биле принудени да изберат страна, како и тоа дека ги напуштиле неколку огласувачи и магазинот повеќе не бил економски одржлив.

На крајот на 2017 година австралиските пратеници ги легализираа истополовите бракови.

Во северно индиската држава Утар Прадеш е отворена првата болница за слонови, која е опремена со најсовремени средства за лечење на овие животни, важни за индиската култура, а која со тоа привлекува голем број локални но и странски туристи.

Во болницата првиот пациент е 49-годишната слоница Аша, која ја подигнала својата лева нога за да може лекарот да ѝ ја санира повредата, а посетителите снимале со мобилен телефон, пренесе Ројтерс.

India gets its first dedicated elephant hospital via /r/UpliftingNews https://t.co/vU9xPCEzVn pic.twitter.com/d4VcMT4XqG

— Mohamed Aadhil (@Aadhil69) November 18, 2018

Болницата се простира на повеќе од 12.000 квадратни метри, опремена меѓудругото со безжичен дигитален ренгенски уред, апарат за термографско снимање, ултрасонографски уред и карантински простории.

Оваа установа е наменета за лекување на повредени, болни и стари слонови.

Слоновите се важен дел од индиската култура и многу се присутни на фестивалите, а се користат и како туристичка атракција во северните и западните региони.

На традиционалната парада пред божиќните празници во Холандија се судрија приврзаниците и противниците на помошникот на Дедо Мраз – Црниот Пит. Холандската верзија на Црн Пит, е препознатлив по лицето обоено во црна или кафеава боја и по костумот.

Противниците на Црниот Пит сметаат дека тој обичај е расистички и навредлив за лицата со темна боја на кожата.

Нередите избија во повеќе градови во Холандија, а ротердамската полиција навела на Твитер дека уапсила три лица. Во местото Леуварден, полицијата соопштила дека спречила две групи луѓе да започнат тепачка. Тепачки биле спречени и на други места во земјата. Во судирите учествувале навивачите на најголемите клубови во земјата, како и расистички политички групи.

Според традицијата, Црниот Пит носи подароци за време на празникот Синтерклас. Тој се спушта низ оџакот додека луѓето спијат. Како што гласи преданието, Пит во деновите, кои му претходат на празникот, често може да се види на покривите на куќите, каде низ оџаците наслушува дали децата биле добри. Делењето медењаци и други слатки колачиња е негова специјалност. Црниот Пит му помага на Синтерклас, му ја носи книгата или стапот.