Една од најголемите холивудски агенции за таленти во петокот (30 јули) упати остри критики на сметка на филмското студио „Дизни“ во ескалирачкиот јавен спор околу тврдењата на Скарлет Јохансон дека изгубила пари со стримувањето на нејзиниот филм „Црна вдовица“.

Брајан Лорд, ко-претседател на Агенцијата за креативни уметности (Creative Arts Agency), го обвини „Дизни“ дека го нападнал ликот на актерката и открил дека ѝ биле платени 20 милиони долари за филмот „во обид да го наоружа нејзиниот успех како уметник и деловна жена“.

Изјавата на Лорд, кој исто така ја застапува Јохансон, доаѓа еден ден по веста дека sвездата на „Црна вдовица“ поднела тужба со која го обвинува „Дизни“ за прекршување на договорот со неа со објавување на филмот од 9 јули на својата стриминг-платформа во исто време кога се прикажуваше во кината, со што го намали нејзиниот очекуван удел од профитот на киноблагајните.

Тужбата предизвика шок во Холивуд додека медиумските компании се обидуваат да ги зголемат своите стриминг-услуги, нудејќи премиум содржини во исто време или речиси во исто време кога филмовите се прикажуваат во киносалите, иако многу од нив се затворени среде пандемија на Ковид-19.

Јохансон (36), една од најпопуларните актерки во Холивуд и меѓу оние со најголема заработка, сними девет Марвелови филмови со „Дизни“.

„Дизни“ возврати во четвртокот со соопштение во кое тужбата на Јохансон ја нарече неоснована. Исто така, откри дека таа добила 20 милиони долари за филмот. „Тужбата покажува бесчувствително игнорирање на последиците од пандемијата,“ наведе компанијата.

Деталите за холивудските филмски договори и какви било спорови обично се решаваат зад затворени врати.

Еден ден по соопштението на компанијата, Брајан Лорд коментираше: „Дизни бесрамно и лажно ја обвини госпоѓа Јохансон дека нема чувство за глобалната здравствена криза.“

„Дизниевиот директен напад врз нејзиниот лик и сè друго што имплицираа е под нивото на компанијата со која многу од нас во креативната заедница успешно соработувавме со децении,“ додаде Лорд.

„Црна вдовица“, сторија за поранешна руска атентаторка која потоа станува одмаздник, заработи 80 милиони долари на киноблагајните во САД и Канада во текот на првиот викенд. Филмот генерираше и дополнителни 60 милиони долари преку Дизниевиот стриминг-сервис „Дизни плус“.

Шпански истражен судија увидел доволно индиции за колумбиската поп-ѕвезда Шакира да се соочи со судење за даночна измама, е наведено во судскиот документ објавен во четвртокот (29 јули).

Судијата Марко Џисас Хуберијас ја заврши истрагата за наводите на државното обвинителство дека пејачката не платила 14,5 милиони евра (23,3 милиони долари) данок на приход остварен помеѓу 2012 и 2014 година. Тоа е прелиминарен чекор пред да биде закажано судење.

„Документите (…) приложени кон тужбата се доволен доказ за погрешно постапување за да се продолжи со постапката“, наведува судијата во судскиот документ.

Додека обвинителите велат дека Шакира живеела во регионот Каталонија во тој период, нејзините претставници тврдат дека до 2015 година таа живеела на Бахамите, не во Шпанија, и дека ги исполнува сите даночни обврски.

„Во периодот од 2012 до 2014 година Шакира била даночен обврзник на Бахамите, а не на Шпанија“, тврдат нејзините претставници и додаваат дека повремено патувала во Шпанија, а официјално почнала да живее таму дури од 2015 година.

Претставниците на Шакира во Шпанија во четвртокот преку е-пошта изјавија дека „судскиот документ е очекуван чекор во процесот“ и дека правниот тим на пејачката „целосно соработува со правосудните органи и нема да коментира понатаму“.

44-годишната пејачка е во врска со дефанзивецот на Барселона, Жерар Пике, од 2011 година и имаат две деца.

Сагата за Луцифер е речиси исто толку епска како и библиските приказни што ја инспирираат.

Фановите стравуваа дека крајот беше предвреме близу во неколку наврати, но „Нетфликс“ конечно потврди дека серијата ќе има шеста и последна сезона.

Веста дојде преку официјална објава на Твитер, придружена со броевите „666“ и следнава најава: „Ѓаволот нè натера да го сториме тоа. Луцифер ќе се врати за шеста и последна сезона. Како, крајно финале.“

Завршната сезона ќе има 10 епизоди, а ќе почне да се емитува на 10 септември.

Главниот фокус на серијата е Луцифер Морнингстар, ѓаволот, кој е несреќен и уморен од тоа да биде господар на пеколот. Го напушта престолот и го менува своето кралство со Лос Анџелес, каде води свој ноќен клуб „Лукс“. Тој е повикан да работи како консултант за полицијата на Лос Анџелес.