Дали путерот и сирењето го зголемуваат ризикот од срцеви заболувања?

Посебни видови путер, сирење и млеко со помала содржина на масти долго време се рекламираат како подобра алтернатива за оние кои сакаат да го намалат ризикот од развој на срцеви заболувања, мозочен удар и дијабетес, објавува германската агенција dpa.

Сепак, мастите што природно се наоѓаат во млечните производи, за разлика од индустриските транс масти во високо преработената храна, не го зголемуваат ризикот од срцеви заболувања, заклучија британските научници во анализа објавена во списанието Nutrition Research.

Тим научници анализирал 22 студии што вклучувале медицински податоци од илјадници европски и северноамерикански жители и открил дека природните транс масти „се однесуваат многу поинаку од индустриските“ во телото.

„Транс мастите во вашето утринско млеко, јогурт, путер или сирење не се исти како индустриските, делумно хидрогенизирани масти“, рече Иан Гивенс од Универзитетот во Рединг.

Гивенс се надева дека резултатите од истражувањето ќе ги уверат луѓето дека млечните производи можат безбедно да се консумираат како дел од балансирана исхрана.

Здравствените експерти се согласуваат дека на телото му е потребен внес на масти, вклучувајќи заситени масти од млечни производи и месни производи, како дел од балансирана исхрана.

Истражувањето, нарачано од американската непрофитна организација Национален совет за млечни производи, е во согласност со претходните студии што покажаа здравствени придобивки од други видови масти, како што се незаситените масти од авокадо, јаткасти плодови и риба.

„Барем некои видови полномасни млечни производи можеби не се толку загрижувачки како што се мислеше порано“, вели Медицинскиот факултет Харвард, истакнувајќи дека ферментираните млечни производи како што се јогуртот и сирењето, исто така, можат да обезбедат „делумна заштита од кардиоваскуларни заболувања“.

Американското списание за клиничка исхрана минатата година објави дека не е пронајдена убедлива поврзаност помеѓу консумирањето млечни производи, без оглед на содржината на масти, и ризикот од развој на кардиоваскуларни заболувања.