Намирници кои треба да ги избегнувате за вечера

Ако често се будите со надуеност и чувство на „тежок стомак“, причината можеби не е количината на храна, туку нејзиниот избор. Експертите предупредуваат дека дигестивниот систем се забавува навечер, па затоа одредени намирници можат да предизвикаат гасови и задржување на течности во текот на ноќта.

Токму затоа некои навидум здрави намирници можат да бидат лош избор за вечера.

1. Мешункасти плодови (грав, леќа, наут)

Мешунките се полни со влакна и протеини, но и со сложени шеќери што телото тешко ги вари. Кога ќе стигнат до дебелото црево, бактериите ги разградуваат и создаваат гасови, што доведува до надуеност, особено навечер.

2. Брокула, карфиол, зелка

Овој зеленчук содржи рафиноза – вид шеќер што предизвикува зголемено формирање на гасови за време на варењето. Иако се исклучително здрави, овие намирници можат да бидат „тешки“ за желудникот ако се јадат навечер.

3. Млечни производи (млеко, сирење, сладолед)

Многу луѓе имаат блага нетолеранција на лактоза, дури и ако не се свесни за тоа. Навечер, кога варењето се забавува, млечните производи можат да предизвикаат гасови, надуеност и чувство на тежина.

Што се случува навечер?

Во текот на вечерта, метаболизмот и варењето природно се забавуваат. Тешката и „проблематична“ храна останува подолго во желудникот, ферментира и создава гасови, што доведува до надуеност и полош сон.

фото/Depositphotos