Американскиот аренби пејач, текстописец и продуцент Ар Кели (Роберт Силвестер Кели) осуден двапати оваа година за сексуални злосторства, ќе треба да плати најмалку 300.000 долари оштета на некои од неговите жртви, соопшти федерален судија во средата.

„Со овие пари две жени, Џејн и Стефани, ќе ги покријат трошоците за терапија и третман на херпес“, изјави окружната судијка Ен Донели на сослушувањето во Бруклин.

Таа сума веројатно ќе се зголеми откако обвинителите повторно ќе ги пресметаат трошоците за лековите за Стефани.

Донели ги отфрли барањата на обвинителите да ѝ надомести на Џејн за изгубениот приход и да обезбеди каква било компензација на третата жртва позната како Соња.

Кели, кој моментално е во федералниот затвор во Чикаго, виртуелно присуствуваше на сослушувањето преку апликацијата „Зум“.

Во јуни Кели беше осуден на 30 години затвор, откако поротата го прогласи за виновен за рекетирање и принудување жени и деца на проституција во раните 90-ти години. Поротата утврди дека пејачот и продуцент ја користел својата медиумска популарност и слава да изложува млади и малолетни женски фанови на систематска сексуална злоупотреба.

Судијката Донели го осуди обвинетиот откако ги слушна сведочењата на неколку преживеани жени кои сведочеа дека злоупотребата на Кели оставила длабоки траги во нивниот живот.

Обвинителите тврдеа дека 55-годишниот Кели ја користел својата слава и богатство во текот на повеќе од две децении за да намами жени и малолетни девојки во својата орбита поради секс.

Кели исто така беше осуден минатиот месец во Чикаго под одделни обвиненија за детска порнографија и намамување малолетни девојчиња за секс.

Мелани Си за малку ќе била исфрлена од „Спајс грлс“ откако се скарала со Викторија Бекам.

Поп-ѕвездата (48) се прослави заедно со Викторија (48), Ема Бантон (46), Мел Би (46) и Гери Халивел (50), како дел од некогаш популарниот бенд девојки од 90-тите, но објасни дека кавгата можела да ја чини место во фамозната петорка уште пред да го издадат револуционерниот деби сингл Wannabe.

„Нешто се случи доста рано во патувањето на ‘Спајс грлс’, и малку се скарав со Викторија на доделувањето на британските музички награди (Брит-авордс) во ’96-та. Имаше мал испад, и ми се закануваа дека ќе ме исфрлат од бендот“, рече таа во интервју за „Ентертејнмент тунајт“.

Хитмејкерката (Say You’ll Be There) откри дека во тој момент станала опседната со контрола над себе, што на крајот довело до нарушување во исхраната додека се борела со светската слава.

Главниот извршен директор на компанијата „Мета“ (поранешен „Фејсбук“), Марк Закерберг, повеќе не е меѓу првите десет најбогати луѓе во САД, според „Форбс“.

Угледниот бизнис-магазин го откри ова преку неговата листа на 400 милијардери во САД („Форбс 400“) во вторникот, наведувајќи дека Закерберг изгубил повеќе од половина од своето богатство во вкупен износ од 76.8 милијарди долари, што почна да се случува во септември 2021 година.

Според „Форбс“, ова е првпат интернет-претприемачот да доживее ваков пад од 2015 година, бидејќи од трето падна на единаесетто место.

Марк Згутович, аналитичар во „Бенчмарк“, фирма за истражување и инвестициско банкарство, откри дека „Фејсбук“ во моментов не заработува пари од рекламирање што негативно влијаело на сопственикот на компанијата.

Илустрација на „Форбс“ за Марк Закерберг, кој испадна од топ 10 најбогати Американци

„Фејсбук најмногу заработува од рекламирање, а сега веќе ги нема тие податоци. Сите овие сигнални податоци исчезнаа, што во основа значи дека огласувачите имаат проблем да кажат дали кампањата била успешна или не“, рече Згутович.

Закерберг првпат стана милијардер во 2008 година, само четири години по основањето на „Фејсбук“. На возраст од 23 години, тој беше најмладиот милијардер во тоа време, дебитирајќи на позиција 321 на „Форбс 400“. Тогаш неговото богатство беше проценето на 1.5 милијарда долари.

Сепак, до 2011 година нето-вредноста на Закерберг се зголеми речиси 12 пати на 17.5 милијарди долари.

Најбогатиот Американец на листата на Форбс е извршниот директор на „Тесла“, Илон Маск, поради неговиот пораст од 11% во проценетите 60.5 милијарди долари додадени оваа година.