(Видео) Емилија ја започнува својата музичка приказна со „Еден човек“

Со песната „Еден човек“, ЕМИЛИЈА за првпат се претставува пред публиката и го отвора својот музички свет — искрено, храбро и без маски.

Песната е создадена во препознатлив soul-blues стил, збогатен со моќен big band звук, gospel хор и аранжман кој се развива како вистинска музичка сцена — со динамика, пресврти и емоција.

„Еден човек“ носи едноставна, но силна порака: вистинската љубов започнува во моментот кога ќе се пронајдеш себеси. Кога ќе се прифатиш таква каква што си и ќе имаш храброст да се покажеш без страв, тогаш ќе го пронајдеш и човекот кој навистина те заслужува — човекот кој ќе ја препознае твојата вредност и ќе те направи среќна.

За ЕМИЛИЈА, оваа песна е многу повеќе од музичко деби.

„‘Еден човек’ е моето прво искрено претставување пред публиката. Не сакав да започнам со нешто што само добро звучи, туку со песна во која вистински се препознавам. Ова е песна за прифаќањето, за храброста да бидеш свој и за љубовта која доаѓа тогаш кога повеќе не бегаш од себе. Со неа започнува мојата приказна, токму онаква каква што сум јас“, вели ЕМИЛИЈА.

„Еден човек“ е првата песна од нејзиниот деби-албум „25“, проект кој се роди спонтано, интензивно и со огромна креативна енергија.

Продуцентот Темелко Андреев вели дека соработката со ЕМИЛИЈА била исклучително инспиративна:

„Да се соработува со артист како ЕМИЛИЈА е огромна привилегија и чест. За мене, улогата на продуцентот не е да го стави артистот во однапред создаден калап, туку да му служи на неговиот талент — на она парче Бог што го носи во себе. Кај ЕМИЛИЈА таа искра беше толку силна и инспиративна што целиот албум го напишав за само десет дена — десет песни, секоја различна, позитивна и уникатна.“

Албумот „25“ носи алегоричен, длабок и инспиративен пристап, но истовремено останува современ, директен и близок до слушателот.

„Не сакавме песни што се движат по една права линија. Аранжманите се комплексни, со развој и динамика, блиски до мјузиклскиот начин на раскажување. Одлучивме целиот проект да го изградиме врз моќен big band звук и gospel хор, а изведбата на ЕМИЛИЈА беше едноставно магична. Таа не ја отпеа песната — таа ја раскажа“, додава Андреев.

Со „Еден човек“, ЕМИЛИЈА не се обидува само да биде слушната. Таа доаѓа да биде препознаена.

Ова е првото поглавје од „25“.

Музика и текст: Темелко Андреев
Аранжман, микс и мастеринг: Темелко Андреев
Видео продукција: Темелко Андреев