Македонија
Додевски: Одлуката за притворот на Кочан е незаконска

Адвокатот Никола Додевски, кој го застапува осомничениот Сеад Кочан во предметот „Труст“, тврди дека одлуката на судот за одредување мерка притвор е незаконска.
„Кривичниот совет на Основниот Суд Скопје 1 сторил груба незаконитост и без законска основа навел дека жалбата не го задржува извршувањето на Решението за определување на мерката притвор. Врз основа на таква незаконитост, Првостепениот суд издал Наредби за притвор и за издавање на потерници на осомничениот Сеад Кочан уште пред Решението да стане правосилно“, тврдат од адвокатското друштво Никола Додевски.
Според адвокатот на Кочан, со тоа било елиминирано задолжителното суспензивно дејство на жалбата, предвидено со член 442 од Законот за кривична постапка.
Понатаму се наведува дека Судот сè уште не го доставил предметот до Апелација, иако рокот истекува во недела во 17:20 часот, а една минута подоцна Решението за определување мерка притвор за нив повеќе нема да важи.
Адвокатот Додовски додаде дека до Основниот суд Скопје 1 доставиле писмена Ургенција за претседателот на Кривичниот совет, судијата Гордана Спиреска, во која укажуваат на околноста дека преклузивниот рок од 48 часа, во кој Апелација треба да донесе одлука по жалбата истекува денеска во 17:20 часот, а со тоа што таа не го доставува предметот, го оневозможува тоа одлучување.
„Одбраната смета дека во 17:21 часот, доколку не биде донесена одлука на Апелациониот суд Скопје, Решението за определување на мерка притвор нема да произведува правно дејство“, велат од адвокатското друштво Никола Додевски. /крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Велковски за Денот на социјалните работници: Вие не само што ги менувате животите на луѓето, вие го менувате духот на нашето општество

Заменик министерот за социјална политика, демографија и млади, Ѓоко Велковски, присуствуваше на настан по повод двојно одбележување на социјалната работа, Денот на социјалните работници – 10 Јуни и Денот на социјалната работа кој беше неодамна.
Настанот насловен: „Ја славиме социјалната работа – за трајна благосостојба, заедничка иднина и силна солидарност!“ беше во организација на Здружението на социјални работници на Македонија – ЗСРМ, а на него покрај социјални работници присуствуваа и професори од Институтот за социјална работа и социјална политика при Филозофскиот факултет, Скопје.
Целта на одбележувањето на овој ден е да се афирмира значењето на социјалната работа и улогата која ја имаат социјалните работници во различни подрачја на делување во нашата држава.
Во оваа прилика Велковски изрази благодарност до социјалните работници за нивната пожртвуваност во работата за која што потенцираше дека „не постои подобар начин да се опише оваа професија освен со зборот хуманост“.
„На терен, ние знаеме дека предизвиците со кои се соочувате не се мали. Но вие не се откажувате, не се повлекувате. И секојдневната комуникација со вас ми покажува дека вие сте оние што ги имате решенијата, вие сте оние кои можат да најдат начин дури и кога изгледа дека нема начин. И во тоа, вашиот труд е непроценлив. Вие не само што ги менувате животите на оние кои ви се обратат, вие всушност го менувате духот на нашето општество, градите мостови меѓу луѓето, ја обезбедувате шансата за утре за оние кои сега се изгубени“, истакна Велковски.
Тој се осврна на заложбите на Министерство, за создавање на систем кој ги поддржува социјалните работници во вршењето на нивната мисија.
„Да обезбедиме подобри услови за работа, да обезбедиме ресурси и обуки кои ќе ви овозможат да се соочувате со сите предизвици кои се појавуваат. Вие сте вистинските херои на ова општество. Ви благодарам од срце и ви посакувам многу успех во вашата хумана работа,“ порача Велковски.
Македонија
Студентите ќе добијат по 250 евра за набавка на електронски уреди од септември, најави Мицкоски

Премиерот, Христијан Мицкоски денес изјави дека Владата планира ученички стипендии за наредната година, а во однос на новинарското прашање за најавата на Владата за помош на студентите за набавка на електронски уреди, изјави:
„250 евра за електронски уреди. Тие пари се предвидени во буџетот. Процедурата во рамките на Владата, односно Генералниот секретаријат е отпочната. Се дефинираат критериумите и нормално е дека чекаме да отпочне новата студентска година затоа што еден од критериумите е да студентите имаат заверен семестар. И ги чекаме овие бруцоши коишто сега ќе се запишат за да го заверат семестарот и да може да ги добијат тие 250 евра помош од државата за купување на електронски уреди. Така што веќе во септември месец, јас сум сигурен дека тоа ќе се случи“.
Тоа што ВМРО и оваа Влада ветуваат, во којашто се политичките партии ВРЕДИ, коалицијата ВРЕДИ, политичката партија ЗНАМ и нашата коалиција, додаде тој, тоа што ние го ветуваме, тоа го испорачуваме, но се разбира во зависност од приоритетите, бидејќи многу приоритети има, мора многу дупки и многу лоши работи од минатото да се санираат коишто ги наследивме.
„Така што еве, за овие година дена мислам дека успеавме многу од тие лоши работи, еден од тие е и овој објект, да ги санираме. Така што мислам дека последната бројка е на приватните и државните универзитети, некаде околу 55 илјади студенти, со заверка на семестар ќе може да ги користат овие 250 евра за набавка на електронски уреди од септември“, изјави Мицкоски.
Македонија
Тошковски најави поголема набавка на униформи за полицијата од онаа за специјалците: Спорната набавка е законска, но немаше доволно критериуми во тендерот

На нов тендер Министерството за внатрешни работи ќе бара униформи за 6.000 полицајци, најави денес министерот за внатрешни работи Панче Тошковски. За него не е спорно што мало модно студио и тукушто отворена фирма треба да испорачаат униформи за специјалната полиција за 3,8 милиони евра и вели дека набавката била спорна за јавноста не оти е незаконска туку поради што немало доволно критериуми во тендерот, па освен оваа, најави уште една, поголема набавка на униформи.
„ Оваа набавка која што да речеме беше спорна во јавноста, не од законски аспект туку од аспект на тоа што немало доволно критериуми во рамки на тендерската документација, е помалата набавка. Сега треба да следи поголема набавка која што се однесува на сите униформирани полициски службеници, не само на специјалните сили. Ако таа беше да речеме за бројка од 1000 луѓе, сега ќе следи набавка за бројка од 5-6.000 полициски службеници за кои ќе треба да се набави униформа“, вели министерот Тошковски.
Се надева дека најбрзо што може ќе бидат ефектуирани и едната и другата набавка. Министерот останува на ставот дека на полицајците им треба достоинствена униформа, а обидите да се осуети набавката, според него, се манипулација, растурање пердуви и обвинувања.
„Во јавноста имаше еден обид за девалвација на процесот за набавка на униформи за полициските службеници. Имам една фотографија која што ја има и претходно споделено во јавноста, а ја има и на мојата веб-страница, како беа облечени полициските службеници во рамки на една моја постеа, додека бев во техничка Влада. Едниот со фармерки, другиот со работничко одело, третиот со палто од татко му затоа што татко му бил полициски службеник. Срамота. Се надевам дека во текот на оваа година сите полициски службеници ќе добијат достоинствена униформа заради тоа што навистина ова што го имаме сега од аспект на униформа е катастрофа. И ќе го направиме. Осум години не набавиле униформа, ќе направиме и тоа. Осум години денар не вложиле во управните служби, го правиме и тоа. Нека продолжат да манипулираат, нека фрлаат пердуви и празни обвинувања. Суди македонскиот народ. Мудар е, гледа што се случува и за брзо време ќе си каже што мисли на локалните избори“, рече министерот Тошковски на пуштањете во употреба на обновените простории за вадење пасоши и лични карти во зградата на Македонската телевизија.