Македонија
СДСМ: Владата ја продолжува децентрализацијата и обезбедува достапни сервиси за граѓаните
Со предавањето на софтверскиот систем „Е-градежно земјиште“ на Заедницата на единиците на локалните самоуправи (ЗЕЛС), а понатаму и до општините во Република Македонија, Владата предводена од СДСМ го продолжува процесот на децентрализација на Република Македонија и овозможува достапни сервиси за граѓаните, соопшти СДСМ.
Програмата „Е-градежно земјиште“ ќе им овозможи на граѓаните да ја спроведат целата постапка по поднесени барања за отуѓување, за давање долготраен и краткотраен закуп, за давање право на трајно користење, за пренесување право на сопственост и засновање право на стварна службеност на градежно земјиште во сопственост на Република Македонија.
Тоа ќе придонесе кон забрзување на сите постапки поврзани со овие прашања, општините ќе бидат пофлексибилни и посветени да им излезат во пресрет на барањата на граѓаните и компаниите, а истовремено ќе биде и охрабрување за сите инвеститори бидејќи првите чекори во постапките за идни градби ќе се решаваат на локално ниво.
Владата предводена од СДСМ продолжува посветено да работи на зголемување на степенот на децентрализација и поголеми надлежности на единиците на локалната самоуправа.
Целосното спроведување на Законот за рамномерниот регионален развој, освен што ќе значи поголеми надлежности за општините во областите на образованието, здравството, културата и земјоделството, ќе отвори и можност за дополнителни 100 милиони евра за општините.
Со дополителните средства општините ќе бидат помогнати да овозможат навремени и ефикасни услуги и да бидат достапни локални сервиси кои ќе работат во интерес на сите граѓани“, се наведува во соопштението на СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Простор за разговор“ во Охрид
Вечерва со почеток во 20 часот, ХЕРА – Асоцијација за здравствена едукација и истражување во соработка со Интерарт културниот центар организира настан „Простор за разговор“ во Младинскиот центар во Охрид, за зајакнување на родовата еднаквост.
Настанот е дел од проектот „Простор за разговор“ со кој преку уметност, танц, театар и филм сплотени во еден перформанс целта е да се зајакне чувството на припадност кон заедницата, да се искоренат стереотипите и да се зајакнат младите, маргинализираните и лицата во социјален ризик.
„Простор за разговор“ се состои од краток филм и танцов перформанс, кои претставуваат уметничка рефлексија на темата и ќе бидат изведени од танчерите на Скопје танцовиот театар. По перформансот ќе има разговор на темата за родова еднаквост со публиката, со цел справување на проблемите на младите. Поканети се социолози, активисти и психолози, кои ќе говорат за тоа, каде сме и што треба понатаму да направиме во однос на социјалната положба и родовата еднаквост.
На 4. јуни (вторник) настанoт се одржува во Струга во Домот на културата во 12 часот, со што завршуваат низата перформанси што се одржаа изминатите 10 дена во шест градови низ државата.
Проектот „Простор за разговор“ е поддржан од Германија преку Германското друштво за меѓународна соработка (ГИЗ) во рамки на регионалниот проект за социјално вклучување на ранливи групи во Западен Балкан.
Македонија
Eвропскиот фронт предводен од ДУИ со декларација ќе се жали до меѓународната заедница
Европскиот фронт преводен од ДУИ денеска во Тетово усвои декларација која ја нарече политичка декларација за етничкиот легитимитет што произлегува од изборите.
Од тука најавија дека декларацијата ќе биде испратена до сите локални и меѓународни институции.
Во неа се наведува дека случувањата по изборите го доведуваат во прашање духот на Охридскиот договор. Велат дека непочитувањето на изборниот легитимитет овозможува воспоставување на етничка хегемонија и претставува понижување кон Албанците, Турците, Ромите, Бошњаците и другите.
ВМРО-ДПМНЕ која извои апсолутна победа на изборите во мај, ги исклучи ДУИ од преговорите за новиот владин состав. Наместо нив ВМРО-ДПМНЕ договори коалиција со „Влен“ во која учествуваат политичките партии од албанскиот опозициски блок во земјата. ДУИ која освои повеќе гласови од „Влен“, инсистира на влез во Владата и почитување на правилото „победник со победник“, а ВМРО-ДПМНЕ постојано ги потсетува дека ова правило самите го прекршија во 2016 година кога наместо со нив кои тогаш победија, одлучија да коалицираат со СДСМ и заедно составија Влада. ДУИ сега тврди дека волјата на албанските гласачи е погазена, а Охридскиот договор е прекршен.
„Ако одењето на ДУИ во опозиција е кршење на Рамковниот договор, тогаш и Али Ахмети го прекрши кога реши да ја изостави ВМРО-ДПМНЕ од владата и не го почитуваше резултатот на изборите 2016 година каде победи ВМРО-ДПМНЕ. Што само значи дека почитувањето на Охридскиот договор нема врска со фактот дали ДУИ е власт или опозиција“, велат од ВМРО-ДПМНЕ.
Партијата на Христијан Мицкоски пред неколку дена порача дека ако лидерот на ДУИ, Али Ахмети, мисли дека нови и антидржавни етнички барања преточени во документи и платформи ќе го спасат од одење во опозиција и ќе ги сокријат криминалите на неговата партија, треба да знае само дека тоа забрзано ќе му ја заврши кариерата.
И новоизбраниот претседател на Собранието од Влен, Африм Гаши вели дека Охридскиот рамковен договор не е прекршен.
„На секој човек кој ги знае Рамковниот договор и Уставот, јасно му е дека тоа воопшто не е дел од Рамковниот договор“, вели Гаши.
„Можеби тој заборавил, тоа било „Мајскиот договор“ кој го потпишал со Никола Груевски и кој самиот го прекрши, но таквиот договор никогаш не беше дел од Уставот и не стана и не може да има таков договор во Уставот, затоа што се коси со секое демократско право. Владата се прави со 61 пратеници, со мнозинство, а од друга страна албанската коалиција, Влен доби 107.000 гласови со што потполно го носи легитимитетот на Албанците во ова Собрание“, рече Гаши во интервју за Радио Слободна Европа.
ДУИ во декларацијата до меѓународната заедница ја истакна и нивната целосна посветеност за целосно спроведување на Договорот од Преспа, Договорот за добрососедство и затворање на сите отворени прашања со соседите, како предуслов за продолжување на европскиот пат.
(Обновено)
Македонија
Сиљановска Давкова ги врачи наградите за најуспешните на годинашното издание на „Охрид трчаТ“
Претседателката Гордана Сиљановска Давкова денеска, во Охрид, ги врачи наградите за најдобро пласираните учесници на осмото издание на атлетскиот викенд „Охрид трчаТ“.
Милјана Ристиќ од Македонија во женска и Дарио Ивановски од Македонија во машка конкуренција, се првопласирани на главната трка на 21 километар, а Мирослав Спасов од Бугарија го освои првото место на трката на 5 километри.
Претседателката изрази задоволство од високиот потенцијал и посветеност на годинашните натпреварувачи, кои што несомнено ќе придонесат за нивните идни значајни маратонски подвизи. Особена благодарност упати и до организаторите на годинашниот Охрид трчаТ“, за успешно реализираниот атлетски викенд, со рекордни 2200 учесници од 31 земја.