Македонија
ВМРО-ДПМНЕ: Заев е уценет политичар

Зоран Заев е уценет човек. Тој минатиот март лично тврдеше дека експертите му ја укажале неуставноста на секое решение кое би предвидувало двојазични пари и униформи, стои во денешното соопштение на опозициската партија, ВМРО-ДПМНЕ.
„Една година подоцна, уценетиот Заев ги натера пратениците на СДСМ да гласаат закон за двојазичност кој што знаат дека е спротивен на Уставот. Владејачкото мнозинство на сила и без почитување на правото на амандманска расправа го донесе законот за двојазичност, кршејќи го Уставот, законот и Деловникот на Собранието на Република Македонија“, велат од ВМРО-ДПМНЕ.
Оттаму додаваат дека станува збор за закон со кој се наметнува двојазичноста на целата територија на Република Македонија и е штетен, неприменлив и неуставен. Исто така сметаат дека одлуката на претседателот Иванов да не го потпишува указот на законот за двојазичност е државнички потег и единствен можен кога флагрантно се крши Уставот и се дерогира правото.
„ВМРО-ДПМНЕ потенцира дека за ова флагрантно кршење на правниот поредок на државата одговорност ќе има. ВМРО-ДПМНЕ ќе поднесе интерпелација и кривична пријава против Талат Џафери, кој ја узурпираше функцијата претседател на Собранието на Република Македонија. Зоран Заев и СДСМ се обидуваат да направат дефокус од катастрофалните политики на секое можно поле. Затоа сме сведоци на невиден политички прогон поврзан со настаните од 27 Април, но и сите други неистомисленици на оваа антиреформска Влада“, се наведува во партиското соопоштение.
Во него се додадава дека патриотите кои се наоѓаат по затворите се со една цел, а тоа е да се одвлече вниманието на јавноста од, како што се вели, антидржавните политики.
„Пораката е многу јасна! Сите оние кои се неистомисленици на Заев и на СДСМ се потенцијална цел на политичкиот прогон кој го спроведува оваа власт. Додека вистинските криминалци се на слобода, патриотите и неистомислениците на Заев се по затворите“, сметаат од ВМРО-ДПМНЕ.
Партијата ги повикува правосудните органи да работат во интерес на почитувањето на законите и Уставот во Република Македонија.
„Политичкиот прогон мора да запре веднаш, а судот да се ослободи од стегите на власта. По враќањето на правната држава секој ќе одговара за несоодветното постапување. Македонија мора повторно да стане правна држава, патриотите да се ослободат од притвор и од конструираните обвиненија и да се почитуваат Уставот и законите во државата. Наместо ‘Живот за сите’, Република Македонија тоне во беда, сиромаштија а граѓаните од ден на ден се повеќе се разочарани. Се спроведува политички прогон и реваншизам наместо просперитет напредок“, се подвелкува во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Игуменот Георгиј избран за нов митрополит на Дебарско – кичевската епархија

Игуменот Георгиј (Ѓорѓевски) е избран за нов духовен водач на Дебарско-кичевската епархија
Тој е назначен на местото на упокоениот митрополит Тимотеј.
Георгиј, инаку, поранешен македонски амбасадор во Ватикан, неодамна се замонаши.
„На 28 мај 2025 година, кога Светата Црква го прославува Одданието на Воскресение и споменот на светите Гаврил Велички и Ахил Преспански, Неговото Блаженство Архиепископот Охридски и Македонски г. г. Стефан, отслужи Божествена Литургија во манастирот „Свети великомаченик Георгиј“ – Криви Дол, Скопје. На Литургијата Архиепископот го ракоположи во јероѓаконски чин монахот Георгиј (Ѓорѓевски).”, објави Скопската епархија на МПЦ-ОА на својата веб-страница.
Ѓорѓевски е македонски теолог и универзитетски професор. Тој е редовен професор на Православниот богословски факултет „Св. Климент Охридски“ при Универзитетот „Св. Кирил и Методиј“ во Скопје, каде што предава предмети од областа на Старозаветната теологија, вклучувајќи Библиска историја и археологија, Вовед во Стариот Завет и Егзегеза на Стариот Завет.
Своето високо образование го започнал на истиот факултет, каде што дипломирал теологија. Потоа продолжил со постдипломски студии на Понтификалниот универзитет „Грегоријана“ во Рим, Италија, каде што магистрирал и докторирал во областа на библиската теологија.
Во периодот од 2010 до 2014 година, Ѓорѓевски ја извршувал функцијата амбасадор на Македонија при Светата Столица (Ватикан).
Ѓорѓевски е автор на бројни научни трудови и книги. Во периодот од 2016 до 2023 година, тој бил декан на Православниот богословски факултет „Св. Климент Охридски“ во Скопје.
Македонија
Муцунски на проштални средби со амбасадорките на Србија и Шведска

Министерот за надворешни работи и надворешна трговија, Тимчо Муцунски, денеска оствари одвоени проштални средби со амбасадорката на Република Србија, Невена Јовановиќ, и амбасадорката на Кралството Шведска, Еми Ларсон Џејн.
На средбите, министерот Муцунски изрази благодарност за севкупниот ангажман и придонес на двете амбасадорки во унапредувањето на билатералните односи и меѓусебната соработка за време на нивниот дипломатски мандат во нашата земја.
Соговорниците изразија заедничко задоволство од континуираниот политички дијалог на високо ниво и успешната соработка во сите области од заемен интерес. Притоа, беше реафирмирана заедничката посветеност за натамошно продлабочување на односите и одржување на отворен и конструктивен дијалог по сите прашања од заеднички интерес.
Македонија
(Видео) Началници, инспектори, министри, сите тие кои требало да спречат се штитат во истрагата, вели Талески за трагедијата во Кочани

Во Кочани изгореа 62 млади животи. Изгореа во дискотека која работела незаконски, под носот на институциите. Изгореа во објект кој требало одамна да биде затворен. Изгореа зад заклучени врати, по наредба на актуелните службеници во МВР. И денес, додека родителите плачат, а државата треба да донесе правда, директните виновници се штитат од истрага, истакна на прес-конференција Миле Талески, пратеник на СДСМ.
Три месеци по трагедијата, вели тој, нема вина, нема одговорност за оние кои ако делувале вечерта, трагедијата ќе била спречена. Вистинските виновници сè уште се на слобода.
„Началници, инспектори, министри, сите тие кои требало да спречат се штитат во истрагата. Истрагата се затвора без ниеден обвинет актуелен функционер.
Наредбата со која била затворена вратата на дискотеката, клучната причина за високата бројка на жртви, до ден денес е мистерија. Никој не признава. Никој не потпишал. Никој не знае ништо. И сите зборуваат за сè освен за суштината. Кој е одговорен за тоа што децата не можеа да излезат живи, вели Талески.
Според него, оперативниот план на полицијата, наместо да се отвори пред јавноста, е прогласен за тајна.
Прашува, зошто се крие вистината за одговорноста на полицијата.
„Додека трагедијата уште боли, се штитат директните виновници:
– Дејан Салтировски, началникот на СВР Штип, човекот кој ја дал наредбата, добива политичка заштита од својот поранешен адвокат сега министер, и од самиот Мицкоски.
– Драган Петрушев Казак, службеникот што ја спровел наредбата, иако знаел дека е спротивна на процедурите.
– Кристина Јованова, која дозволила фирма со блокирана сметка да работи на црно, да организира забави за деца.
– Томо Донев, кој не мрднал прст, ни кога било јасно дека се користи пиротехника без дозвола.
Фирмата ММММ ДООЕЛ, без дозвола за пиротехника, без овластени лица, работела без проблем. Не само што никој не ја спречил – се отвора сомнеж дека имала политичка заштита. Дали затоа што била блиска до ВМРО-ДПМНЕ? Затоа што организирала митинзи за партијата? Не добиваме одговор ниту на ова прашање“.
Ова според Талески е системско злосторство.
„Кога државата не ги штити децата, туку ги штити оние што ги загрозиле, тоа веќе не е држава. Тоа е режим. Сите гледаме дека одговорност се бара кај келнери, кај диџеи, кај обезбедување. Кај последните во синџирот, но обвинителството е слепо за оние над нив. Се бараат виновници од 2012 година наваму, но не и оние кои вечерта можеле да го спречат пожарот. Никој не сака да погледне во вистинските виновници и тоа е трагедија за целиот овој процес“, додава тој.
Нагласува дека СДСМ нема да молчи и тоа не е политичка пресметка, туку должност.
„Ќе ја раскажеме вистината за Кочани, секој ден, секој детал, сè додека не паднат маските и не се појават сите имиња и од полициските командни штабови, и од владиниот врв.
Ова е масовно убиство со државен потпис и за тоа ќе има одговорност“, потенцира Талески.