Свет
(Видео) Полицијата објави снимка од автономното возило на „Убер“ кое прегази жена

Властите објавија снимка од автомобилот со самостојно управување на компанијата „Убер“ кој во понеделникот прегази жена во предградие на Феникс.
Во возилото сепак имало безбедносен оператор, а тоа била 44-годишната Рафаела Васкез. На видеото објавено од страна на полицијата се гледа како Васкез, која седи зад воланот на автономното „волво“, во неколку наврати не обраќа внимание на ситуацијата на патот и го спушта својот поглед.
На видеото исто така може да се види дека во еден момент, додека операторката гледа надолу, од мракот се појавува жена со велосипед, подоцна идентификувана како 49-годишната Илејн Херцберг. Притоа автомобилот воопшто не застанува, што подоцна го потврдила и полициската истрага, односно возилото ја удрило жената со брзина од 65 километри на час. Херцберг по ударот била пренесена во болница, каде што подоцна починала.
„Видеото е вознемирувачко и тажно и нашите мисли се со семејството на жртвата. Нашите автомобили и натаму не возат, а ние им излегуваме во пресрет на локалните, сојузните и државните органи на секој можен начин“, објавија од „Убер“. Пред објавувањето на снимката оттаму потврдија дека Васкез била во автомобилот и дека во моментот на несреќата возилото било во автономен режим на работа.
„Јасно е дека е тешко да се избегне судир во оваа ситуација, без оглед дали автомобилот го управува човек или самостојно се управува. Жртвата на улицата се појави од никаде. Опасно е да се преминува улицата на неосветлен дел, кога во градот постојат јасно обележани пешачки премини“, рече шефот на полицијата на окургот, Силвија Моир.
Интересен куриозитет за американската јавност е тоа што Васкез во 2000 година била осудена на казна затвор во траење од три години и десет месеци поради вооружен грабеж. Нејзинoто досие било регистрирано под машката верзија на нејзиното име – Рафаел Васкез. Портпаролката на „Убер“ рече дека операторите се подложни на проверка на податоците и дека Васкез ги исполнувала сите услови, како и дека „Убер“ обезбедува шанса за секого.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
„Борбата не е завршена“ – Нетанјаху решен да ги врати сите тела на заложниците

Израелскиот премиер Бенјамин Нетанјаху изјави дека Израел е решен да ги врати сите тела на заложниците што сè уште се во рацете на Хамас.
Тој ја повтори својата порака за време на одбележувањето на втората годишнина од нападот на Хамас велејќи:
„Борбата уште не е завршена, но едно е јасно – секој што ќе крене рака против нас, ќе плати висока цена“.
Израел го обвини Хамас за прекршување на договорот за примирје, според кој сите заложници – живи и мртви – требало да бидат предадени до понеделник. Хамас предаде 20 живи заложници и девет тела, но тврди дека за другите му е потребна специјална опрема за пребарување под урнатините.
Министерот за одбрана Израел Кац порача дека ако Хамас не го почитува договорот, Израел во координација со САД ќе ја продолжи офанзивата до целосен пораз на организацијата.
Свет
Мерц предлага заем од 140 милијарди евра за Украина, обезбеден со рускиот замрзнат имот

Германскиот канцелар Фридрих Мерц најави дека на претстојниот самит на ЕУ ќе предложи Украина да добие заем од 140 милијарди евра, гарантиран со замрзнатиот имот на Руската централна банка.
Средствата би биле наменети исклучиво за финансирање на одбраната, а Киев би ги вратил дури по добивањето репарации од Русија.
Планот е усогласен со иницијативата на Урсула фон дер Лајен за користење на руските средства како гаранција, без директно задирање во нив.
Свет
Официјалната истрага покажа дека подморницата „Титан“ имплодирала поради лоша конструкција

Американска истражна агенција утврди дека подморницата „Титан“ на компанијата „Оушенгејт“, која имплодира за време на нуркањето кај остатоците на бродот „Титаник“ во јуни 2023 година, беше уништена поради низа сериозни недостатоци во дизајнот и тестирањето, објави Би-би-си.
Во несреќата загинаа сите пет лица на бродот, вклучувајќи го и директорот на „Оушенгејт“, Стоктон Раш.
Според извештајот на Националниот одбор за безбедност на сообраќајот (НТСБ), процесот на инженерскиот развој на „Титан“ бил несоодветен, што довело до грешки што предизвикале подморницата да не ги исполни стандардите за цврстина и издржливост.
Националниот одбор за безбедност на сообраќајот тврди дека „Оушенгејт“ никогаш правилно не го тестирал „Титан“ и затоа не знаел колку всушност е силна подморницата. Покрај тоа, компанијата не била свесна дека бродот е оштетен и требало да биде повлечен од употреба пред фаталното нуркање.
„Титан“ исчезна во Северен Атлантик додека се обидувал да стигне до остатоците од „Титаник“, кои се наоѓаат на речиси 600 километри од канадскиот град Сент Џонс во покраината Њуфаундленд и Лабрадор.
Во август 2024 година крајбрежната стража на САД издаде посебен извештај во кој ја опишува несреќата како да можела целосно да биде спрачена и ја критикува „Оушенгејт“ за „сериозно погрешни безбедносни практики“.
Подморницата на своето последно патување ја управувал Стоктон Раш, а бил придружуван од познатиот истражувач на длабокоморските дна, Пол-Анри Наргеолет, британскиот милијардер Хамиш Хардинг и пакистанскиот бизнисмен, Шахзада Давуд, и неговиот 19-годишен син, Сулејман Давуд.
Сите платиле до 250.000 долари за да учествуваат во експедицијата.
За време на истрагата, НТСБ откри сериозни проблеми во безбедносната култура на „Оушенгејт“. Додека некои вработени тврдеа дека безбедноста е приоритет, други, вклучувајќи го и поранешниот директор за поморски операции и еден техничар, опишаа работна средина „во која безбедноста, а особено прашањата за дизајнот, систематски се игнорираат“.
Еден техничар рече дека имал забелешки на деловниот модел на „Оушенгејт“, особено на практиката патниците да се нарекуваат специјалисти за мисија за да се избегнат законски ограничувања. Според американските прописи, нелегално е да се превезуваат патници на експериментални подморници.
Техничарот рече дека го предупредил Раш велејќи: „Не можете само да ја смените титулата на некого ако сте платени за тоа“. Во подоцнежен разговор за истото прашање Раш наводно му рекол: „Ако крајбрежната стража стане проблем, ќе купам конгресмен и ќе го решам“.
фото: принтскрин