Кардиохируршкиот, гинеколошкиот и педијатрискиот тим на „Аџибадем Систина“ го спасија животот на 27-годишна трудница, која во 31. гестациска недела во животозагрозувачка состојба и со знаци на тешка форма на дисекција на аортата дојде во ургентниот центар на болницата. Со итен царски рез пред сè е спасен животот на бебето, а потоа се продолжи со операција на аортата. И бебето и мајката денес се во стабилна здравствена состојба, велат од болницата.

„Ова е прв случај во регионот во кој се изведени царски рез и кардиохируршка операција и се спасени два живота. Ваквиот историски успех ја става ‘Аџибадем Систина’ на листата на врвни центри каде што може да се третираат и најкомплексни кардиохируршки интервенции. Досега во стручната литература е објавени неколку вакви случаи во САД, каде што трудниците биле во поодмината бременост (34-35. гестациска недела). Смртноста кај вакви случаи се проценува на 55- 60 %. Пациентката не била прифатена од  другите болници и кардиохируршки центри“, се наведува во соопштението од болницата.

Поради комплексноста на случајот, пациентката, иако се упатила со силна градна болка, отежнато дишење и во тешка општа состојба, била одбиена од другите болници во Скопје со образложение дека не можат да ја третираат.

„Најголемо разочарување за нас беше болницата ‘Филип Втори’. Жена ми едвај стоеше на нозе, а тие не се обидоа да направат нешто, само кажаа – ние не можеме да ви помогнеме, немаме услови за да ја спасиме пациентката, одете веднаш во ‘Аџибадем Систина’. На државната клиника и во Градска општа болница ‘8 Септември’ сопругата не ја ни сметаа за итен случај, морав сам да инсистирам да ѝ направат дополнителни испитувања“, вели сопругот на пациентката Селам Муареми.

Бебето родено во 31. гестациска недела со 1.800 гр тежина е во стабилна состојба и пренесено на Одделот за неонатална интензивна нега. Целиот тим вложува максимален ангажман за стабилизација на виталните функции, пред сè на дишењето и срцевата работа, но и на сите други функции во смисла на исхрана, особено специфична за предвремено родени бебиња.

„Здравствената состојба на Сејар е сега стабилна и се надеваме дека за кратко време ќе може да си замине дома“, вели д-р Душко Фидановски, шеф на Одделот за педијатрија.