Денеска во хотелот „Мериот“ се одржа традиционалниот 11-ти Ерсте инвеститорски појадок, настан во организација на Ерсте Групацијата и Шпаркасе Банка АД Скопје. На настанот учествуваа истакнати експерти од економскиот сектор и водечки претставници на финансиските институции, кои споделија свои видувања за актуелните макроекономски предизвици. Нивните разговори се фокусираа на стратегии за постигнување одржлив раст и економска стабилност, што е од големо значење за напредокот на локалниот и на регионалниот пазар.

Конференцијата ја отвори г-а Нина Неданоска, заменик-претседател на Управниот одбор на Шпаркасе Банка, која истакна дека Банката е посветена на поддршка на македонската економија преку различни иницијативи и соработка со локални бизниси и институции.

„Северна Македонија се соочува со различни макроекономски предизвици и трендови. Економскиот амбиент во државата секогаш е под влијание на низа фактори, домашни и надворешни, кои несомнено го диктираат темпото на економската активност. Последните очекувања за следниот период покажуваат тенденции за надолна ревизија на инфлациските очекувања, што може да укаже на подобрување на економските услови или на ефектите од монетарната политика. Ние веќе 16 години активно работиме на македонскиот пазар, а сме дел од австриската банкарска групација Ерсте и Штаермеркише Шпаркасе, која следната година прославува 200 години и брои 17 милиони клиенти и во 2023 година оствари 3 милијарди евра профит. Гледано низ призма на стабилност, искуство, експертиза и европски трендови, на македонскиот пазар, Шпаркасе Банка е значаен двигател на македонската економија и силен партнер на корпоративниот сегмент и сегментот население“ – изјави г-а Неданоска.

На конференцијата говореше и г-а Ана Митреска, вицегувернерка на Народната банка на Република Северна Македонија, која ја анализираше улогата на институцијата во постигнувањето одржлив раст и намалување на инфлацијата.

Централен дел на програмата беше тркалезната маса на тема „Регионален поглед – трендови на локалните финансиски и пазари на капитал“. Учесниците на панелот дискутираа за идните перспективи на пазарот, за инфлациските предизвици и за новите можности за инвестирање, што е од особено значење за развојот на бизнисите во Северна Македонија и во регионот.

Настанот е дел од долгорочната традиција на Ерсте Групацијата и Шпаркасе Банка за поддршка на економскиот раст и стабилност, потврдувајќи ја улогата на Банката како една од водечките финансиски институции во Средна и Источна Европа, која обезбедува услуги за милиони клиенти во целиот регион.

ПР текст

Претседателот на Сојузот на стопанските комори на Македонија, г. Трајан Ангелоски, денеска ја отвори првата меѓународна коучинг-конференција во Скопје, на која ја истакна важноста на лидерството и коучингот како централни столбови за успешен развој и напредок во бизнис-секторот.

„Соочени со реалност полна со предизвици – одлив на таленти, економски и политички турбуленции, финансиски кризи и постојаните промени на глобално ниво – одговорноста на лидерите значително се зголемува. Бизнисите повеќе од кога било се потпираат на јаките лидерски вештини и на ефективниот коучинг за да ги надминат овие предизвици и да обезбедат стабилност и просперитет во услови на несигурност“, рече Ангелоски во својот поздравен говор пред присутните на коференцијата.

Тој додаде дека лидерството на 21 век бара од лидерите не само техничка експертиза туку и длабоко разбирање за луѓето со кои работат, односно човечки и емотивни вештини, кои создаваат продуктивна и инклузивна работна средина. Тука доаѓа коучингот како суштинска алатка за личен и професионален развој. Тој не е само метод за тренинг, туку процес за поттикнување на индивидуалниот потенцијал, подигнување на самосвесноста и самодовербата и ослободување на креативноста и иновациите кај вработените. Домашните компании, учејќи од меѓународните, почнуваат сè повеќе да ги препознаваат значењето на коучингот и лидерските вештини за раст и развој, меѓутоа разликата е видлива во пристапот кон формалното и неформалното образование. Во меѓународната практика, особено во развиените земји, постои долгогодишна култура на вклучување формални програми за развој на лидерски и коучинг-вештини во рамките на организациите.

Овие програми често се дополнети со неформално учење, вклучувајќи коучинг, менторство и едукативни работилници, кои им овозможуваат на лидерите и на вработените да ги развијат своите потенцијали во структуриран процес. т.е. успешното лидерство е она што инспирира, мотивира и ги претвора предизвиците во можности – токму тоа е улогата на коучингот во денешното деловно работење.

Со новиот Закон за енергетиката на регулаторот му се доделуваат сериозни ингеренции во процесот на пазарното поврзување со соседните земји со цел зголемена конкурентност, пониски цени, поголеми инвестиции, посочи Марко Бислимоски, претседател на Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) на панелот „Обновливи извори: Стратешки преглед на имплементацијата на обновливи извори на енергија“ на конференцијата организирана од Македонското здружение за обновливи извори на енергија (МАРЕС).

„Ние сме инволвирани во пазарното поврзување помеѓу Грција, Македонија, Албанија и Косово преку проект на УСАИД. Главната цел е да станеме интегриран дел од паневропскиот пазар. Со новиот Закон за енергетиката се оди кон либерализација на пазарите, што поттикнува инвестиции. Со овој процес за пазарна интеграција нашите компании ќе имаат можност да учествуваат на пазарите во соседните земји“, посочи Бислимоски.

РKE и со Законот за енергетиката, кој е во сила и во кој е имплементиран третиот енергетски пакет како новина, воведе надзор на пазарите на електрична енергија и природен гас.

„Ние имаме развиено мониторинг-платформа во која се агрегираат податоците од сите учесници на пазарот и доколку утврдиме непазарно однесување, може да почнеме соодветни постапки пред судовите. Нефер пазарно однесување ќе се казнува со дел од приходот“, објасни Бислимоски.