Дополнително осиромашување ќе предизвика најновата погубна политика на власта, односно воведувањето прогресивен данок со покачување на данокот на доход од 10% на 18%, рагираат денеска преку соопштение од опозициската партија ВМРО-ДПМНЕ.

„Покачувањето на даночната стапка најмногу ќе ги погоди младите професионалци од секторите како ИТ- технологиите, здравствената заштита и слично, кои ќе добијат мотив плус за да ја напуштат Република Македонија и да ја преместат својата дејност во држави со поповолна даночна политика. Невработеноста дополнително ќе се зголеми, но ќе се зголеми и даночната евазија каде голем број субјекти наместо пријавување на своите приходи ќе се префрлат на полето на сивата економија“, се наведува во соопштението.

Од ВМРО-ДПМНЕ истакнуваат дека сè поголем е бројот на разочарани граѓани кои не гледаат никаков просперитет.

„Економското цунами ‘Заев-Тевдовски-Анѓушев’ го задолжи секое семејство во Република Македонија со нови 1.200 евра, а граѓаните не видоа никакво фајде од милионите кои си ги подигна СДСМ на грбот на државата. Тоа е резултат на фактот дека Македонија е единствена земја во Европа што ја води премиер обвинет за корупција за кого јавно во суд се даваат искази како барал мито од едно евро за него, евро за партијата и евро за црквата од метар квадратен“, велат од партијата.

Според нив, ваквата катастрофа власта ја покрива со нарачан политички прогон врз секој што мисли поинаку.

„Затоа патриоти и докажани професионалци од МВР беа вратени во притвор за 24 часа откако беа ослободени. Срамот на Заев и СДСМ го покриваат политичкото обвинителство и судот. Нечовечки е и без никаква основа професионалците и патриотите да бидат фрлени во притвор само за да се задоволат нечии желби. Срамно е нивните семејства да се трауматизираат само за да се задоволи нечија желба за одмазда. Недолично е да се игнорира одлуката на Врховниот суд и следниот ден да се постапи спротивно на неа. Судот мора да се ослободи од притисокот и да ги уважи жалбите на притворените“, стои во партиското соопштение.