Македонија
Ослободителна пресуда за обвинетите за убиство на тројцата полицајци во Арачиново 2000 година
Кривичниот суд денеска, по 18 години, донесе ослободителна пресуда за обвинетите Рамиз Асани, Муча Бајрами, Емрула Емрулаи и Лирим Динарица, обвинети за убиството на тројцата полицајци Кирил Петрушевски, Ацо Ангеловски и Ерол Готак кое се случи на 11 јануари 2000 година на влезот во Арачиново.
Лирим Динарица, еден од обвинетите, по објавување на ослободителната пресуда изјави дека во нивна одбрана имало стотина сведоци кои изјавиле дека тој и останатите обвинети немаат никаква врска со убиството на тројцата полицајци.
„Минавме 18 години тортура и малтретирања низ овие судски лавиринти и само нашата кожа знае како ни било. Жално е што во затворите во Македонија лежат многу невини луѓе, не само од овој случај, туку и од многу други“, изјави Динарица.
За случајот севкупно беа обвинети 6 лица вклучувајќи ги и сега починатите Башким Асани и Агим Асани. Обвинетите веќе еднаш добија ослободителна пресуда поради недоволно докази, но по жалбата на Обвинителството Апелациониот суд ја укина првостепената одлука по што постапката беше вратена на почеток.
Тројцата полицајци кои на 11 јануари 2000 година беа убиени учествувале во акција за пронаоѓање украдени автомобили при што на нив беа испукани голем број куршуми од автоматско оружје. Во јавноста овој случај се смета за почеток на конфликтот кој следеше една година подоцна.
Првообвинетиот Динарица во истражната постапка првично го признал делото каде во детали го опишал настанот, но на судењето го сменил исказот велејќи дека бил присилен да признае нешто што не го сторил.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДИК ги соопшти местата на кои ќе се прегласува на 22 мај
Државната изборна комисија (ДИК) денеска, на 105. седница, едногласно го усвои предлогот да се повтори гласањето во Изборната единица (ИЕ) 5 на избирачките места 1470/1 и 1470 во Општина Долнени, 1.194 и 1.202 во Општина Крушево, 1844 во Општина Струга и 1272 во Општина Охрид, како и во ИЕ 6 на избирачкото место 2101 во Општина Желино. Гласањето ќе се одржи идната среда, на 22 мај 2024 година.
ДИК на седницата ги разреши и претседателите на избирачките одбори, членовите и нивните заменици во избирачките места 1470/1 и 1470 во Општина Долнени, 1194 и 1202 во Општина Крушево, 1844 во Општина Струга, 1272 во Општина Охрид и 2101 во Општина Желино.
Со оглед дека се кратки роковите за избор на нови избирачки одбори, за да биде регуларно прегласувањето, општинските изборни комисии (ОИК) ќе треба да ангажираат некои од веќе постојните избирачки одбори, или од најблиските избирачки места или некои други, и за тоа ќе треба да достават известување до ДИК.
Кампањата за повторното гласање ќе трае до понеделник, 20 мај, 00.00 часот. Притоа, ќе важат истите листи за болни и немоќни лица, ќе нема можност да се пријавуваат нови.
Според ДИК, има можност за измени и предлози за овластени претставници на кандидати. Тоа важи и за членовите на избирачките одбори кои се предложени од политичките партии.
Македонија
Кацарска ја чува обезбедување, денес добила закани дека „страшно ќе одговара“
Непознато лице денеска напладне во близина на ТЦ „Рамстор“ во центарот на Скопје вербално и се заканувало на претседателката на Уставниот суд, Добрила Кацарска. По инцидентот интервенирало нејзиното обезбедување.
„Полициски службеници од полициската станица Центар денеска во 14:00 часот го лишиле од слобода В.П.Г. (57) од Богданци, постапувајќи по претходна пријава дека во угостителски објект во трговски центар на подрачјето на Центар во Скопје упатил закани кон Д.К.(67) од Скопје со зборовите ‘ќе одговараш, страшно ќе одговараш’. Лицето било задржано во полициска станица и по целосно документирање на случајот во координација со јавен обвинител против него ќе биде поднесена кривична пријава по член 144 од Кривичниот законик“, соопшти МВР.
Пред неколку дена во подземна гаража на зграда во Центар пронајдени се импровизиран кревет и кујнски нож на гражаното место на Кацарска.
Од МВР потврдуваат дека известен е јавен обвинител, предметите се подигнати за вештачење и се преземаат мерки за расчистување на случајот.
Македонија
Утре затворени неколку улици во Скопје
Утре од 08.30 до 12.30 часот, поради одржување на натпревар „Стопански триоги триатлон”, со стартно-целна позиција кај Спортскиот центар „Борис Трајковски” во дел од градот ќе има изменет режим на сообраќај, соопшти СВР Скопје.
Посебниот режим на сообраќај ќе опфати дел од уличната мрежа околу СЦ „Борис Трајковски” и дел од булеварот Илинден (десна коловозна лента), потоа на потегот од крстосницата со булевар 8 Септември до крстосницата со улицата Никола Парапунов и обратно.
Утре исто така со почеток во 09.45 часот, поради одржување на спортско-рекреативен настан „Прв до врв” ќе има посебен режим на сообраќај во делот од градот каде што ќе се реализира манифестацијата.
Настанот почнува пред Музеј на град Скопје – улица Св.Кирил и Методиј, потоа лево по булеварот Св.Климент Охридски, во продолжение право по булеварот Мајка Тереза, па лево по улицата Тодор Александров и по локалниот пат за Средно Водно до врв на Водно („Милениумски крст”).