ВМРО-ДПМНЕ го прашува Фатмир Битиќи и СДС да кажат кои се тие класифицирани информации кои му се украдени, и како се нашле во негов посед?

„Фатмир Битиќи во изјава за медиуми во врска со грабежот во неговиот дом кажа дека му е одземена папка со класифицирани документи. Го прашуваме Фатмир Битиќи и СДС да кажат кои се тие класифицирани информации кои му се украдени, и како се нашле во негов посед? Дали станува збор за највисоки државни тајни, и како и зошто истиот тој ги чувал во својот дом?“, праша Валентин Манасиевски, член на ЦК на ВМРО-ДПМНЕ.

Според него, државните функционери немаат право да ги изнесуваат државните тајни и класифицирани документи од институциите во кои тие се наоѓаат и каде се заштитени.

Тој го повика СДСМ да каже дали изнесувањето на клааифицирани информации од институциите со кои управувале е партиска пракса и насока?

„И СДС и Фатмир Битиќи веднаш да ги известат органите за каков вид на документи станува збор. А граѓаните дали со кражбата на тие документи е загрозена Македонија. СДС и Фатмир Битиќи мора да им кажат на граѓаните дали Македонија е загрозена со кражбата на документи кои Фатмир Битиќи не смеел да ги чува во свој посед? Воедно го повикуваме ЈО да поведе постапка против Битиќи. Одговорност мора да има“, рече Манасиевски.

Државниот завод за ревизија го отвори досието на Бирото за развој на образованието и таму – слика што веќе никого не изненадува: хаос, незаконско работење, злоупотреба на буџетот и политичка партизација до срж, велат од „Влен“.

Ревизорите потврдија оти Зеќирија Хасипи, поставен од Министерството за образование под раководство на кадарот на ДУИ – Јетон Шаќири, останал на директорската функција повеќе од 5 години. Без конкурс, без транспарентност, без срам, додава „Влен“.

„Што покажа извештајот за 2023 година?

Бирото било водено од две лица без регуларен мандат – спротивно на Законот! Надоместоците за надворешни соработници се исплаќале без јасни критериуми! Немало средства за обуки на наставниците, но секогаш имало пари за партиски вработувања! Од седумте препораки од последниот ревизорски извештај – реализирани се само две.

Останатите? Заборавени – исто како и учениците и нивната иднина.
Кадрите на ДУИ не беа само партиски поставени функционери – тие станаа симбол на криминализирана држава, на образовен систем претворен во партиски штаб. Таму не се броеја наставни програми, туку гласови. Не се инвестираше во деца, туку во клиентелизам.

Албанците добро се сеќаваат – на срамните преводи на албански јазик од проектот „1000 книги“ на Груевски, на децата во Велес што останаа без настава на мајчин јазик. Политиката на ДУИ е јасна – да ги користи Албанците како штит за своите криминалии.

И сега кога се опозиција, кога јавноста секојдневно се информира за нивните гревови, ДУИ не покажува демократски капацитет за соочување со одговорност, туку бара излез во обиди за предизвикување политичка криза. Нивната уцена ќе биде – ќе ги бојкотираме локалните ако нема и предвремени парламентарни избори. И тоа нема врска со нивните лажни тези дека Албанските права се загрозени, туку исклучиво со нивните теснопартиски интереси.

Се надеваат дека Пржинска Влада, со МВР под контрола на опозицијата, ќе им овозможи да уништат докази за коруптивните зделки на нивните поранешни функционери“, се додава во соопштението на „Влен“.

Денеска, беше претставен комплетно реновираниот и опремен оддел за висцерална и абдоминална хирургија, на Универзитетската клиника за хируршки болести „Св. Наум Охридски“ во Скопје, во вредност од околу 4 милиони денари – донација на компанијата Спорт Лаиф обложувалници.

Проектот започна во 2024 година и опфати целосна обнова на внатрешноста и модернизација на електричните и санитарните инсталации на одделот. Оваа година, Спорт Лаиф обезбеди дополнителни средства за опремување на истиот простор со 24 нови двомоторни медицински кревети со огради, нови душеци, нов болнички мебел и стативи за инфузија. Согласно потребите на болницата беа обезбедени и 50 декубитални душеци, 100 лепенки, 10 апарати за мерење притисок и 20 апарати за мерење на гликемија.

„Покрај реновирањето на холот, на собите на пациентите и на болничкиот персонал, решивме да направиме дополнителни напори просторот да го опремиме и со нов медицински мебел, кој ќе создаде подобри услови за постоперативните пациенти. Сметаме дека тоа беше неопходно за оваа водечка институција за хируршки болести која има огромна традиција и централна улога во нашето здравство. Како општествено одговорна компанија, тука сме да го дадеме својот придонес за развој на општеството, и за поддршка на хуманите цели“, изјави Петар Поцков, маркетинг директор на Спорт Лаиф.

„Со оваа интервенција, капацитетот на одделот за постоперативна нега на пациентите, на површина од скоро 400 м2 е целосно обновен и опремен за прием и лекување на пациенти од одделот за висцерална и абдоминална хирургија. Опремените простории со нов и модерен медицински мебел и опрема, ќе овозможат подобрени болнички услови за нивна нега и лекување. Нашата клиника е меѓу институциите со долг историјат и традиција и проектите за реновирање и подобрување на условите за лекување по повисоки стандарди се добредојдени и во иднина. Во име на целиот персонал, ја изразуваме нашата благодарност кон Спорт Лаиф за оваа значајна поддршка и се надеваме дека ќе биде пример и за другите општествено одговорни компании“ – изјави д-р Небојша Настов, директор на Клиниката за хируршки болести „Св. Наум Охридски“.

Спорт Лаиф обложувалници остануваат посветени на својата мисија за поддршка и реализација на проекти во областите на здравството, спортот и други општествени и хуманитарни цели.

(ПР)