Македонија
Османи: Очекувам Македонија наскоро да им се приклучи на земјите во Јадранско-јонскиот Регион
Вицепремиеро, задолжен за европски прашања, Бујар Османи, оствари средба со генералниот директор на Директоратот за Европската Унија при Министерството за надворешни работи на Република Италија, Џузепе Бучино.
Како што информираат од кабинетот на вицепремиерот, Османи најнапред изразил благодарност за досегашната поддршка на Италија за евро-атланската интеграција на Македонија и го поздравил ставот на Италија дека процесот на проширување на Европската Унија нема да биде завршен сè додека сите земји од Западен Балкан не се приклучат на големото европско семејство.
„Сега, откако Грција и официјално потврди дека нема да го спори нашиот влез, очекувам набрзо да се приклучиме на Италија и на другите земји во Јадранско-јонскиот Регион“, истакнал Османи на средбата потенцирајќи ја притоа важноста на меѓусебната соработка на земјите од Западниот Балкан, која и сега се одвива под засилено темпо низ останатите иницијативи како што е и Берлинскиот процес.
Во текот на разговорот Османи се осврнал и на позитивниот извештај на ЕК за состојбите и напредокот на Македонија на патот кон ЕУ, кој, како што рекол, покажал дека Република Македонија успешно ги адресира ургентните приоритети, дека е надмината политичката криза и дека земјата е вратена на нормалниот демократски колосек.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„ДКСК да покрене постапка против Битиќи, бара од фирмите на кои им исплаќал државна помош да гласаат за него“, вели ВМРО-ДПМНЕ
„ДКСК да покрене постапка против Битиќи, бара од фирмите на кои им исплаќал државна помош да гласаат за него, им сугерира и број на гласачко ливче. По објавениот документ од кој се гледа како Битиќи бара од компании да го поддржат затоа што им исплаќал државна помош тој требаше да се повлече од политиката“, велат од ВМРО-ДПМНЕ.
„Фактот што Битиќи не само што не се повлече, туку и не се извини, говори како СДС и ДУИ ја заробија државата и како 100тина функционери управуваат со државата како да е нивен личен имот.
ДКСК не смее да чека, да отвори случај и да се отвори постапка и пред другите институции.
Злоупотребите на институциите мора да запрат. По 8ми мај ќе се стави крај ма ваквите практики, а таквите како Битиќи ќе се соочат со одговорност“, соопшти ВМРО-ДПМНЕ.
Македонија
Променливо облачно и нестабилно со пороен дожд и грмежи
Времето денеска ќе биде променливо облачно и нестабилно со пороен дожд и грмежи, особено во источните делови. Локално процесите ќе бидат во форма на краткотрајно невреме со засилен ветер и услови за изолирана појава на град. Минималната температура ќе биде во интервал од 7 до 12, а максималната ќе достигне од 14 до 22 степени.
Во Скопје променливо облачно и нестабилно со пороен дожд и грмежи. Во делови од котлината ќе има услови за краткотрајно невреме со засилен ветер и изолирана појава на град. Минималната температура ќе се спушти до 10, а максималната ќе достигне до 21 степен.
Продолжува периодот на променливо облачно време со повремени локални врнежи од дожд, освен во недела кога ќе биде претежно стабилно и потопло. Во сабота ќе дува засилен северен ветер.
Македонија
Нема подолги задржувања за влез и излез од државата
Сообраќајот на државните патишта се одвива непречено, по влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.