Една година по 27 април, ситуацијата е следна: СДСМ и ДУИ профитираа, а државата и граѓаните губат секојдневно. Животот дојде само за криминалниот картел во власта. Се краде на големо, а ниту еден граѓанин не живее подобро. Ваква е реакцијата на ВМРО-ДПМНЕ по прес-конференцијата на премиерот Зоран Заев и претседателот на Собранието, Талат Џафери по повод една година од упадот во Собранието.

„Една година по настаните од 27 април, нема никаква истрага за политичкото насилство сторено врз Уставот. Се монтираат политички обвиненија и оперски пејачи се прогласуваат за терористи, а никој не прашува кој ја даде наредбата и зошто токму во време на протестите беше донесена одлука да се реализира неуставниот избор за претседател на Собранието? Никој не спроведува истрага кои се тие вооружени групи во Чаир и во околината на Скопје кои биле подготвени да тргнат кон Собранието? Под чија команда биле? Дали имале намера да пукаат во насобраните граѓани? Дали непостапувањето на институциите против нив значи дека некој сè уште сака да ги има под контрола и да ги повика на оружје доколку почувствува потреба?“, реагира ВМРО-ДПМНЕ.

Опозициската партија додава дека Игор Дурловски, Борис Дамовски, Владо Јовановски, Богдан Илиевски, Митко Чавков или пратениците се терористи, а обвинението против нив е политичка конструкција за да се покрие силувањето врз Уставот.

ВМРО-ДПМНЕ вели дека политичкиот прогон мора да запре, а власта да покаже интерес и да поведе истрага кои се луѓето под оружје што биле подготвени да пукаат во граѓаните што со денови мирно протестирале.