Демократијата и слободата на едно општество зависат од слободата на говорот и на медиумите. Република Македонија е демократска земја во која владее правото и во која целосно се почитуваат слободата на говор и на слободно изразување. Медиумите во земјата треба да работат ослободени од какви било притисоци, да ги информираат граѓаните навреме, точно и без цензура. Токму затоа 3 мај го одбележуваме како Светски ден на медиумската слобода. Ден кога се слават фундаменталните принципи на новинарската професија, но и ден што служи како потсетник никогаш да не ја загубиме оваа слобода. Ден во кој се сеќаваме и на сите новинари што го загубиле својот живот во процесот на својата работа борејќи се вистината да излезе на виделина, порача премиерот Зоран Заев.

Според него, цела деценија во земјата новинарите беа злоупотребувани, напаѓани, цензурирани и спречувани во својата работа. „Беше потисната основната медиумска слобода. Оваа состојба беше и причина за неинформираноста на голем дел од нашите граѓани, со што директно беа загрозени основните темели на нашата демократија. Ние како отворена, транспарентна и демократска влада целосно ја почитуваме слободата на медиумите и укажуваме на важноста медиумите да работат, пред сè, за граѓаните и во интерес на владеењето на правото и демократијата, а не за нечии лични интереси. На сите новинари во земјата им го честитам овој ден и ги поттикнувам да работат посветено и одговорно. Да ја надградуваме нашата демократија и да ги почитуваме фундаменталните човекови слободи и заедно да можеме достоинствено да кажеме дека сме модерна европска демократска држава“, порача Заев.