Свет
Италијанските популисти подготвени да ја формираат следната влада откако Берлускони даде зелено светло
Италијанските популистички и антиестаблишментски партии Пет ѕвезди и Ла Лега, кои делат многу заеднички политики за масовната миграција, Европската Унија и за еврото, се подготвени да ја формираат следната италијанска влада откако централно-десничарскиот коалициски партнер на Ла Лега, Силвио Берлускони, престана да се противи на заедничкото работење на партиите.
Претходно и движењето Пет ѕвезди (M5S) и Ла Лега, предводена од Матео Салвини, не можеа да постигнат договор бидејќи водачот на M5S, Луиџи ди Мајо, одби да соработува со поранешниот премиер Силвио Берлускони, коалицискиот партнер на Салвини. Во средата вечерта Берлускони објави дека нема да се спротивстави на коалицијата меѓу двете партии кои сега би можеле да формираат евроскептична влада.
Иако Берлускони веќе не може да биде пречка за новата влада, италијанскиот претседател, Серџо Матарела, објави дека ќе побара одредени гаранции за да им даде мандат на антиестаблишментските партии. Гаранциите на Матарела, за кои се верува дека ќе ги смират стравовите од Европската Унија и други, би можеле да влијаат на ветувањата што ги дадоа двете страни вклучувајќи го и ветувањето на Салвини за депортирање стотици илјади нелегални мигранти.
И покрај потенцијалното противење од италијанскиот претседател, Салвини во четвртокот попладне рече дека владата ќе биде фокусирана на безбедносните прашања и на масовната миграција. Пратеникот на М5Ѕ, Алфонсо Бонафеде, коментираше дека програмата за минимална плата и рамниот данок се исто така важни појдовни точки. Двете страни се очекува да постигнат договор во следните два до три дена, но ако не може да се постигне договор, најверојатно ќе бидат распишани нови избори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хеликоптерот со иранскиот претседател Ебрахим Раиси доживеа „тешко слетување“
Хеликоптерот со иранскиот претседател Ебрахим Раиси доживеа „тешко слетување“, објави иранската државна телевизија, без веднаш да даде детали.
Раиси отпатува во иранската провинција Источен Азербејџан. Државната телевизија соопшти дека инцидентот се случил во близина на Џолфа, град на границата со Азербејџан, на околу 600 километри северозападно од иранската престолнина Техеран, а спасувачите биле отежнати од силниот ветер и дождот.
Сè уште нема официјална информација за тоа во каква состојба е Раиси.
Раиси беше во Азербејџан во неделата рано наутро на отворањето на браната со претседателот на Азербејџан, Илхам Алиев.
Иранската државната новинска агенција ИРНА објави дека хеликоптерот „паднал во несреќа во општата област Варзеган“ во провинцијата Источен Азербејџан, а покрај Раиси, во хеликоптерот имало уште неколку официјални лица, меѓу кои и министерот за надворешни работи Хосеин Амир Абдолахиан.
Тешките временски услови и густата магла ги отежнаа напорите на спасувачките тимови, соопшти иранската државна телевизија.
Регион
Загинаа две лица, а пет се водат како исчезнати по судар на чамец и крузер во Дунав кај Будимпешта
Две лица го загубија животот доцна синоќа, а пет се водат за исчезнати во судар на мал моторен чамец и крузер на реката Дунав северно од Будимпешта, соопшти денеска унгарската полиција.
Телата на возрасен маж и жена се пронајдени северно од главниот град, а властите се уште трагаат по пет исчезнати лица.
Сома Чечи, портпарол на полицијата во Будимпешта, на прес-конференција рече дека, според досегашните сознанија, во чамецот имало вкупно осум возрасни лица и потврди дека две лица загинале, а пет се водат како исчезнати. Тројца мажи и две жени моментално се бараат со глисери и дронови, јавуваат унгарските медиуми.
Полицијата соопшти и дека во градот Комаром бил запрен поголем брод, а од увидот било откриено дека му е оштетен страничниот дел. Се врши увид и во тек е истрага за опасноста по водениот пат и смртта на неколку лица.
Регион
По обидот за атентат словачкиот премиер Фицо е надвор од животна опасност
Словачкиот премиер Роберт Фицо е надвор од животна опасност по обидот за атентат, изјави денеска министерот за одбрана и вицепремиер Роберт Калинак за словачката новинска агенција ТАСР.
Состојбата на Фицо се подобрува, а лекарската комисија утре треба да одлучи дали тој ќе биде префрлен. Фицо моментално се опоравува во универзитетската болница во Банска Бистрица.
Фицо беше тешко повреден на 15 мај, по седницата на Владата во градот Хандлова, кога 71-годишниот писател Јурај Цинтула, од непосредна близина неколку пати пукаше со пиштол во него. Специјалниот кривичен суд во словачкиот град Пезинок, со силно полициско обезбедување вчера му одреди притвор на Цинтула.